ការងារសហគមន៍អាជ្ញាធរជាតិអប្សរាបានចុះអនុញ្ញាតជួសជុលផ្ទះ និងសាងសង់ សំណង់ស្រាលចំនួន១២១ ករណីក្នុងត្រីមាសទី១ ឆ្នាំ២០១៧

ក្រៅពីការងារអភិរក្ស រៀបចំ គ្រប់គ្រង និងអភិវឌ្ឍន៍តំបន់អង្គរប្រកបដោយចីរភាព អាជ្ញាធរជាតិអប្សរាតាមរយៈក្រុមការងារសហគមន៍ បានចុះសួរសុខទុក្ខ អប់រំ ស្តាប់សំណូមពរ ផលលំបាកនិងជួយដោះស្រាយបញ្ហាជូនបងប្អូនប្រជាជនដោយផ្ទាល់ដល់មូលដ្ឋាន។
យោងតាមរបាយការណ៍រយៈពេល៣ខែនៃឆ្នាំ២០១៧នេះ អាជ្ញាធរជាតិអប្សរាបាន ចុះទៅ ផ្សព្វផ្សាយនិងសួរសុខទុក្ខប្រជាជនក្នុងតំបន់អង្គរបានចំនួន១០ភូមិដែលមានប្រជាជនចូលរួម៥៩៤នាក់។
ក្រុមការងារសហគមន៍នៃអាជ្ញាធរជាតិអប្សរាបានចុះពិនិត្យនិងអនុញ្ញាត សំណើសុំសាង សង់សំណង់តូចតាច និងជួសជុលផ្ទះជូនប្រជាពលរដ្ឋដល់មូលដ្ឋានផ្ទាល់បានចំនួន ១២១ ករណី ដូចជា ជួសជុលផ្ទះ ជួសជុលដំបូលផ្ទះ ជួសជុលជញ្ជាំងផ្ទះ ប្តូរសសរផ្ទះ កឥដ្ឋក្រោមផ្ទះ សាងសង់ បង្គន់ ចាក់ដី និងសាងសង់តូបលក់ដូរ ដោយមិនបាច់ធ្វើលិខិតស្នាមសុំបែបបទសាងសង់ ឬជួសជុលមកទីស្នាក់ការអាជ្ញាធរជាតិ អប្សរា។
ក្រៅពីនោះ ការងារស្នូលរបស់ក្រុមការងារសហគមន៍ ចុះផ្សព្វផ្សាយអំពីភារកិច្ចរបស់ អាជ្ញាធរជាតិអប្សរា និងអប់រំបេតិកភណ្ឌដល់ប្រជាជនក្នុងតំបន់អង្គរបានយល់ច្បាស់ពីតម្លៃនៃ មរតកវប្បធម៌ ដូនតារបស់ខ្លួនមានតាំងពីប្រាង្គប្រាសាទទំនៀមទម្លាប់ការរស់នៅ ការគោរពបូជា នូវជំនឿ ផ្សេងៗដែលធ្វើជាប្រចាំថ្ងៃតពីដូនតាមក។
ជាមួយគ្នានោះអាជ្ញាធរជាតិអប្សរាបានចុះសួរសុខទុក្ខនិងពាំនាំនូវកញ្ចប់សុខុមាលភាពម្តាយនិងទារកទៅឧបត្ថម្ភជូនស្រ្តីទើបសម្រាលកូនរួចក្នុងឧទ្យានអង្គរបានចំនួន៣៩៩។ បន្ថែមលើការ ងារសង្គមអាជ្ញាធរជាតិអប្សរាក៏បាននាំយកនូវថវិកាចំនួន ១ លានរៀលទៅជូនអាជ្ញាធរមូលដ្ឋាន ភូមិថ្នល់ត្រង់ ឃុំរលួស ដើម្បីជួសជុលសាលាឆទានឡើងវិញ និងថវិកាចំនួន ២ លានរៀល ទៀតទៅឧបត្ថម្ភមេឃុំស្វាយចេក ដែលរងគ្រោះដោយភ្លើងឆេះផ្ទះ នៅភូមិគោកថ្មី ឃុំស្វាយចេក ស្រុកអង្គរធំ ព្រមទាំងថវិកាចំនួន១,២៩០,០០០រៀល ដើម្បីចូលរួមក្នុងពិធីបុណ្យឆ្លងកុដិថ្មី នៅវត្តរុន ឃុំរុនតាឯក ស្រុកបន្ទាយស្រី។ ក្នុងនោះដែរ អាជ្ញាធរជាតិអប្សរាក៏បាននាំយកអំណោយជាស័ង្កសី ចំនួន២០ សន្លឹកទៅឧបត្ថម្ភដែលមានជីវភាព ខ្វះខាតនៅភូមតាត្រៃ ឃុំព្រះដាក់ ស្រុកបន្ទាយស្រី ដើម្បីប្រក់ដំបូងផ្ទះ។
ស្តែងចេញពីសកម្មភាពទាំងនេះ ក្រុមការងារសហគមន៍អាជ្ញាធរជាតិអប្សរាតែងតែចុះទៅ តាមគោលដៅរបស់ខ្លួនដល់ខ្នងផ្ទះប្រជាពលរដ្ឋជារៀងរាល់ ដើម្បីដោះស្រាយបញ្ហាមួយចំនួនជូន ដល់ពួកគាត់។ អាជ្ញាធរជាតិអប្សរា តែងតែនៅក្បែរនិងយកចិត្តទុកដាក់គ្រប់បញ្ហា ចំពោះ ប្រជាពលរដ្ឋទាំងសុខទុក្ខ ទាំងជីវភាពរស់នៅ សុខភាព ការសាងសង់ និងការអប់រំ ធ្វើយ៉ាងណាឱ្យ ប្រជាពលរដ្ឋក្នុងតំបន់អង្គរមានសេដ្ឋកិច្ចល្អប្រសើរចំណេះដឹងទូលំទូលាយនិងមានភាពសុខសាន្ត ក្នុងសង្គមគ្រួសារ៕