តើសារព័ត៌មានបែបណាដែលសង្គមនិងប្រជាពលរដ្ឋចង់បាន?

លោកនាយករដ្ឋមន្រ្តី ហ៊ុន សែ​ន បានស្នើដល់ស្ថាប័នសារព័ត៌មានទាំងរដ្ឋ និងឯកជនត្រូវស្វះស្វែងតាមប្រមាញ់ផ្ដិតយករូបភាព និងសកម្មភាពរបស់ស្ថាប័នរដ្ឋឱ្យបានត្រឹមត្រូវហើយត្រូវចេះ​ពាំនាំទុក្ខលំបាករបស់ប្រជាពលរដ្ឋ​មកផ្សព្វផ្សាយប្រាប់ស្ថាប័នរដ្ឋវិញដើម្បីឱ្យស្ថាប័នពាក់ព័ន្ធទាំងនោះចាត់វិធានការដោះស្រាយទាន់ពេលវេលា។ លោកបានថ្លែងដូចនេះក្នុងឱកាសជួបសំណេះសំណាល និងពិសារអាហារសាមគ្គីជាមួយអ្នកសារព័ត៌មានជា​តិលើកទី២ ដែលមានអ្នកចូលរួមប្រមាណ ៣,៤០០នាក់ ក្នុងនោះមានមន្រ្តី និងអ្នកនាំពាក្យក្រសួងព័ត៌មានជាច្រើនរូបចូលរួមផងដែរនៅមជ្ឈមណ្ឌលសន្និបាត និងពិពរណ៌កោះពេជ្រ រាជធានីភ្នំពេញនៅល្ងាចថ្ងៃអាទិត្យ ៥កើត ខែមាឃ ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២១ ខែមករា ឆ្នាំ២០១៨។

លោកនាយករដ្ឋមន្ត្រី ហ៊ុន សែន បានផ្ដាំផ្ញើដល់អ្នកសារព័ត៌មានទាំងអស់ មិនថាសារព័ត៌មានរដ្ឋ ឬឯកជននោះទេត្រូវធ្វើយ៉ាងណាប្រឹងប្រែងស្វះស្វែងតាមប្រមាញ់រកព័ត៌មានដោយខ្លួនឯង និងត្រឹមត្រូវគ្រប់ជ្រុងជ្រោយទើបក្លាយជាអ្នកសារព័ត៌មានចំណាន។ ប្រមុខដឹកនាំរាជរដ្ឋាភិបាល ក៏បានស្នើដល់សារព័ត៌មាននូវសំណូមពរមួយចំនួនដែលលោកចង់បានរួមមាន៖

ទី១- ចង់បានស្ថាប័នព័ត៌មានទាំងរដ្ឋ និងឯកជន ត្រូវបំពេញឱ្យបាននូវតួនាទីជាកញ្ចក់ឆ្លុះបញ្ចាំ​ងនូវស្ថានភាពពិតប្រាកដក្នុងសង្គមដាច់ខាតសារព័ត៌មានមិនត្រូវក្លាយជាកញ្ចក់បែកនោះឡើ​យ ព្រោះវាអាចជះឥទ្ធិពលដ៏អាក្រក់ចំពោះសង្គមកម្ពុជា ដូច្នេះទាំងសារព័ត៌មានរដ្ឋ និងឯកជនត្រូវមានតម្លាភាពដើម្បីធ្វើជាកញ្ចក់ឆ្លុះបញ្ចាំងជាមួយគ្នា។

ទី២- ចង់បានព័ត៌មានមួយដែលជួយផ្ដល់ព័ត៌មានពីស្ថាប័នរដ្ឋទៅឱ្យប្រជាពលរដ្ឋ និងពីប្រជាពលរដ្ឋមកស្ថាប័នរដ្ឋវិញពោលសារព័ត៌មាន និងស្ថាប័នរដ្ឋត្រូវជួយគ្នាទៅវិញទៅមកដើម្បីជួយជ្រោមជ្រែងសង្គមកម្ពុជាមួយនេះឱ្យកាន់តែរីកចម្រើន។ សារព័ត៌មានមានសារៈសំខាន់ខ្លាំងណាស់រវាងគោលនយោបាយរបស់រដ្ឋជាមួយប្រជាពលរដ្ឋ ដូច្នេះលោកនាយករដ្ឋមន្រ្តី ហ៊ុន សែន បានស្នើឱ្យស្ថាប័នព័ត៌មាន និងស្ថាប័នរដ្ឋ ជួយបំពេញគ្នាទៅវិញទៅមកតាមរយៈការប​ញ្ជូនសារទាក់ទងទៅនឹងក្របខណ្ឌគោលនយោបាយរបស់រដ្ឋទៅដល់ប្រជាពលរដ្ឋ ហើយនាំទុក្ខកង្វល់របស់ប្រជាពលរដ្ឋប្រាប់មកស្ថាប័នរដ្ឋវិញដោយឆ្លុះបញ្ចាំងការពិតជាក់ស្ដែង។

ទី៣- ចង់បានព័ត៌មានចេះជួយរិះគន់ក្នុងន័យស្ថាបនាចេះជួយតាមពិនិត្យការអនុវត្តរបស់ស្ថាប័នរដ្ឋ ដោយប្រៀបធៀបជាមួយនឹងនយោបាយ ឬកម្មវិធីដែលបានដាក់ចេញព្រោះនេះជាចំណុ​ចមិនអាចខ្លះបាននៅក្នុងសង្គមប្រជាធិបតេយ្យ។

ទី៤- ចង់បានស្ថាប័នព័ត៌មាន ដែលមានលទ្ធភាពចូលរួមវិភាគយុទ្ធសាស្ត្រនយោបាយ ក្នុងក្រ​ប​ខណ្ឌជាតិ និងអន្តរជាតិ។ លោកនាយករដ្ឋមន្រ្តី ហ៊ុន សែន បានលើកឡើងថា កុំឱ្យសារព័​ត៌មានអន្តរជាតិសរសេរពីកម្ពុជា អ្នកសារព័ត៌មានកម្ពុជាគួរតែសរសេរពីអន្តរជាតិវិញម្ដង ហើយគ្រប់មជ្ឈដ្ឋានទាំងអស់ត្រូវគោរពសេរីភាពនៃសារព័ត៌មានប៉ុន្តែអ្នកសារព័ត៌មានខ្លួនឯង ក៏ត្រូវហ៊ានទទួលខុសត្រូវចំពោះការសរសេរ និងពាក្យសម្ដីរបស់ខ្លួនផងដែរ៕