ប្រមុខរដ្ឋស្តីទី អំពាវនាវដល់អាជ្ញាធរគ្រប់ជាន់ថ្នាក់ ត្រូវយកចិត្តទុកដាក់ខ្ពស់អនុវត្តការងារដើម្បីចៀសវាងការថ្នាំងថ្នាក់ពីប្រជាពលរដ្ឋ

ប្រមុខរដ្ឋស្តីទី លោក សាយ ឈុំ បានអំពាវនាវដល់អាជ្ញាធរគ្រប់ថ្នាក់ត្រូវបន្តយកចិត្តទុកដាក់ខ្ពស់ និងតាមដានការអនុវត្តន៍ការងាររបស់មន្រ្តីថ្នាក់ក្រោមឱ្យបានជាប់ជាប្រចាំចៀសវាងកុំឱ្យអនុវត្តផ្ទុយពីច្បាប់ ឬរំលោភទៅលើសេចក្តីណែនាំរបស់រាជរដ្ឋាភិបាល ដែលបង្កឱ្យមានការថ្នាំងថ្នាក់ពីប្រជាពលរដ្ឋ។ ព្រមជាមួយនេះដែរ សូមអាជ្ញាធរស្រុក និងមូលដ្ឋានត្រូវបន្តខិតខំរក្សាការពារសន្តិសុខ សណ្តាប់ធ្នាប់សាធារណៈជូនប្រជាពលរដ្ឋ និងបន្តខិតខំអនុវត្តគោលនយោបាយភូមិ-ឃុំ មានសុវត្ថិភាព លុបបំបាត់បទល្មើសនានាអំពើចោរកម្ម,ការជួញដូរគ្រឿងញៀន។ល។ ដើម្បីនាំមកនូវភាពសុខសាន្ត សុភមង្គល ជូនប្រជាពលរដ្ឋយើង។

លោកបានថ្លែងដូចនេះនៅព្រឹកថ្ងៃព្រហស្បតិ៍ ១៤រោច ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី១៥ ខែមីនា ឆ្នាំ២០១៨ ក្នុងឱកាសអញ្ជើញសម្ពោធដាក់ឱ្យប្រើប្រាស់សាលាពុទ្ធិក, សាលានិច្ចភត្ត កុដិ និងសមិទ្ធផលនានា ក្នុងវត្តភូមិថ្មី ឃុំបែកចាន ស្រុកអង្គស្នួល ខេត្តកណ្តាល និងស្រង់សុគន្ធវារីប្រគេនព្រះចៅអធិការវត្ត។

ប្រមុខរដ្ឋស្តីទី បានវាយតម្លៃខ្ពស់ និងកោតសរសើរចំពោះ ទឹកព្រះទ័យរបស់ព្រះគ្រូចៅអធិការ ព្រះថេរានុថេរៈគ្រប់ព្រះអង្គនៃវត្តភូមិថ្មី ព្រមទាំងទឹកចិត្តរបស់លោកអាចារ្យ គណៈកម្មការវត្ត និងពុទ្ធបរិស័ទ ចំណុះជើងវត្ត ទាំងជិត ទាំងឆ្ងាយ និងទាំងក្នុង និងទាំងក្រៅប្រទេស ដែលបានបរិច្ចាគកម្លាំងកាយចិត្ត និងធនធានផ្ទាល់ខ្លួនប្រកបដោយសទ្ធាជ្រះថ្លា ចូលរួមស្តារកសាងវត្តរហូតមានការរីកចម្រើនដូចសព្វថ្ងៃនេះ ជាពិសេសសមិទ្ធផលថ្មីៗ ចំនួន១១ ដែលបានដាក់សម្ពោធឱ្យប្រើប្រាស់នាពេលនេះ។

លោក សាយ ឈុំ ក៏បានជម្រាបជូនអង្គពិធីថា កន្លងមកនេះ ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតលោកនាយករដ្ឋមន្រ្តី ហ៊ុន សែន ប្រទេសជាតិយើងបានថែរក្សាយ៉ាងគត់មត់នូវឯករាជ្យភាព អធិបតេយ្យភាព បូរណភាពដែនដី រក្សាបាននូវសុខសន្តិភាព ស្ថេរ​ភាពនយោបាយ សន្តិសុខ និងសណ្តាប់ ធ្នាប់សាធារណៈ ព្រមទាំងបន្តអភិវឌ្ឍប្រទេសជាតិទទួលបានការរីកចម្រើនប្រកបដោយចីរភាព៕