លោកនាយករដ្ឋមន្រ្តី ហ៊ុន សែន ស្នើឱ្យសិល្បៈការិនីទាំងអស់បញ្ឈប់ការលើកឡើងថា មានអ្នកធំ ឬឧកញ៉ាជាច្រើនតាមស្រឡាញ់ខ្លួន

ដោយសារតែមានការលើកឡើងជារឿងៗពីមាត់សិល្បៈការិនីខ្មែរថា មានអ្នកធំឬឧកញ៉ាច្រើនណាស់តាមស្រឡាញ់ខ្លួននោះ លោកនាយករដ្ឋមន្រ្តី ហ៊ុន សែន បានស្នើសុំដល់សិល្បការិនីល្បីៗទាំងអស់ទម្លាយឈ្មោះមន្ត្រីធំៗ ឬឧកញ៉ាៗដែលតាមទាក់ទងខ្លួន ក្នុងន័យលួចលាក់ឱ្យដឹងជាសាធារណៈ កុំលើកឡើងជារួមព្រោះវានឹងប៉ះពាល់ដល់កិត្តិយសមន្រ្តីធំៗ និងឧកញ៉ាល្អៗជាច្រើនទៀត។

លោកបានថ្លែងដូចនេះ ក្នុងឱកាសជួបសំណេះសំណាល និងពិសារអាហារសាមគ្គីជាមួយអ្នកសារព័ត៌មានជាតិលើកទី២ ដែលមានអ្នកចូលរួមប្រមាណ ៣,៤០០នាក់ ក្នុងនោះមានមន្រ្តី និងអ្នកនាំពាក្យក្រសួងព័ត៌មាន ជាច្រើនរូបចូលរួមផងដែរ នៅមជ្ឈមណ្ឌលសន្និបាត និងពិពរណ៌កោះពេជ្រ រាជធានីភ្នំពេញនៅល្ងាចថ្ងៃអាទិត្យ ៥កើត ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២១ ខែមករា ឆ្នាំ២០១៨។

លោកនាយករដ្ឋមន្រ្តី ហ៊ុន សែន បានមានប្រសាសន៍ថា កន្លងមកក្មួយៗតារាៗជានារីដែលឡើងតាមកញ្ចក់ទូរទស្សន៍ និងការសម្ភាសន៍ និងវិទ្យុនានា ឬក៏ការចុះផ្សាយតាមសារព័ត៌មានតែងតែមានមួយចំនួនអះអាងថាអ្នកធំៗ និងឧកញ៉ាតាមស្រឡាញ់ខ្លួនច្រើនណាស់។ លោកបានលើកឡើងជាសំនួរថា តើការដែលនារីតារាៗលើកឡើងថាមានអ្នកធំជាច្រើនណាស់តាមស្រឡាញ់ខ្លួននោះ តើជាការពិត ឬជាការប្រឌិតគ្រាន់តែចង់ល្បីឈ្មោះ។

លោកនាយករដ្ឋមន្រ្តី ហ៊ុន សែន បានស្នើសុំដល់នារីតារាៗទាំងអស់ សូមបញ្ឈប់ការនិយាយដែលអាចប៉ះពាល់ដល់កិត្តិយសរបស់អុ្នកធំ ឬឧកញ៉ាទូទៅ ហើយនេះមិនមែនជាការជេរស្តីទេបើអាចឈប់និយាយបានឈប់ទៅ។ លោកបានបន្ថែមថា លោកមិនស្អប់ខ្ពើមឬធុញទ្រាន់នឹងតារាណាមួយនោះទេ ប៉ុន្តែលោកជ្រិញជាមួយនឹងអ្នកទំយើរខ្លួន អួតថាមានអ្នកធំ ឬឧកញ៉ាច្រើនណាស់តាមស្រឡាញ់ខ្លួន ហើយការលើកឡើងដូចនេះ មិនមែនជារឿងដែលល្អមានប្រយោជន៍សម្រាប់ខ្លួនឯងនោះទេ៕