ក្នុងដំណើរចុះសួរសុខទុក្ខប្រជាពលរដ្ឋម្ចាស់ឆ្នោតនៅស្រុកពាមរក៍
និងស្រុកពាមជរ ខេត្តព្រៃវែង នៅព្រឹក ថ្ងៃទី២៧ ខែមករា ឆ្នាំ២០១៦ ឯកឧត្តមបណ្ឌិតរដ្ឋ
ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មនៃរដ្ឋសភា បានឆ្លៀតឱកាស ធ្វើការផ្សព្វផ្សាយពី ខ្លឹមសារច្បាប់មួយចំនួន
ជូនប្រជាពលរដ្ឋ និងមន្ត្រីរាជការ នៅក្នុងមូលដ្ឋាននៃស្រុកទាំងពីរ
បានយល់ដឹងបន្ថែមទៀត។
ឯកឧត្តមបណ្ឌិតរដ្ឋ ជាម យៀប បានមានប្រសាសន៍ លើកឡើងពីចំណុចសំខាន់ៗ នៃច្បាប់ស្តីពីរដ្ឋធម្មនុញ្ញ
វិសោធនកម្មមាត្រា៧៦ និងមាត្រាទាំងឡាយពីជំពូកទី១៥ ដល់ជំពូកទី១៦ និងច្បាប់ស្តីពីការរៀបចំនិងការប្រព្រឹត្តទៅនៃគណៈកម្មការរៀបចំការបោះឆ្នោត
មកជម្រាបជូន ដោយហេតុថា ការយល់ដឹងពីខ្លឹមសារនៃច្បាប់ទាំងនេះ
នឹងផ្ដល់ភាពងាយស្រួលដល់ម្ចាស់ឆ្នោត ក្នុងការពិចារណា ជ្រើសរើសតំណាងរបស់ខ្លួន
ពិសេសគឺ អាចជ្រើសរើសបាននូវតំណាងដែលអាចជួយការពារផលប្រយោជន៍
និងលើកស្ទួយជីវភាពរស់នៅរបស់ប្រជាពលរដ្ឋអោយកាន់តែប្រសើរឡើង។
ទន្ទឹមនឹងនោះ ឯកឧត្តមបណ្ឌិតរដ្ឋ ក៏បានរំលឹកដល់អាជ្ញាធរស្រុកទាំងពីរ
ត្រូវយកចិត្តទុកដាក់ ធ្វើការផ្សព្វផ្សាយនិងជំរុញអោយប្រជាពលរដ្ឋ
ទៅធ្វើអត្តសញ្ញាណប័ណ្ណអោយបានគ្រប់ៗគ្នា ដើម្បីងាយស្រួលទៅចូលរួមក្នុងការបោះឆ្នោតនាពេលខាងមុខ។
នៅក្នុងឱកាសនោះ អាជ្ញាធរស្រុក ឃុំ និងអ្នកដែលបានចូលរួមស្ដាប់ទាំងអស់
បានថ្លែងអំណរគុណជូន ឯកឧត្តមបណ្ឌិតរដ្ឋ ជាម យៀប ដែលបាន
ធ្វើការផ្សព្វផ្សាយពីខ្លឹមសារច្បាប់ដែលរដ្ឋសភាបានអនុម័ត ជូនពួកគាត់បានយល់ដឹងកាន់តែច្បាស់ ហើយក៏ជាមូលដ្ឋានសម្រាប់អោយពួកគាត់
យកទៅធ្វើការផ្សព្វផ្សាយបន្តជូនប្រជាពលរដ្ឋផងដែរ៕
No comments:
Post a Comment