នៅពេលតម្លៃថាមពលដាំក្បាលចុះ សេដ្ឋកិច្ចរុស្ស៊ីបានរងគ្រោះយ៉ាងធំ។ សូម្បីតែសព្វថ្ងៃ តម្លៃប្រេងនិងឧស្ម័នធម្មជាតិទាបយ៉ាងខ្លាំងជាងនៅពេលវាមានតម្លៃខ្ពស់នៅឆ្នាំ ២០១១ និង ២០១២ ទៅទៀត។ ប៉ុន្តែ រុស្ស៊ីបានគេចផុតពីការខ្ទេចខ្ទាំហិរញ្ញវត្ថុ ដោយសារតែធនាគារកណ្តាលរុស្ស៊ី ដែលដឹកនាំដោយប្រធានធនាគារកណ្តាលអឺរ៉ុបដែលទទួលបានជ័យលាភីប្រចាំឆ្នាំ ២ ដង គឺ លោក Elvira Nabiullina។ ចាប់ពីទីផ្សារថាមពលបានដួលរលំ រុស្ស៊ីបានចាប់ផ្តើមបើកទ្វាររបស់គេទៅកាន់ប្រទេសផ្សេងៗ ទាំងសម្រាប់សម្ព័ន្ធមិត្តនយោបាយនិងទាំងទំនាក់ទំនងសេដ្ឋកិច្ច។ ឧទាហរណ៍ដ៏លេចធ្លោរមួយគឺនៅពេលស្តេចប្រទេសអារ៉ាប៊ី សាអូឌីត Salman ទៅបំពេញទស្សនកិច្ចនៅក្រុងម៉ូស្គូនៅខែតុលាមុន។ ប្រទេសទាំងពីរបានប្រឆាំងគ្នាអំពីសង្គ្រាមស៊ីវិលនៅស៊ីរី ដោយរុស្ស៊ីគាំទ្ររបបរបស់ប្រធានាធិបតី Bashar Al Assad ហើយប្រទេសអារ៉ាប៊ី សាអូឌីត គាំទ្រពួកឧទ្ទាមស៊ីរី។ ទោះជាសង្គ្រាមមានលក្ខណៈបំផ្លិចបំផ្លាញក៏ដោយ ក៏ប្រមុខរដ្ឋទាំងពីរអាចទុកភាពខ្វែងគំនិតគ្នាមួយឡែកដើម្បីជួយពិភាក្សាគ្នាអំពីកំណើនសេដ្ឋកិច្ចរបស់ប្រទេសដែរ។
ការបើកចំហរនិងការសម្រុះសម្រួលបែបនេះមានភាពថ្មីមែនទែន សម្រាប់មេដឹកនាំផ្តាច់ការម្នាក់ដូចជា Vladimir Putin។ អ្នកខ្លះមើលឃើញអំពើបែបនោះថា ជាសញ្ញាដែលវិមានក្រឹមឡាំងអាចមានវិធានការថ្មីៗដើម្បីផ្តល់ប្រយោជន៍ដល់សេដ្ឋកិច្ចរបស់ប្រទេស។ ដើម្បីយល់បន្ថែមទៀតនោះ ខាងក្រោមគឺជាសញ្ញាទាំង ៥ ដែលរុស្ស៊ីកំពុងផ្លាស់ប្តូររបៀបដែលខ្លួនធ្វើជំនួញ។
កិច្ចព្រមព្រៀងជាមួយ OPEC
កិច្ចជំនួបរវាងប្រធានាធិបតី ពូទីន និងស្តេច Salman ទាក់ទងនឹងកិច្ចព្រមព្រៀងដែលធ្វើឡើងរវាង OPEC ដែលប្រទេសអារ៉ាប៊ី សាអូឌីត ជាសមាជិក និងរុស្ស៊ី។ ប្រទេសទាំងពីរបានរង់គ្រោះ នៅពេលតម្លៃប្រេងបានធ្លាក់ចុះនៅឆ្នាំ ២០១៤។ រដ្ឋមន្ត្រីក្រសួងថាមពលរុស្ស៊ីលោក Alexander Novak បានពន្យល់ថា “ក្នុងនាមជាប្រទេសផលិតប្រេងធំជាងគេទាំងពីរក្នុងពិភពលោក រុស្ស៊ីនិងអារ៉ាប៊ី សាអូឌីត មានបន្ធុកធ្ងន់បំផុតក្នុងការធ្វើឲ្យទីផ្សារប្រេងមានស្ថិរភាព”។ រុស្ស៊ីបានពឹងផ្អែកជាយូរមកហើយលើប្រាក់ដែលបានពីការលក់ប្រេងរបស់គេ ក្នុងខណៈដែលអារ៉ាប៊ី សាអូឌីត បានជួបប្រទេះនឹងការកើនឡើងការគ្មានការងារធ្វើ ដោយសារតែតម្លៃប្រេងធ្លាក់ចុះ។ គោលបំណងនៃកិច្ចព្រមព្រៀងនោះគឺដើម្បីកាត់បន្ថយការផលិតប្រេងនៅខែធ្នូ ឆ្នាំ ២០១៦ ហើយជាលទ្ធផលតម្លៃប្រេងពិភពលោកបានងើបឡើងវិញ។
ការពង្រឹងទំនាក់ទំនងពាណិជ្ជកម្មជាមួយអាមេរិក
