អាជ្ញាធរជាតិអប្សរារៀបចំពិធីគោរពវិញ្ញាណក្ខន្ធសម្តេចវិបុលបញ្ញា សុខ អាន នៅស្នាក់ការកណ្តាលដើម្បីរំឭកខួប១ឆ្នាំនៃរមណភាព

ក្នុងឱកាសខួបមួយឆ្នាំនៃមរណភាពរបស់សម្តេចវិបុលបញ្ញា សុខ អាន អតីតឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានអាជ្ញាធរជាតិអប្សរា នៅថ្ងៃទី១៣ និង១៤ ខែមីនា ឆ្នាំ២០១៨នេះ ថ្នាក់ដឹកនាំ និងមន្ត្រីបុគ្គលិករបស់អាជ្ញាធរជាតិអប្សរាជាច្រើនរូប ដែលជាប់ភារកិច្ចមិនបានទៅចូលរួមពិធីនៅរាជធានីភ្នំពេញ បានចូលរួមគោរពវិញ្ញាណក្ខន្ធនៅទីស្នាក់ការកណ្តាលនៃអាជ្ញាធរជាតិអប្សរា។

ការចូលរួមគោរពវិញ្ញាណក្ខន្ធនៅពេលនេះ ត្រូវបានរៀបចំឡើងដើម្បីសម្តែងនូវការដឹងគុណចំពោះសម្តេចវិបុលបញ្ញា ដែលសម្តេចធ្លាប់បានដឹកនាំការងារគ្រប់គ្រងរមណីយដ្ឋានអង្គរក្នុងឋានៈជាប្រធានអាជ្ញាធរជាតិអប្សរា សម្រេចបានលទ្ធផលយ៉ាងត្រចេះត្រចង់ ធ្វើឲ្យអង្គររក្សាបាននូវតម្លៃលេចធ្លោជាសាកល និងកាន់តែមានភាពល្បីល្បាញទូទាំងសកលលោក។

ឆ្លៀតក្នុងឱកាសដ៏ថ្លៃថ្លានេះ ថ្នាក់ដឹកនាំ មន្ត្រីបុគ្គលិក ឆ្មាំ កម្មករទាំងអស់ដែលធ្លាប់រស់ក្រោមឱវាទរបស់សម្តេចវិបុលបញ្ញា សូមលើកឡើងនូវកងការមហាកុសលគ្រប់យ៉ាងឧទ្ទិសជូនចំពោះសម្តេច សូមសម្តេចបានទៅកាន់សុគតិភពកុំបីខាន។ ជាមួយគ្នានេះ ថ្នាក់ដឹកនាំនិងមន្ត្រីបុគ្គលិកទាំងអស់ប្តេជ្ញាថែរក្សានូវកេរដំណែលដ៏ថ្លៃថ្លារបស់ដូនតា ក៏ដូចជាស្នាដៃការពារមរតកដូនជាបន្តបន្ទាប់របស់ថ្នាក់ដឹកនាំជាតិឲ្យបានគង់វង្សយូរអង្វែងតទៅ។

សម្តេចវិបុលបញ្ញា សុខ អាន បានទទួលមរណភាពកាលពីថ្ងៃ៣រោជ ខែផល្គុន ឆ្នាំវក អដ្ឋស័ក ពុទ្ធសករាជ២៥៦០ ត្រូវនឹងថ្ងៃទី១៥ ខែមីនា ឆ្នាំ២០១៧វេលាម៉ោង១៨:៣២នាទីដោយរោគាពាធក្នុងជន្មាយុ៦៦ឆ្នាំ៕