អ្នកនាំពាក្យគណបក្សប្រជាជនកម្ពុជាលោក សុខ ឥសាន នៅយប់ថ្ងៃទី១១ ខែមីនា ឆ្នាំ២០១៧នេះ បានលើកឡើងថា ការធ្វើសមាជវិសាមញ្ញរបស់គណបក្សសង្គ្រោះជាតិ កាលពីថ្ងៃទី០២ ខែមីនា ឆ្នាំ២០១៧ ដើម្បីជ្រើសតាំងប្រធាន និងអនុប្រធាន បើពិនិត្យឲ្យដិតដល់លើខ្លឹមសារលក្ខន្តិកៈគណបក្សឃើញថា សមាជវិសាមញ្ញនេះ ប្រព្រឹត្តទៅដោយខុសលក្ខន្តិកៈគណបក្ស។ បើតាមលោក សុខ ឥសាន្ត មានពីរចំណុចដែលបញ្ជាក់ថា សមាជវិសាមញ្ញរបស់គណបក្សសង្គ្រោះជាតិធ្វើឡើងដោយខុសលក្ខន្តិកៈគណបក្ស៖
ទី១- ការបើកធ្វើសមាជរបស់គណបក្ស៖ ប្រការ ៤៧ ត្រេទី ១ ចែងថា ករណីប្រធានគណបក្សបាត់បង់សមត្ថភាពដឹកនាំគណបក្ស ដែលបញ្ជាក់ដោយគណកម្មាធិការនាយក បើអាណត្តិនៅតិចជាង ១៨ខែ អនុប្រធានត្រូវទទួលនាទីជាប្រធានស្តីទី ហើយគណកម្មាធិការនាយកត្រូវជ្រើសអនុប្រធានគណបក្សថ្មីមួយរូប ក្នុងរយៈពេល ៣០ថ្ងៃយ៉ាងយូរ ពីក្នុងចំណោមសមាជិករបស់ខ្លួន ដោយសម្លេងភាគច្រើនដាច់ខាត ៥០ ភាគរយបូក ១ នៃសមាជិកគណកម្មាធិការនាយកទាំងមូល ដើម្បីជួយដល់ការងារប្រធានគណបក្សស្តីទី រហូតដល់ចប់អាណត្តិ។
លោក សុខ ឥសាន បន្តថា បើគិតចាប់ពីថ្ងៃទី១១ ខែមីនា ឆ្នាំ២០១៧ រយៈពេលបញ្ចប់អាណត្តិទី១ ដែល សម រង្សី បានលាលែងពីប្រធានគណបក្ស គឺនៅសល់រយៈពេល ១៤ខែប៉ុណ្ណោះ តិចជាង ១៨ខែ ដែលលក្ខន្តិកៈកំណត់ ដែលមិនអាចអនុញាត្តឲ្យកោះប្រជុំសមាជបានទ្បើយ។ បើរាប់ពីថ្ងៃទី១៧ ខែកក្កដា ឆ្នាំ២០១២ ដែលជាថ្ងៃបង្កើតបក្ស រហូតដល់៥ឆ្នាំ គឺត្រូវបញ្ចប់ក្នុងខែកក្កដា២០១៧។ បើគិតពីថ្ងៃអនុម័តលក្ខន្តិកៈបក្ស នាថ្ងៃទី០៧ ខែមេសា ឆ្នាំ២០១៣ រយៈពេល ៥ឆ្នាំ នោះនឹងបញ្ចប់នៅខែមេសា ឆ្នាំ២០១៨ ។ ដូច្នេះ មិនអាចអនុវត្តសមាជណាមួយបានទេ។
ទី២- ការបោះឆ្នោតជ្រើសតាំងប្រធាន អនុប្រធាន៖ យោងប្រការ៥៤ នៃលក្ខន្តិកៈបក្សចែងថា ការបោះឆ្នោតជ្រើសតាំងប្រធាន អនុប្រធាន ប្រព្រឹត្តទៅដោយលើកដៃ គឺប្រើបានតែនៅក្នុងសមាជលើកទី១ ប៉ុណ្ណោះ។ បានសេចក្តីថា នៅសមាជលើកក្រោយៗទៀត មិនឲ្យមានការបោះឆ្នោតដោយលើកដៃទេ គឺត្រូវបោះឆ្នោតជាសម្ងាត់។ ប៉ុន្តែនៅក្នុងសមាជវិសាមញថ្ងៃទី០២ ខែមីនា ឆ្នាំ២០១៧ កន្លងទៅនេះ បានអនុវត្តបោះឆ្នោតតាមវិធីលើកដៃ ដែលផ្ទុយពីខ្លឹមសារនៃលក្ខន្តិកៈគណបក្សទាំងស្រុង។
អ្នកនាំពាក្យគណបក្សប្រជាជនកម្ពុជារូបនេះបញ្ជាក់ថា ដូច្នេះ ការប្រារព្វធ្វើសមាជវិសាមញ្ញរបស់គណបក្សសង្គ្រោះជាតិកន្លងទៅ គឺខុសលក្ខន្តិកៈបក្ស ដែលជាច្បាប់កំពូលរបស់គណបក្ស។ បើសមាជ ខុសច្បាប់លក្ខន្តិកៈគណបក្ស លទ្ធផលសមាជ ក៏ខុសច្បាប់លក្ខន្តិកៈដែរ ហើយប្រធាន និងអនុប្រធានទាំង ៣រូបដែលសមាជបោះឆ្នោតមិនត្រឹមត្រូវតាមលក្ខន្តិកៈបក្សនោះ ក៏មិនត្រឹមត្រូវដែរ។ អាស្រ័យហេតុនេះ គួរសមាជិក សមាជិកា គណបក្សសាង្គ្រោះជាតិ មេត្តាពិចារណា តាមការគួរ៕
No comments:
Post a Comment