ឯកអគ្គរដ្ឋទូតគុយបាប្រចាំនៅព្រះរាជាណាចក្រកម្ពុជា
ឯកឧត្តម ហ្សង់ហ្សេ ហ៊ីដាលហ្គោ ហ្កាតូ
ផេរ៉េ(Juan de Jesus Hidalgo Gato Perez) នៅក្នុងជំនួបជាមួយសម្ដេចតេជោហ៊ុន សែន នាយករដ្ឋមន្រ្ដី ព្រឹកថ្ងៃទី២៨ ខែមករា នេះបានលើកឡើងពីការពង្រីកនិងពង្រឹងទំនាក់ទំនងរវាងកម្ពុជា
និងគុយបា។
ជំនួយការផ្ទាល់សម្ដេចតេជោ
ឯកឧត្តម អ៊ាង សុផល្លែត បានមាន
ប្រសាសន៍ប្រាប់អ្នកសារព័ត៌មាន នៅក្រោយជំនួបនោះថា
ឯកអគ្គរដ្ឋទូតគុយបា
បានជំរាបជូន សមេ្តចតេជោ នាយករដ្ឋមន្ត្រីថា បេសកម្មការទូតរបស់ឯកឧត្តមមកកាន់កម្ពុជាពេលនេះ គឺធ្វើយ៉ាងណាដើម្បីពង្រីក
និងពង្រឹងទំនាក់ទំនងរវាងប្រទេសទាំងពីរ ឲ្យកាន់តែល្អប្រសើរឡើងថែមទៀត
ជាពិសេសលើវិស័យទាំងឡាយណា ដែលអាចធ្វើទៅបាន។
ក្នុងន័យសុំឱ្យសម្តេចតេជោប្រមុខរាជរដ្ឋាភិបាលកម្ពុជា
មេត្តាគាំទ្រនូវបេសកម្មការទូត
របស់ឯកឧត្តម នៅកម្ពុជាឲ្យទទួលបានជោគជ័យ។
ក្នុងឱកាសនោះសម្តេចតេជោ ហ៊ុន សែន បានអបអរសាទរ
និងស្វាគមន៍ចំពោះ ឯកឧត្តម Gato
Perez ដែលបានតែងតាំងជាឯកអគ្គរដ្ឋទូត
វិសាមញ្ញា និងពេញសមត្ថភាព របស់គូបា ប្រចាំនៅកម្ពុជា
ហើយសម្តេចក៏បានវាយតម្លៃខ្ពស់ចំពោះការប្តេជ្ញាចិត្តរបស់
ឯកឧត្តម ឯកអគ្គរដ្ឋទូតគូបា
ក្នុងការខិតខំពង្រឹងកិច្ចសហប្រតិបត្តិការនេះ។
ប្រមុខរាជរដ្ឋាភិបាលសម្ដេចតេជោ ហ៊ុន សែន បានលើក ឡើងថា ទំនាក់ទំនងរវាងកម្ពុជា
និងគុយបា គឺកើតមានតាំងពីឆ្នាំ១៩៧៩មក ហើយគុយបាតែងតែជួយដល់កម្ពុជា ។ សម្តេចបានថ្លែងអំណគុណ
និងផ្តោតនូវក្តីសង្ឃឹមថា
ទំនាក់ទំនងដែលមានស្រាប់នេះ នឹងត្រូវបានពង្រីកក្នុងបេសកម្មការទូតរបស់
ឯកឧត្តម ផេរ៉េ នៅកម្ពុជា នាពេលនេះ។ ក្នុងឱកាសនោះដែរ សម្តេចតេជោ
ក៏បានស្នើសុំឲ្យឯកអគ្គរដ្ឋទូតគុយបា
ថ្មីប្រចាំកម្ពុជា ពិនិត្យមើលនូវរាល់លទ្ធភាពនិងទិសដៅទំាងឡាយដែលអាចជំរុញកិច្ច
សហប្រតិបត្តិការរវាងប្រទេសទំាង២ឲ្យកាន់តែល្អប្រសើរឡើងថែមទៀត៕
No comments:
Post a Comment