ប្រធានមន្ទីរសាធារណៈការខេត្តកំពង់ឆ្នាំង ជំរុញឱ្យមន្ត្រីទាំងអស់សម្រេចឱ្យបាននូវសូចនាករចុងឆ្នាំប្រកបដោយប្រសិទ្ធភាពខ្ពស់

កំពង់ឆ្នាំង៖ លោក កែវ ពៅ ប្រធានមន្ទីរសាធារណៈការ និងដឹកជញ្ជូនខេត្តកំពង់ឆ្នាំង បានជំរុញឱ្យការិយាល័យ ចំណុះមន្ទីរទាំងអស់ត្រូវបន្តសកម្មភាពតាមជំនាញរៀងៗខ្លួន ដើម្បីសម្រេចឱ្យបាននូវ សូចនាករតាមផែនការ សកម្មភាពរបស់មន្ទីរ ក្រសួង ខេត្ត ស្របតាមយុទ្ធសាស្រ្តចតុកោណដំណាក់កាលទី៣របស់ រាជរដ្ឋាភិបាល ដែលមានលោកនាយករដ្ឋមន្រ្ដីហ៊ុន សែន ជាប្រមុខដឹកនាំ។

លោក បានជំរុញបែបនេះនាថ្ងៃទី១២ ខែកញ្ញា ឆ្នាំ ២០១៧ ក្នុងកិច្ចប្រជុំត្រួតពិនិត្យលទ្ធផលការងារ រយៈ៩ខែ និង លើកទិសដៅអនុវត្តបន្តត្រីមាសទី៤ ឆ្នាំ២០១៧ នៅសាលប្រជុំមន្ទីរសាធារណៈការ និងដឹកជញ្ជូនខេត្ត កំពង់ឆ្នាំង ដោយមានការចូលរួមពី អនុប្រធានមន្ទីរ និងលោកលោកស្រី ប្រធានការិយាល័យ ចំណុះមន្ទីរ ចូលរួមផងដែរ។

លោក កែវ ពៅ ក៏បានផ្តាំផ្ញើ ដល់ថ្នាក់ដឹកនាំការិយាល័យទាំងអស់ត្រួវសហការសាមគ្គីគ្នា កត្តាសំខាន់ត្រូវបម្រើ សេវាជូនប្រជាពលរដ្ឋឱ្យបានទាន់ពេលវេលា ផ្សព្វផ្សាយច្បាប់ចរាចរណ៍ តាមគ្រប់រូបភាព ឱ្យប្រជាពលរដ្ឋយល់ ដឹង និងចូលរួមគោរពអនុវត្តន៍តាមអនុសាសន៍របស់លោកនាយករដ្ឋមន្រ្ដី ហ៊ុន សែន ដែលបានលើកឡើងថា «ថ្ងៃនេះ ថ្ងៃស្អែក សួមកុំឱ្យមានគ្រោះថ្នាក់ដោយចរាចរណ៍» ជាពិសេសត្រូវថែទាំផ្លូវជាតិលេខ៥ និងផ្លូវក្នុង ខេត្តឱ្យបានជាប់ជាប្រចាំសំខាន់កុំឱ្យមានការស្ទះលូបណ្តាលឱ្យខូចផ្លូវ និងធ្វើឱ្យកកស្ទះចរាចរណ៍រំខានដល់ការ ធ្វើដំណើររបស់ប្រជាពលរដ្ឋផងដែរ៕