សមាជិកក្រុមប្រឹក្សាស្រុកស្នួល ខេត្តក្រចេះ ២នាក់ទៀតហើយ ប្រកាសដើរចេញពីគណបក្សសង្រ្គោះជាតិ

ក្រចេះ៖ ថ្នាក់ដឹកនាំ និងសកម្មជនសំខាន់ៗ នៅតាមមូលដ្ឋានរបស់គណបក្សសង្គ្រោះជាតិ បាននិងកំពុងបែក បាក់ជាបន្តបន្ទាប់ ដោយប្រកាសដើរចេញ ហើយមកចូលរួមជាមួយគណបក្ស កាន់អំណាចដែលមាន លោកនាយករដ្ឋមន្រ្ដី ហ៊ុន សែន ជាប្រមុខដឹកនាំ ដែលការប្រកាសដើរចេញដោយស្ម័គ្រចិត្តទាំងនេះ បានកើត មានឡើង បន្ទាប់ពីពួកគេបានមើលឃើញ ពីទង្វើក្បត់ជាតិយ៉ាងពិតប្រាកដ របស់លោក កឹម សុខា ប្រធានគណបក្សសង្រ្គោះជាតិ តាមរយៈឃ្លីបវីដេអូ ដោយធ្វើតាមបញ្ជារបស់អាមេរិក ចង់បំផ្លាញជាតិសាសន៍ ខ្លួនឯង។

ជាក់ស្តែងនៅថ្ងៃនេះ សមាជិកក្រុមប្រឹក្សារបស់គណបក្សសង្គ្រោះជាតិ២ទៀតហើយគឺទី១៖ លោក កែវ ចាន់ថុល អាយុ៤៧ឆ្នាំ ទី២៖ ហាក់ ម៉ាត់ អាយុ៥៣ឆ្នាំ បច្ចុប្បន្នជាសមាជិកក្រុមប្រឹក្សាស្រុកស្នួល ខេត្តក្រចេះ បានប្រកាសដើរចេញពីគណបក្សសង្គ្រោះជាតិ មកសុំចូលរួមជីវភាពនយោបាយជាមួយ គណបក្សប្រជាជនកម្ពុជា។

នៅក្នុងលិខិតសុំចូលរួមជីវភាពនយោបាយជាមួយ គណបក្សប្រជាជនកម្ពុជាផ្ញើជូន ប្រធានគណៈកម្មាធិការ គណបក្សប្រជាជនកម្ពុជា ខេត្តក្រចេះ អ្នកទាំង២បានបញ្ជាក់ថា «លោក កឹម សុខា និងបក្ខពួកជាជនក្បត់ជាតិ និងប្រព័ន្ធបក្សសង្គ្រោះជាតិ សុខចិត្តឱនក្បាលបំរើពួកអាយ៉ងបរទេស គឺដើម្បីតែអំណាច មិនគិតពីមហន្តរាយដល់ជាតិ មាតុភូមិ នេះហើយជាអំពើក្បត់ជាតិ ក្បត់ប្រជាជនឯងតែម្តង»។

កាលពីព្រឹកថ្ងៃទី០៤ ខែវិច្ឆិកា ឆ្នាំ២០១៧ លោកនាយករដ្ឋមន្រ្ដី ហ៊ុន សែន និងជាប្រធានគណបក្ស ប្រជាជនកម្ពុជា បានប្រកាសអំពាវនាវតាមរយៈវិដេអូចំនួន ២៦នាទី នៅលើបណ្តាញទំនាក់ទំនង Facebook របស់លោកដោយមានប្រសាសន៍ អំពីការផ្តល់ឱកាសដល់បងប្អូនសមាជិកគណបក្សសង្គ្រោះជាតិ បានបន្តអាជី ពនយោបាយជាមួយ គណបក្សប្រជាជនកម្ពុជា ក្រោយពេលដែលគណបក្សសង្រ្គោះជាតិ ត្រូវបានកាត់រំលាយ ដោយតុលាការកំពូលគឺនៅថ្ងៃទី១៦ ខែវិច្ឆិកា ឆ្នាំ២០១៧ខាងមុខនេះ ៕