សារព័ត៌មាន Bernama បានរាយការណ៍ថា នាយករដ្ឋមន្ត្រីលោក Najib Razak បាននិយាយថា ការផ្លាស់ប្តូររដ្ឋាភិបាលអាចនាំឲ្យមានមហន្តរាយ ដោយនិយាយថា ការផ្លាស់ប្តូរមិនធានាដល់អភិបាលកិច្ចល្អប្រសើរនោះទេ ហើយបានចង្អុលដល់ប្រទេសអ៊ីរ៉ាក់នៅក្រោយលោក Saddam Hussein មកធ្វើជាឧទាហរណ៍។
លោក Najib បាននិយាយថា “គ្រូពេទ្យរបស់ខ្ញុំនៅវិទ្យាស្ថានបេះដូងជាតិបានប្រាប់ខ្ញុំអំពីអ្នកជម្ងឺជាតិអ៊ីរ៉ាក់ម្នាក់ដែល នៅពេលសួរថា តើវាល្អប្រសើរ ឬអត់កាលពីពេលមុន និងពេលនេះនៅប្រទេសអ៊ីរ៉ាក់ អ្នកជម្ងឺនោះបាននិយាយថា សូម្បីតែស្ថិតនៅក្រោមប្រធានាធិបតី Saddam Hussein ដែលត្រូវបានគេស្អប់នោះ យ៉ាងហោចណាស់ ពួកគេមានអាហារហូប ក្មេងៗអាចទៅសាលារៀន និងប្រទេសមានសុវត្ថិភាពដែរ”។
លោក Najib បាននិយាយនៅពេលបើកសន្និសីទ Lipis Umno ថា “ប៉ុន្តែ សូមក្រឡែកមើលពេលនេះ គឺអ្វីៗទាំងអស់ត្រូវបំផ្លាញ។ ការផ្លាស់ប្តូររដ្ឋាភិបាលបច្ចុប្បន្នមិនធានាដល់អភិបាលកិច្ចល្អប្រសើរនោះទេ”។
លោក Najib បាននិយាយថា ប្រជាជនម៉ាឡេស៊ីគួរតែរៀនសូត្រពីការងើបបះបោរនៅពិភពអារ៉ាប់ ដែលបានធ្វើឲ្យប្រទេសនៅមជ្ឈឹមបូព៌ាជាច្រើន រាប់បញ្ចូលទាំងអ៊ីរ៉ាក់ កំពុងជួបចលាចល។
នាយករដ្ឋមន្ត្រីរូបនោះបាននិយាយថា “ការផ្លាស់ប្តូររដ្ឋាភិបាលមិនមែនជាដំណោះស្រាយនោះទេ។ ប្រសិនបើផ្លាស់ប្តូរទៅល្អ វាមិនអីនោះទេ។ ប៉ុន្តែប្រសិនបើវាមិនល្អ វានាំឲ្យមានមហន្តរាយកាន់តែខ្លាំង និងមានភាពមិនប្រាកដប្រជាកាន់តែខ្លាំង។ បើវាកើតឡើងដូចនោះមែន វាគឺជារឿងឆ្កួតលីលាមួយ។ សុំទោស ដែលខ្ញុំនិយាយវាឡើង”។
Najib កំពុងតែរិះគន់បក្សប្រឆាំង ដែលកំពុងខិតខំក្នុងការផ្តួលបក្ស Barisan Nasional នៅក្នុងការបោះឆ្នោតជាតិខាងមុខ ដែលមានលោក Najib ជាសត្រូវដ៏ធំ ដោយមានការដឹកនាំធ្វើរឿងនោះដោយបណ្ឌិត Mahathir Mohamad។
អតីតនាយករដ្ឋមន្ត្រីរូបនោះ (Mahathir) នៅពេលថ្មីៗនេះត្រូវបានគេតែងតាំងជាប្រធានរបស់ក្រុមចម្រុះរបស់បក្សប្រឆាំង Pakatan Harapan ដែលទើបបានចាប់ដៃគ្នាជាផ្លូវការ។
ក្រុមចម្រុះនោះបានបើកយុទ្ធនាការទូទាំងប្រទេសដើម្បីនាំយករឿងអាស្រូវ 1MDB ទៅកាន់ប្រជាជន ជាពិសេសនៅតាមតំបន់ជនបទ។ ថ្នាក់ដឹកនាំរបស់ Pakatan បាននិងកំពុងចុះតាមមូលដ្ឋានដើម្បីនិយាយទៅកាន់ពលរដ្ឋ តាមរយៈវេទិការសាធារណៈ និងការជជែកគ្នាអំពីអំពើពុករលួយ និងការដែលវាបានប៉ះពាល់ដល់ពលរដ្ឋគ្រប់រូប។
ក្រសួងយុត្តិធម៌អាមេរិកបានដាក់ពាក្យបណ្តឹងជាច្រើនដើម្បីរឹបអូសទ្រព្យសម្បត្តិដែលមានតម្លៃប្រាក់រាប់ពាន់លាន ringgit ដែលទ្រព្យសម្បត្តិនោះត្រូវបានទិញឡើងដោយប្រាក់លួចចេញពីការវិនិយោគរបស់រដ្ឋ ដោយបានភ្ជាប់លោក Najib ទៅនឹងរឿងអាស្រូវនោះ ដែលរាប់បញ្ចូលទាំងការលាងប្រាក់ដែលលួចបាននោះ។ ប្រាក់ដែលកេងប្រវ័ញ្ចនោះត្រូវបានលាងសម្អាតតាមរយៈប្រព័ន្ធហិរញ្ញវត្ថុអាមេរិក។ ក្រសួងយុត្តិធម៌អាមេរិកបានចោទប្រកាន់ថា ប្រាក់នោះត្រូវបានលួចបង្ហូរចេញពី 1MDB ដើម្បីផ្តល់ផលប្រយោជន៍ដល់គ្រួសារ និងអ្នកក្រោមឱវាទរបស់នាយករដ្ឋមន្ត្រី Najib ដែលគ្រប់គ្រង និងជាប្រធានដល់មូលនិធិរដ្ឋ ដែលបានបង្កើនប្រាក់បំណុលរហូតដល់ចំនួន ៥០ ពាន់លាន ringgit។
ក្នុងចំណោមទ្រព្យសម្បត្តិនោះ ក្រសួងយុត្តិធម៌អាមេរិកបានដាក់ពាក្យបណ្តឹងដើម្បីរឹបអូសអចលនទ្រព្យធំមួយនៅអាមេរិក ផ្ទាំងគំនូរកម្រៗជាច្រើន ទូកក្តោងមួយ និងខ្សែករដែលមានពេជ្យពណ៌ផ្កាឈូកត្រូវបានគេផ្តល់ឲ្យប្រពន្ធរបស់ “មន្ត្រីថ្នាក់ម៉ាឡេស៊ីថ្នាក់លេខ ១” ដែលរដ្ឋមន្ត្រីនៅក្នុងគណៈរដ្ឋមន្ត្រីរបស់នាយករដ្ឋមន្ត្រីបានអះអាងថា ជាលោក Najib៕
ប្រភព៖ The Malaysia Insight ចុះថ្ងៃ៣១ ខែកក្កដា ឆ្នាំ២០១៧
No comments:
Post a Comment