យោងតាមការផ្សាយរបស់គេហទំព័រ សម្លេង យើង កាលពីថ្ងៃទី២៧ ខែមករា ឆ្នាំ២០១៦ បានបង្ហាញពីឥរិយាបថថ្មីជាវិជ្ជមានរបស់សហរដ្ឋអាមេរិកតាមរយៈដំណើរទស្សនកិច្ចផ្លូវការរបស់លោក John
Kerry បានធ្វើឲ្យមេដឹកនាំគណបក្សសង្គ្រោះជាតិ
និងបក្ខពួកក្នុងឯកសណ្ឋានជាNGO និងអ្នកវិភាគ ឯករាជ្យមានការខកចិត្តយ៉ាងខ្លាំង។
នៅកម្ពុជា
ក្រុមនិន្នាការប្រឆាំងនឹងរាជរដ្ឋាភិបាល ប្រឆាំងនឹងគណបក្សប្រជាជនកម្ពុជា ប្រកាន់ នូវជំហរបរទេសនិយមជា ពិសេសគឺអាមេរិកនិយមតែម្តង ដែលស្រដៀងគ្នានឹងក្រុម
លោកលន់ នល់ /ទ្រង់ស៊ីសុវត្ថិសិរីមតៈនៅឆ្នាំ១៩៦០
និង១៩៧០ប្រឆាំងនឹងរបបរាជានិយម ប្រឆាំងនឹងរាជរដ្ឋាភិបាលសង្គមរាស្ត្រនិយមរបស់សម្តេចឪ។ ជំហរបរទេសនិយមជ្រុលរបស់ក្រុមនិន្នាការប្រឆាំង
កំពុងបន្តដោយពុំមានសតិសម្បជញ្ញៈទទួលយកតថភាពប្រវត្តិសាស្ត្រនយោបាយនៃអតីតកាល ដើម្បីជំនះអតីតកាល
មក រស់ក្នុងបច្ចប្បន្នកាលឡើយ។ បច្ចុប្បន្ននេះ លោក សម រង្ស៊ី និងលោក កឹម សុខា ដឹកនាំធ្វើនយោបាយប្រឆាំងនឹងរាជរដ្ឋាភិបាល ប្រឆាំងនឹងគណបក្សប្រជាជនកម្ពុជា ដោយប្រកាន់យកនូវជំហរបរទេសនិយម
ជ្រុលមកធ្វើជាមូលដ្ឋាននៃនយោបាយអូសទាញអ្នកគាំទ្រ។ ជំហរនយោបាយបែបនេះគឺដោយសារកង្វះជំនឿទុកចិត្តលើសមត្ថភាពរបស់ខ្លួនឯង
ក្នុងការដឹកនាំនយោបាយប្រកួតប្រជែងសម្រាប់បរិបទអភិវឌ្ឍន៍សង្គមជាតិ។
មេដឹកនាំគណបក្សប្រឆាំងនៅកម្ពុជា
ធ្វើនយោបាយតែងតែលើកយកមកសំញ៉ែងពីភាពរីកចម្រើនជឿនលឿននៅស្រុកគេប្រៀបដូចជាឋានសួគ៌ជាពិសេសអួតគ្រប់សព្វបែបយ៉ាងពីសហរដ្ឋអាមេរិក។
ជាក់ ស្តែង លោក កឹម សុខា ធ្លាប់ឃោសនាថានឹងយកប្រជាធិបតេយ្យបែបសហរដ្ឋអាមេរិកមកអនុវត្តនៅ
កម្ពុជា ហើយហ៊ានទាំងអះអាងថាសូម្បីតែកម្មវិធីនយោបាយរបស់បក្សខ្លួនក៏ឲ្យបរទេសជាពិសេសសហរដ្ឋអាមេរិកជួយសរសេរឲ្យដែរ។ រីឯលោក សម រង្ស៊ី ឯណោះវិញមិនដែលបង្ហាញអ្វីពីស្នាដៃរបស់គណបក្សង្គ្រោះជាតិទេ ពោលគឺគាត់ចេះត្រឹមតែរួមគ្នាស្រែកជាមួយលោក
កឹម សុខា នូវពាក្យ"ដូរៗៗ" ប៉ុណ្ណោះ។
ប៉ុន្តែគ្មានអ្វីសំអាងឲ្យល្អប្រសើរ
ជាងការដឹកនាំបច្ចុប្បន្នរបស់ សម្តេច តេជោសែន បន្តិចសោះឡើយ។ ដូច្នេះហើយគឺដោយសារតែគ្មានអ្វីជាទម្ងន់ អាចទាក់ទាញប្រជាពលរដ្ឋ
