អ្នកនាំពាក្យគណបក្សប្រជាជនកម្ពុជា ឆ្លើយតបនឹងការលើកឡើងរបស់ សុន ឆ័យ

នៅថ្ងៃទី១២ ខែកញ្ញា ឆ្នាំ២០១៧ លោក សុខ ឥសាន អ្នកនាំពាក្យគណបក្សប្រជាជនកម្ពុជា បានធ្វើការឆ្លើយតបទៅនឹងសន្និសីទសារព័ត៌មានរបស់លោក សុន ឆ័យ ដោយបានបញ្ជាក់ថាសភាពការណ៍នយោបាយនៅកម្ពុជា មានលក្ខណៈជាធម្មតាមិនក្តៅដូចការនិយាយរបស់អ្នកនយោបាយខ្លះ និងអ្នកវិភាគមិនឯករាជ្យខ្លះនោះទេ។

ឆ្លើយតបនឹងលើកឡើងថាស្ថានការណ៍នយោបាយកម្ពុជាបច្ចុប្បន្នឆ្ពោះទៅរកគ្រោះថ្នាក់ធ្ងន់ធ្ងរនោះ លោក សុខ ឥសាន បានបំភ្លឺថា ពិតជាស្ថិតនៅក្នុងគ្រោះថ្នាក់ធ្ងន់ធ្ងរមែនហើយសម្រាប់គណបក្សប្រឆាំង និងអ្នកដែលបានចូលដៃជើងក្បត់ជាតិជាមួយលោក កឹម សុខា  ប្រធានគ​ណ​បក្សសង្រ្គោះជាតិ។ អ្នកនាំពាក្យរូបនេះ ក៏បានបន្ថែមថា ការលើកឡើងថានឹងមានគំនាបពីខាងក្រៅនោះ ពិតជាមានមែនហីយ តែមិនប៉ះពាល់អ្វីទេ ដោយសារគំនាបជាពាក្យសម្តី អាចចាត់​ទុកជាការបញ្ចេញមតិរាល់ការយល់ឃើញតាមនិន្នាការនយោបាយ។ ប៉ុន្តែទន្ទឹមនឹងនេះ ក៏មានប្រទេសជាមិត្តគាំទ្រចំពោះចំណាត់ការរបស់រាជរដ្ឋាភិបាលកម្ពុជាដែរ។

លោក សុខ ឥសាន ក៏បានបញ្ជាក់ថា ប្រជាជនកម្ពុជាឆ្អែតនឹងសង្គ្រាមហើយមិនត្រូវការអ្នកក្បត់ជាតិចង់នាំប្រទេសឱ្យធ្លាក់ទៅរកគ្រោះមហន្តរាយដូចអតីតកាលទៀតទេ។ គ្មានប្រជាជនណា លោកឈឺក្បាលរឿងចាប់ កឹម សុខា ក្បត់ជាតិខ្លួនឯងនោះទេ។ លោក សុខ ឥសាន ក៏បានលើកឡើងជាសំនួរថា  តើ រវាង មូរ សុខហួរ អនុប្រធានគណបក្ស និង សុន ឆ័យ ប្រធានក្រុមតំណាងរាស្ត្រ មួយណាធំជាង តើយកសម្តីមួយណាជាបានការទៅ?