អ៊ីរ៉ង់ និ​ងហុង​គ្រីចាប់​អារម្មណ៍​លើការ​បង្កើនទំនាក់​ទំនង​សេដ្ឋកិច្ច

ប្រទេសអ៊ីរ៉ង់ និងហុងគ្រី បានបញ្ជាក់ពីភាពចាំបាច់ក្នុងការពង្រីកកិច្ចសហប្រតិបត្តិការរវាងគ្នានិងគ្នា ពិសេសនៅក្នុងវិស័យសេដ្ឋកិច្ចពាណិជ្ជកម្ម។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មានចិនស៊ីនហួកាលពីម្សិលមិញ ។

ប្រធានសភាអ៊ីរ៉ង់លោក Ali Larijani បាននិយាយក្នុងកិច្ចប្រជុំជាមួយឧបនាយករដ្ឋមន្ត្រីហុងគ្រីលោក Zsolt Semjen ដែលកំពុងបំពេញទស្សនកិច្ចថា ភាគីទាំងពីរមានការចាប់អារម្មណ៍ចំពោះការធ្វើឱ្យប្រសើរឡើងនៃទំនាក់ទំនងស្ថាប័នសភានិងផ្នែកសេដ្ឋកិច្ច ជាពិសេសនៅពេលនេះបានកំណត់ពីការបង្កើនប្រតិបត្ដិការពាណិជ្ជកម្មជាមួយប្រទេសហុងគ្រី។
ភាគីហុងគ្រី លោក Semjen បានបញ្ជាក់ពីសមត្ថភាពរបស់អ៊ីរ៉ង់ក្នុងការទាក់ទាញការវិនិយោគពីក្រុមហ៊ុនហុងគ្រី និងថាយើងស្វាគមន៍ចំពោះការពង្រីកទំនាក់ទំនងក្នុងវិស័យកសិកម្មនិងថាមពលថ្មី។
លោកបានបន្ថែមថា ហុងគ្រីនៅតែឈរខាងអ៊ីរ៉ង់អំឡុងពេលដ៏លំបាកនៃការដាក់ទណ្ឌកម្មនុយក្លេអ៊ែរ។
សូមជម្រាបផងដែរ កាលពីថ្ងៃសៅរ៍ប្រទេសអ៊ីរ៉ង់ និងប្រទេសហុងគ្រីបានចុះហត្ថលេខាលើអនុស្សរណៈនៃការយោគយល់គ្នា ដើម្បីធ្វើកិច្ចសហប្រតិបត្តិការក្នុងវិស័យបច្ចេកវិទ្យានុយក្លេអ៊ែរ៕