ក្រសួង​កសិកម្ម រៀប​ចំសិក្ខា​សាលាពិគ្រោះ​យោបល់ថ្នាក់​ជាតិស្តីពី​សេចក្តីព្រាង​ផែនកា​រវិនិយោគព្រៃឈើ

ភ្នំពេញ៖ នៅថ្ងៃទី០៦ ខែមិនា ឆ្នាំ២០១៧ នៅសណ្ឋាគាររ៉ាហ្វល ឡឺរ៉ូយាល់ មានរៀបចំ សិក្ខាសាលាពិគ្រោះយោបល់ថ្នាក់ជាតិស្តីពីការរៀបចំកម្មវិធីវិនិយោគព្រៃឈើ ក្រោមអធិបតីភាពលោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ដោយមានការអញ្ជើញចូលរួមពីថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ តំណាងក្រសួងបរិស្ថាន នាយកធនាគារអភិវឌ្ឍន៍អាស៊ីប្រចាំកម្ពុជា ដៃគូអភិវឌ្ឍ អង្គការមិនមែនរដ្ឋាភិបាល មន្ទីររាជធានីខេត្ត និងសហគមន៍ព្រៃឈើ ប្រមាណ100នាក់។

សូមជម្រាបផងដែរថា សិក្ខាសាលានេះរៀបចំឡើងក្នុងគោលបំណងពិភាក្សា ស្វែងយល់ពីការអភិវឌ្ឍន៍វិស័យព្រៃឈើ ជាពិសេសការបង្កលក្ខណៈឱ្យយើងទាំងអស់គ្នាមានឱកាសប្រាស្រ័យទាក់ទងគ្នាដោយផ្ទាល់ជាមួយអ្នកជំនាញបច្ចេកទេស និងស្ថាប័នពាក់ព័ន្ធ ដើម្បីឆ្លុះបញ្ជាំងឱ្យឃើញអំពីបញ្ហាប្រឈមនានា និងដំណោះស្រាយរួមគ្នាដើម្បីរៀបចំផែនការវិនិយោគព្រៃឈើប្រកបដោយភាពជោគជ័យស្របតាមកម្មវិធីកំណែទម្រង់របស់រាជរដ្ឋាភិបាល។
លោក វេង សាខុន បានផ្តាំផ្ញើឱ្យអង្គសិក្ខាសាលាផ្តោតការពិភាក្សាលើចំណុចសំខាន់មួយចំនួនដូចជា ១-ភាពស្របគ្នាទៅនឹងគោលនយោបាយព្រៃឈើជាតិ និងបទប្បញ្ញត្តិនានារបស់រាជរដ្ឋាភិបាលកម្ពុជា ២-សារៈប្រយោជន៍រួមទាំងតម្លៃសេដ្ឋកិច្ច សង្គម និងបរិស្ថានដែលទទួលបានពីការវិនិយោគវិស័យព្រៃឈើ ៣-សកម្មភាពសំខាន់ៗដែលត្រូវរៀបចំតាមលំដាប់អាទិភាពសម្រាប់ការអនុវត្តគម្រោងក្នុងខេត្តគោលដៅសមត្ថភាព និងធនធានរបស់ស្ថាប័នក្នុងការអនុវត្តគម្រោងដែលបាន និងកំពុងស្នើឡើង និង ៤-បញ្ហាប្រឈមដែលជាឧបសគ្គដល់ការវិនិយោគនេះ។ ទន្ទឹមនឹងនេះ ក្រសួងកំពុងពិនិត្យ និងធ្វើការជ្រើសរើសទីតាំងសម្រាប់ធ្វើការវិនិយោគ ជាពិសេសតំបន់សម្បទានដីសេដ្ឋកិច្ច ដែលបាននិរាករណ៍កន្លងមក ដើម្បីដាំដុះព្រៃឡើងវិញ ដោយក្រសួងនឹងសហការជាមួយស្ថាប័នពាក់ព័ន្ធក្នុងការបំពេញនីតិវិធីចុះបញ្ជីដី និងធ្វើអនុបយោគដីសាធារណៈរបស់រដ្ឋ ទៅជាដីឯកជនរបស់រដ្ឋ ដើម្បីឈានទៅកាត់បន្ថយជំលោះបញ្ហាដីធ្លីក្នុងពេលវិនិយោគ។ លោករដ្ឋមន្រ្តី បានបន្តថាអង្គសិក្ខាសាលា គួរជំរុញលើកទឹកចិត្តដល់សហគមន៍ព្រៃឈើ ក្នុងការដាំដុះដំណាំរួមផ្សំ និងការចិញ្ចឹមសត្វ ដើម្បីកាត់បន្ថយការទន្រ្ទានដីព្រៃ និងកាត់បន្ថយភាពក្រីក្រ៕