អភិបាលខេត្តកណ្តាល បានដោះស្រាយបញ្ចប់ករណីប្រជាពលរដ្ឋ៣ គ្រួសារ រស់នៅលើដីអនុវត្តសាលដីកា

ករណីប្រជាពលរដ្ឋ ៣ គ្រួសារ រស់នៅលើដីអនុវត្តសាលដីកា នៅភូមិទួលក្រសាំង ឃុំរកាខ្ពស់ ស្រុកស្អាង ត្រូវបានដោះស្រាយបញ្ចប់ហើយកាលពីព្រឹកថ្ងៃទី ១១ ខែ កញ្ញា ឆ្នាំ ២០១៧ នៅសាលាខេត្តកណ្ដាល ដោយបានបើកកិច្ចប្រជុំរកដំណោះស្រាយជូនប្រជាពលរដ្ឋ៣គ្រួសារ រស់នៅលើដីអនុវត្តសាលដីកា ក្រោមអធិបតីភាពលោក ម៉ៅ ភីរុណ អភិបាលខេត្តកណ្ដាល។

សមាសភាពចូលរួមកិច្ចប្រជុំនោះរួមមាន៖ លោកអាជ្ញាសាលាអយ្យការនៃសាលាដំបូងខេត្តកណ្តាល លោកអភិបាល អភិបាលរងស្រុកស្អាង លោក ប្រធានមន្ទីសុរិយោដីខេត្តនិងស្រុក លោក ស្នងការការងនិងអធិការង ជំនាញអាវុធហត្ថ ខេត្ត មេបញ្ជាការកងរាជអាវុធហត្ថ ស្រុក លោកមេភូមិ ឃុំទួលក្រសាំង ភាគីចាញ់ក្តីនិងភាគីឈ្នះក្តីផងដែរ។

ជាលទ្ធផលក្នុងការសម្របសម្រួល របស់លោកអភិបាលខេត្ត បានពិនិត្យ ឯកសារភាគីឈ្នះគឺលោកអភិបាលខេត្តពិនិត្យឃើញត្រឹមត្រូវតាមជំនាញសុរិយោដីដែលបានបញ្ជាក់ ឯកសារភាគីចាញ់ក្តីលោក ប៉ុន ថន ឯកសារមិនត្រឹមត្រូវតាមផ្លូវការនិងមិនប្រក្រតីតាំងពីភូមិ-ឃុំ។ លោកអភិបាលខេត្ត បានពន្យល់ថាគ្រួសារទាំង៣ កុំតវ៉ាទៀតនាំមានរឿងវែងឆ្ងាយក្លាយទៅជាបទល្មើសព្រហ្មទណ្ឌព្រោះចាញ់ក្ដីគេហើយ ចាំគាត់រកដំណោះស្រាយជូនក្នុងនាមអភិបាលខេត្ត។

ការដោះស្រាយជូនគ្រួសារទាំង៣នោះរួមមាន៖ ១- លោក ប៉ុន ថន បានទទួលដីទំហំ10×12
ប្រាក់ចំនួន 3000$ និងជួយធ្វើផ្ទះឱ្យទៀតនៅចំណុចក្រោយអារុណរះទួលក្រសាំង។ ២- អ៊ុង អ៊ីម ទទួលបានដីទំហំ5×12 ប្រាក់1500$ និងជួយធ្វើផ្ទះឱ្យ។ ៣- សែ គឹមអូន ទទួលបានដី 5×12
និងប្រាក់1500$និងជួយធ្វើផ្ទះឱ្យ។ ហើយគ្រួសារទាំង៣ បានឯកភាពទទួលយក។ លោកអភិបាលខេត្ត បានចាត់តាំងឱ្យលោកអភិបាលស្រុក ចាត់ការចុះមើលដីជាបន្ទាន់។ គ្រួសារទាំង៣បានឯកភាពទទួលយកដោយរីករាយក្នុងការដោះស្រាយរបស់លោកអភិបាលខេត្ត៕