ក្រសួងការងាររៀបចំ សិក្ខាសាលាស្តីពីយុទ្ធសាស្ត្រសុវត្ថិភាពចរាចរណ៍ សម្រាប់គាំពារកម្មករនិយោជិតវិស័យកាត់ដេរសម្លៀកបំពាក់ និងផលិតស្បែកជើង

នៅថ្ងៃច័ន្ទ៦កើត ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២២ ខែមករា ឆ្នាំ២០១៨ លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញជាអធិបតីភាពក្នុងសិក្ខាសាលាជាមួយអ្នកពាក់ព័ន្ធស្តីពី យុទ្ធសាស្ត្រសុវត្ថិភាពចរាចរណ៍សម្រាប់គាំពារកម្មករនិយោជិត វិស័យកាត់ដេរសម្លៀកបំពាក់ និងផលិតស្បែកជើង នៅសណ្ឋាគារកាំបូឌីយ៉ាណា ដែលមានអ្នកចូលរួមប្រមាណជា ១៥០នាក់ មកពីស្ថាប័នផ្សេងៗ ដែលរៀបចំដោយ អង្គការមូលនិធិបង្ការរបួសអាស៊ី(AIP)។

កម្មវិធីសិក្ខាសាលានេះ ធ្វើឡើងក្នុងគោលបំណង ដើម្បីកាត់បន្ថយគ្រោះថ្នាក់ចរាចរណ៍របស់កម្មករនិយោជិត និងផ្សព្វផ្សាយដល់ម្ចាស់រថយន្តដឹកកម្មករឲ្យយល់ដឹងពីវិធីសាស្រ្តការពារសុវត្ថិភាពដល់អ្នកធ្វើដំណើរជាមួយ និងបានបង្ហាញអំពីយុទ្ធសាស្ត្រលើ សុវត្ថិភាពចរាចរណ៍សម្រាប់គាំពារកម្មករនិយោជិតវិស័យកាត់ដេរសម្លៀកបំពាក់ និងផលិតស្បែកជើង ហើយមិនត្រឹមប៉ុណ្ណោះកម្មវិធីនឹងមានការប្រជុំពិភាក្សាជាក្រុម អំពីការបញ្ជូលយុទ្ធសាស្រ្តទៅក្នុងសកម្មភាពជាក់លាក់លើការសហការដើម្បីធ្វើឲ្យការគ្រប់គ្រង និងគណនេយ្យភាពលើសុវត្ថិភាពចរាចរណ៍កាន់តែប្រសើរឡើង (ទិសដៅយុទ្ធសាស្រ្ត ១) សុវត្ថិភាពយានយន្ត (ទិសដៅយុទ្ធសាស្រ្ត២) សុវត្ថិភាពហេដ្ឋារចនាសម្ព័ន្ធ (ទិសដៅយុទ្ធសាស្ត្រ ៣) និងសុវត្ថិភាពអ្នកប្រើប្រាស់ផ្លូវ (ទិសដៅយុទ្ធសាស្រ្ត៤)។

លោករដ្ឋមន្ត្រី អ៊ិត សំហេង បានថ្លែងអរគុណចំពោះអង្គការ AIP និងស្ថាប័នពាក់ព័ន្ធផងដែរ ដែលបានសហការជម្រុញឲ្យកម្មវិធីនេះបានដំណើរការដោយរលូន និងបានលើកទឹកចិត្តដល់អ្នកបើកបររថយន្តដឹកកម្មករទាំងអស់ឲ្យប្រុងប្រយ័ត្ន និងត្រូវពិនិត្យមើលរថយន្តរបស់ខ្លួនឲ្យបានជាប្រចាំ៕