ទើបមេដឹកនាំគណបក្សប្រឆាំង មានតែប្រើវិធីញុះញង់ អុចអាល បញ្ឆេះកំហឹង ចាក់ដោត លាបពណ៌មួលបង្កាច់បំផ្លើស
បំភ្លៃ។ល។លើសពីនេះទៅទៀតលោក សម រង្ស៊ី ឆ្លៀតយកលទ្ធផលនៃការឈ្នះឆ្នោតរបស់គណបក្សប្រឆាំងនៅប្រទេសផ្សេងៗដូចជាប្រទេសភូមា
ប្រទេសវេណេហ្ស៊ូអេឡា ប្រទេសអាហ្សង់ទីន ប្រទេសកាណាដានិងប្រទេសតៃវ៉ាន់ មកអន្ទងចិត្តប្រជាពលរដ្ឋខ្មែរដោយឃោសនាឲ្យយកគំរូតាម។
ប៉ុន្តែ លោក សម រង្ស៊ីនិងលោក កឹម សុខា តាំងតែពីដើមមករហូតដល់ឥឡូវគឺគ្មានសមត្ថភាពរៀបរៀងគោលនយោបាយស្នូលរបស់បក្សខ្លួនមកធ្វើជាបរិបទចំបងក្នុងការប្រកួតប្រជែងទេ
មេបក្សប្រឆាំងចេះត្រឹមតែបន្តុះបង្អាប់វាយប្រហារលាបពណ៌អាក្រក់ មកលើគូប្រកួតក្នុងចេតនាឲ្យប្រជាពលរដ្ឋស្អប់បក្សកាន់អំណាចនិងងាកមកគាំទ្រខ្លួនតាមគោលការណ៍ញុះញុង់ឲ្យមាន
"ភាពស្រឡាញ់ស្អប់"
រវាងខ្មែរនិងខ្មែរ។
ចំពោះទំនាក់ទំនងជាមួយបរទេសវិញ គឺលោក សម រង្ស៊ី និងលោក កឹម សុខាញុះញុង់កៀងគរបរទេស (ជាអ្នកនយោបាយ ជាមន្ត្រីរដ្ឋ ជាអង្គការអន្តរជាតិ និងជាបុគ្គលជនបរទេស) ឲ្យគេព្រួតស្អប់រាជរដ្ឋាភិបាលកម្ពុជា និងស្អប់គណបក្សប្រជាជនកម្ពុជា ហើយកាន់តែជ្រុលទៀតនោះគឺឈានទៅបើកដៃឲ្យបរទេសលូកលាន់ចូលកិច្ចការផ្ទៃក្នុងកម្ពុជា។
បេសកកម្មការបរទេសបែបទុច្ចរិតលក់អធិបតេយ្យជាតិរបស់មេបក្សសង្រ្គោះជាតិបែបនេះគឺមានពីរទម្រង់៖ មួយ គឺបេសកកម្មការទូតភូតបរទេស
ដើរសម្អុយកម្ពុជានៅក្រៅប្រទេស
និងមួយទៀត គឺរង់ចាំទស្សនកិច្ចរបស់មេដឹកនាំឬមន្ត្រីជាន់ខ្ពស់នៃរដ្ឋាភិបាលបរទេសក៏ដូចជាអង្គការអន្តរជាតិមកកម្ពុជា ដើម្បីទូលពិត្រពីនេះពីនោះ
ដោយប្រើពាក្យចោទប្រកាន់ថាប្រជាធិបតេយ្យដើរថយក្រោយ ស្ថានភាពសិទ្ធិមនុស្សធ្លាក់ក្នុងគ្រោះថ្នាក់
សិទ្ធិសេរីភាពត្រូវរឹតបន្តឹងគណបក្សប្រឆាំងត្រូវបានកៀបសង្កត់។
គួរឲ្យអស់សំណើចនោះគឺមេដឹកនាំគណបក្សប្រឆាំង
និងមេដឹកនាំអង្គការ NGO និន្នាការប្រឆាំងតែងតែស្នើសុំឲ្យប្រតិភូបរទេសដោះស្រាយ និងដាក់សម្ពាធមកលើរាជរដ្ឋាភិបាល
និងផ្តាច់ជំនួយ។ ដូច្នេះហើយបានជាពួកនេះឲ្យតែឮថាមានគណៈប្រតិភូបរទេសមកកម្ពុជាគឺក្រុមទាំងនេះ