ប្រទេសមួយទៀតដែលរុស្ស៊ីបានឈោងចាប់ក្នុងផ្នែកជំនួញនោះគឺអាមេរិក។ ទោះជាមានការប្រេះឆារនយោបាយរវាងប្រទេសទាំងពីរលើការចោទប្រកាន់ពីការលូកដៃចូលក្នុងការបោះឆ្នោតប្រធានាធិបតីអាមេរិកកន្លងទៅក៏ដោយ ក៏នាយកប្រតិបត្តិនិងជាសហស្ថាបនិកក្រុមហ៊ុន Arkadium បានគូសបញ្ជាក់ថា ទំនាក់ទំនងធុរកិច្ចបានដំណើរការល្អ។ ក្រុមហ៊ុនដែលមានមូលដ្ឋាននៅក្រុងញ៉ូយ៉កនោះក៏បានផ្តល់ការងារដល់មនុស្សជាង ៦៣ នាក់នៅទីក្រុងភាគខាងត្បូងរុស្ស៊ី Krasnodar ផងដែរ ហើយនយោបាយមិនបានធ្វើឲ្យខូចដល់ប្រតិបត្តិការរបស់គេទេ។ ប្រធានសភាពាណិជ្ជកម្មរុស្ស៊ី-អាមេរិកលោក Sergei Millian បានផ្តល់ទស្សនៈកាន់តែទូលាយ ដោយបានបញ្ជាក់ថា ធុរកិច្ចស្រដៀងគ្នាជាង ១០.០០០ ដែលមានប្រតិបត្តិការរវាងប្រទេសទាំងពីរ។ ជារួម ធុរកិច្ចទាំងនោះបានផ្តល់ការងារជាង ៣ លាននាក់។
ការអនុវត្តគម្រោង Blockchains រដ្ឋាភិបាល
រុស្ស៊ីតែងតែគាំទ្រដល់បច្ចេកវិទ្យានៅក្នុងប្រព័ន្ធជាច្រើនរបស់គេ។ Conwire បានរាយការណ៍ថា ពួកគេថ្មីៗនេះបានអនុវត្តគម្រោង Blockchains ជាមធ្យោបាយថ្មីសម្រាប់ប្រតិបត្តិការណ៍ហិរញ្ញវត្ថុរបស់គេ ដែលបានក្លាយជាប្រទេសដំបូងគេមួយក្នុងការទទួលស្គាល់និងប្រើប្រាស់ជាផ្លូវការនូវបច្ចេកវិទ្យានោះ។ វិទ្យាស្ថានហិរញ្ញវត្ថុរដ្ឋ Sberbank បានប្រកាសជាផ្លូវការនូវកិច្ចសហការណ៍របស់គេជាមួយសេវាប្រឆាំងភាពផ្តាច់មុខសហព័ន្ធ (Federal Antimonopoly Service – FAS) ដើម្បីការអនុវត្តិនោះ។
ការលក់មូលប័ត្រប្រាក់អឺរ៉ូ
ក្រសួងហិរញ្ញវត្ថុរបស់ប្រទេសនោះបានចេញមូលប័ត្រប្រាក់អឺរ៉ូតម្លៃ ៣ ពាន់លានដុល្លារក្នុងមួយឆ្នាំៗ ដែលបំពេញតាមតម្រូវការរបស់វិនិយោគិនមូលប័ត្រពិភពលោកជាច្រើន។ នេះបានកើតឡើងប៉ុន្មានថ្ងៃប៉ុណ្ណោះមុនពេលអាមេរិកដាក់ទណ្ឌកម្មថ្មីៗលើរុស្ស៊ី។ អ្នកវិភាគខ្លះបានលើកឡើងថា ទណ្ឌកម្មអាមេរិកអាចបង្កើនតម្រូវការដល់មូលប័ត្រប្រាក់អឺរ៉ូរបស់រុស្ស៊ី ពិសេសដោយសារតែវាបានរក្សាក្រុងម៉ូស្គូឲ្យនៅឆ្ងាយពីទីផ្សារមូលប័ត្រអន្តរជាតិ។
គម្រោងថាមពលថ្មីៗ
ជាងការដាក់ទណ្ឌកម្មរបស់អាមេរិក រុស្ស៊ីនៅតែត្រូវដោះស្រាយជាមួយការដួលរលំតម្លៃប្រេងឆ្នាំ ២០១៤។ ក្រៅពីកិច្ចព្រមព្រៀងជាមួយ OPEC រុស្ស៊ីក៏បានចាប់ផ្តើមលើគម្រោងដែលនឹងជួយផ្តល់កម្លាំងឧស្សាហកម្មប្រេងឡើងវិញដែរ។ គម្រោងមួយជាពិសេសនោះគឺការចូលហ៊ុនរបស់ក្រុមហ៊ុនប្រេង Rosneft នៅ Kurdistan ដោយបង្កើតគម្រោងដែលមានតម្លៃ ៤០០ លានដុល្លារ។ ប្រធានាធិបតី ពូទីន បានមើលឃើញការចូលហ៊ុននេះថា ជាផលប្រយោជន៍សេដ្ឋកិច្ចសម្រាប់រុស្ស៊ី Kurdistan និងអ៊ីរ៉ាក់។ ដោយមានព្រឹត្តិការណ៍ជាច្រើនកំពុងកើតឡើងនៅរុស្ស៊ី ពួកគេនៅតែទទួលបន្ទុកធ្ងន់លើការងើបចេញពីវិបត្តិសេដ្ឋកិច្ចរបស់គេកាលពីប៉ុន្មានឆ្នាំមុន។ ពួកគេឥឡូវនេះកំពុងប្រើប្រាស់មធ្យោបាយដើម្បីវិលទៅរកស្ថិរភាពហិរញ្ញវត្ថុវិញសម្រាប់ប្រទេសរបស់គេ ដែលកំពុងបង្ហាញឡើងថា មានប្រសិទ្ធភាព៕
(ប្រភព៖ IPP Review ចុះថ្ងៃ២១ ខែមករា ឆ្នាំ២០១៨)
No comments:
Post a Comment