លោកឧបនាយករដ្ឋមន្រ្តី​ ស ខេង​ អញ្ជើញជា​អធិបតីភាព​ក្នុងពិធី​សំណេះសំណាល​ជាមួយ​បងប្អូនអតីត​យុទ្ធជន​

នៅថ្ងៃទី១១ ខែមេសា ឆ្នាំ២០១៧នេះ លោកឧបនាយករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ អញ្ជើញជាអធិបតីភាពក្នុងពិធីសំណេះសំណាលជាមួយបងប្អូនអតីតយុទ្ធជនចំនួន ២១៤នាក់ ដែលធ្លាប់បានតស៊ូ ក្នុងបុព្វហេតុជាតិមាតុភូមិ ហើយរាជរដ្ឋាភិបាលកម្ពុជា តែងយកចិត្តទុកដាក់យ៉ាងខ្លាំងចំពោះបងប្អូនអតីតយុទ្ធជន និងគ្រួសារ ដែលធ្លាប់បានលះបង់កម្លាំងកាយចិត្ត។

លោកលើកឡើងបែបនេះ ក្នុងពិធីសំណេះសំណាលជាមួយបងប្អូនអតីតយុទ្ធជនចំនួន ២១៤នាក់ ដែលធ្លាប់បានតស៊ូ  ប្រយុទ្ធក្នុងសមរភូមិដើម្បីដណ្តើមយកសន្តិភាពជូនប្រទេសជាតិ (ស្រុកកំចាយមារ ខេត្តព្រៃវែង និងស្រុកពញាក្រែក ខេត្តត្បូងឃ្មុំ) ។

នៅក្នុងពិធីនេះផងដែរ ក៏មានវត្តមានលោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា លោក លោកស្រី គណៈប្រតិភូអមដំណើរ អស់លោក លោកស្រី បងប្អូនអតីតយុទ្ធជន និងគ្រួសារអតីតយុទ្ធជន សរុបប្រមាណ ៣០០នាក់។ នាឱកាសនោះលោកឧបនាយករដ្ឋមន្ត្រី ក៏បានឧបត្ថម្ភថវិកាជូនដល់បងប្អូនអតីតយុទ្ធជនចំនួន ២១៤នាក់ ដោយម្នាក់ៗទទួលបានថវិកា ១២ម៉ឺនរៀល ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ដែលខិតជិតមកដល់នៅពេលដ៏ឆាប់ខាងមុខនេះ៕