រដ្ឋមន្រ្តីក្រសួង​ព័ត៌​មានបាន​ជំរុញ​ឲ្យក្រុម​អ្នកសារព័ត៌​មាន​ជួយផ្សព្វផ្សាយ​បន្តពីខ្លឹម​សារច្បាប់​​គណបក្សនយោ​បាយ

ក្រសួងព័ត៌មាន នៅថ្ងៃទី១០ ខែមេសា ឆ្នាំ២០១៧ បានរៀបចំសិក្ខាសាលាផ្សព្វផ្សាយស្តីពីខ្លឹមសារវិសោធនកម្មនៃច្បាប់គណបក្សនយោបាយដល់មន្រ្តីក្រោមឱវាទនៅទីស្តីការក្រសួងព័ត៌មាន។

លោក ខៀវ កាញារីទ្ធ រដ្ឋមន្រ្តីក្រសួងព័ត៌មានបានជំរុញឲ្យក្រុមអ្នក សារព័ត៌មានតាមបណ្តាញផ្សព្វផ្សាយទំាងអស់ឲ្យជួយផ្សព្វផ្សាយបន្តពីខ្លឹមសារច្បាប់គណបក្សនយោបាយដោយបញ្ជ្រៀបពេលផ្សាយព័ត៌មានឬកម្មវិធីតាមទូរទស្សន៍វិទ្យុជាដើម។
ការជំរុញឲ្យមានការជួយផ្សព្វផ្សាយច្បាប់នេះគឺធ្វើយ៉ាងណាដើម្បីកុំអោយប្រជាពលរដ្ឋយល់ច្រលំផ្ទុយពីខ្លឹមសារ ច្បាប់ ខណៈដែលបុគ្គលមួយចំនួនបានចាត់ទុកច្បាប់នេះមានលក្ខណៈរឹតត្បិត កៀបសង្កត់ និងជ្រៀតជ្រែកកិច្ចការផ្ទៃក្នុងរបស់គណបក្សនយោបាយ។
លោកស៊ា ម៉ៅ សមាជិកក្រុមប្រឹក្សាអ្នកច្បាប់នៃទីស្តីការគណៈរដ្ឋមន្រ្តីបានបញ្ជាក់ថា អ្នកសារព័ត៌មានគឺជាភ្នាក់ងារដល់សំខាន់ដែលអាចជួយផ្សព្វផ្សាយច្បាប់នេះជូនដល់ប្រជាពលរដ្ឋឲ្យកាន់តែយល់ដឹង ពីច្បាប់ហើយឈានទៅអនុវត្តច្បាប់អោយបានត្រឹមត្រូវនៅក្នុងសង្គមប្រជាធិបតេយ្យ។
សូមបញ្ជាក់ថា ច្បាប់ស្តីពីគណបក្សនយោបាយមាន៥៥មាត្រាដែលត្រូវបានរដ្ឋសភាអនុម័តនៅថ្ងៃទី ២០កុម្ភៈ និងប្រកាសឲ្យប្រើប្រាស់ជាផ្លូវការនៅថ្ងៃទី៧ ខែមីនា ឆ្នាំ២០១៧ ថ្មីៗនេះ៕