សប្បាយណាស់ពោលគឺសប្បាយជាងឮដំណឹងថាឪពុកម្តាយរបស់ខ្លួនដែលចែកឋានទៅបានរស់ឡើងវិញទៅទៀត។
ជាក់ស្តែង
ជុំវិញទស្សនកិច្ចផ្លូវការរបស់លោក John Kerry រដ្ឋមន្ត្រីការបរទេសសហរដ្ឋអាមេរិកគឺលោក កឹម សុខា ប្រធានស្តីទីគណបក្សសង្គ្រោះជាតិ
ត្រៀមលើកចំណុចនេះចំណុចនោះដើម្បីទូលពិត្រនិងសុំបរទេសជួយដោះស្រាយ។ រីឯអង្គការ NGO និងពួកចលនាប្រឆាំងផ្សេងៗទៀតទូលពិត្រតាមរយៈការដាក់ញត្តិ។ ដោយឡែកពួកអ្នកវិភាគឯករាជ្យនោរខាងបក្សប្រឆាំងខំដើរតួធ្វើឬកឯងជាអ្នកចេះប្រដៅរាជរដ្ឋាភិបាលថាត្រូវធ្វើនេះធ្វើនោះដែលក្នុងភាពជាក់ស្តែងគ្មានន័យខ្លឹមសារអ្វីបន្តិចទាល់តែសោះ។ មែនទែនទៅដូច "អាប៉ោងបើកគ្រប" អញ្ចឹងគឺចប់ទស្សនកិច្ចភ្លាមលោក John
Kerry ចេញសេចក្តីថ្លែងការណ៍ដែលមានអត្ថន័យ និងខ្លឹមសារខុសពីអ្វីដែលក្រុមនិន្នាការប្រឆាំងរំពឹងទុកទាំងអស់។
ប្រយោគមួយគឺ "សហរដ្ឋអាមេរិកចង់ធ្វើទំនាក់ទំនងល្អជាមួយកម្ពុជា"
មានន័យថាទំនាក់ទំនងល្អជាមួយរាជរដ្ឋាភិបាលកម្ពុជា ដែលតំណាងស្របច្បាប់តែមួយគត់របស់ប្រទេស
និងប្រជាជនកម្ពុជា។ រីឯគណបក្សប្រឆាំងនិងអង្គការ NGO ពុំមានភាពជាតំណាងនៃប្រទេសកម្ពុជាទេ។ លោក John
Kerry មានសមត្ថភាពទទួលស្គាល់កំរិតរីកចម្រើនជាក់ស្តែងរបស់កម្ពុជា
ខុសពីអ្នកនយោបាយប្រឆាំងនៅកម្ពុជាជាពិសេសលោកសម រង្ស៊ី និងលោក កឹម សុខាដែលងងឹតគ្មានសមត្ថភាព
គ្មានសតិសម្បជញ្ញៈ និងគ្មានសុភវិនិច្ឆ័យលើបច្ចុប្បន្នភាពរបស់កម្ពុជា។
វាជាការវាយសំពងយ៉ាងដំណំ
មកលើមេដឹកនាំគណបក្សសង្គ្រោះជាតិ និងអង្គការសិទិ្ធមនុស្សនិន្នាការប្រឆាំងនូវអ្វីដែលលោក John
Kerry បានប្រកាសទទួលស្គាល់ថា កម្ពុជាជាប្រទេសតូចមែនតែមានការរីកចំរើនខ្លាំង។ ការទទួលស្គាល់នេះគឺគ្រប់គ្រាន់ដែលលោក John
Kerry ចង់បញ្ជាក់ថាមូលដ្ឋាននាំឲ្យមានការរីកចំរើននេះ គឺផ្អែកលើមូលដ្ឋានកម្ពុជាមានសន្តិភាព
សន្តិសុខជាតិ សណ្តាប់ធ្នាប់សង្គមដែលជាមូលដ្ឋាននាំឲ្យកម្ពុជាមានប្រសិទ្ធភាពដំណើរការ ប្រជាធិបតេយ្យភាវូបនីយកម្មជាជំហានៗជាមួយនឹងការពង្រឹងនីតិរដ្ឋជាប្រយោជន៍ដល់ការអភិវឌ្ឍន៍ជាតិ៕
No comments:
Post a Comment