កាកបាទក្រហមខណ្ឌមានជ័យ ចុះសួរសុខទុក្ខដល់កម្មករកម្មការិនីរោងចក្រចំនួន៣០គ្រួសារ នៅសង្កាត់ស្ទឹងមានជ័យទី៣

ក្រុមការងារអនុសាខាកាកបាទក្រហមកម្ពុជា ខណ្ឌមានជ័យ ដឹកនាំដោយ លោក ឌី រ័ត្នខេមារុណ ប្រធានគណៈកម្មាធិការអនុសាខា បានចុះសំណេះសំណាលសាកសួរសុខទុក្ខដល់បងប្អូនកម្មករ កម្មការិនីរោងចក្រចំនួន៣០គ្រួសារ រស់នៅភូមិឬស្សីទី២ សង្កាត់ស្ទឹងមានជ័យទី៣ នៅថ្ងៃអាទិត្យ ៥កើត ខែមាឃ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី២១ ខែមករា ឆ្នាំ២០១៨។
នាឱកាសនោះ ប្រធានគណៈកម្មាធិការអនុសាខា បានពាំនាំនូវបណ្តាំផ្ញើសាកសួរសុខទុក្ខពីសំណាក់លោកស្រីប្រធាន ប៊ុន រ៉ានី ហ៊ុន សែន ជូនដល់បងប្អូនកម្មករ កម្មការិនីទាំងអស់ប្រកបដោយសេចក្តីនឹករលឹក ព្រមទាំងសូមឲ្យបងប្អូនទាំងអស់ត្រូវយកចិត្តទុកដាក់គិតគូរពីសុខភាព បរិភោគចំណីអាហារដែលមានជីវជាតិ និងសូមប្រុងប្រយ័ត្នបង្ការចំពោះគ្រោះអគ្គីភ័យ ព្រមទាំងបើកបរត្រូវគោរពច្បាប់ចរាចរណ៍ ។

ជាមួយគ្នានោះ ក្រុមការងារបាននាំយកអំណោយមនុស្សធម៌មកផ្តល់ជូនក្នុង១គ្រួសារៗទទួលបាន អង្ករ១បាវ មី១កេស ទឹកត្រី១យួរ ទឹកស៊ីអ៊ីវ១យួរ ទឹកសុទ្ធ១យួរ និងថវិកាចំនួន២ម៉ឺនរៀល ៕