មានអ្នកពុលទឹកមាត់ក្នុងបក្សសង្គ្រោះជាតិ

ទំព័រហ្វេសប៊ុកចៅចាក់ស្មុក ថ្ងៃទី ១២ ខែកញ្ញា ឆ្នាំ ២០១៧ បានបង្ហោះផ្សាយនូវអត្ថបទមួយ​ដែលមានខ្លឹមសារទាំងស្រុងដូចខាងក្រោម៖

ថ្ងៃម្សិលមិញ និងថ្ងៃនេះ គោលជំហររបស់គណបក្សសង្គ្រោះជាតិប្រែប្រួលដូចមេឃនិងដី! ម្សិលមិញ មូរ សុខហួរ អនុប្រធានគណបក្សសង្គ្រោះជាតិ​បានប្រកាសថា​សុខចិត្តឱ្យ​គណបក្សត្រូវបានគេរំលាយមិនប្តូរប្រធាន ហើយនឹងធ្វើពហិការក្នុងការបោះឆ្នោតជាតិឆ្នាំ ២០១៨ ខាងមុខ បើគ្មានការដោះលែង កឹម សុខា ដោយគ្មានលក្ខខណ្ឌ។ ប៉ុន្តែថ្ងៃនេះ សុន ឆ័យ បានលើកឡើងនៅក្នុងសន្និសីទ​កាសែតនៅស្នាក់ការ​បក្សសង្គ្រោះជាតិ​នៅចាក់អង្រែ​ដោយ​បាន ទាត់ចោលនូវពាក្យសម្តីដែលគ្មានការសម្រេចចិត្តត្រឹមត្រូវរបស់លោកស្រី មូរ សុខហួរ ហើយ​ប្រកាសថា គណបក្សសង្រ្គោះជាតិ នឹងចូលរួមបោះឆ្នោតជាតិ នៅឆ្នាំ២០១៨ ខាង​មុខនេះ។ លោក សុន ឆ័យ បានបញ្ជាក់នៅចំពោះមុខ មូរ សុខហួរ ថា៖ «គណបក្សសង្រ្គោះជាតិ មានទិសដៅតែមួយទេ គឺឆ្ពោះទៅរកការបោះឆ្នោត នៅឆ្នាំ២០១៨។ នេះជា​បំណងប្រាថ្នារបស់គណបក្សសង្រ្គោះជាតិ ហើយគណៈកម្មាធិការអចិន្រ្តៃយ៍ កាលពី​ថ្ងៃទី៩ ខែកញ្ញា បានសម្រេចរួមគ្នាថា យើងនៅតែបន្តការងាររបស់យើងជាធម្មតា»។

ការថ្លែងរបស់ សុន ឆ័យ នៅពេលនេះហាក់ដូចជាបានវាយទម្លាក់ទំនុកចិត្តរបស់ មូរ សុខហួរ អនុប្រធានបក្សនៅកម្រិតទាបបំផុត និងក៏ជាការព្រមានចំពោះតំណាងរាស្ត្ររូបនេះ ដែលគេ​ស្គាល់ថាជាអ្នកពុកទឹកមាត់ កាន់ក្បាលមីក្រូនិយាយជំនួសបក្សទាំងមូលដោយមិន បានឆ្លង​កាត់​ការយល់ព្រមពីគណៈកម្មាធិការកណ្តាល ឬសមាជរបស់បក្ស។ មូរ សុខហួរ បាន​ត្រឹមតែ​ធ្វើមុខស្ងួត មិនសប្បាយចិត្តនឹងសម្តីរបស់ សុន ឆ័យ។ តើមូលហេតុអ្វីបានជា មូរ សុខហួរ បែរជាចេញមកប្រកាសមិនចូលរួមការបោះឆ្នោត និងមិនខ្វល់នឹងការរំលាយបក្ស ដែលផ្ទុយ​ពីចំណុចទី៤ នៃសេចក្តីថ្លែងការណ៍របស់ខ្លួននៅថ្ងៃទី១០ ខែកញ្ញាដែលថា បន្តការងារ​គណបក្ស​ឆ្ពោះទៅរកការបោះឆ្នោតជ្រើសតាំងតំណាងរាស្ត្រអាណត្តិទី៦ ឆ្នាំ ២០១៨? ឬមួយ មូរ សុខហួរ ពុលទឹកមាត់ និងជ្រុលគំរាមតាមអេង ឆៃអ៊ាង ដែលថានឹងធ្វើពហិការក្នុង ការបោះឆ្នោត ហើយបើចាំបាច់នឹងធ្វើបាតុកម្ម?

តាមពិតសន្និសីទកាសែតនៅថ្ងៃនេះគឺជាការកែប្រែនូវគោលជំហរដែល មូរ សុខហួរ បានប្រកាស​នៅមុខពន្ធនាគារត្រពាំងផ្លុង និងការប្រកាសរបស់ អេង ឆៃអ៊ាង តាមរលកវិទ្យុ សំឡេងសហរដ្ឋអាមេរិក ភ្លាមៗក្រោយអាជ្ញាធរចាប់ខ្លួន កឹម សុខា។ សាររបស់ សុន ឆ័យ ប្រធានក្រុមតំណាងរាស្ត្រនៅថ្ងៃនេះគឺជាការទះកំផ្លៀងផ្ទួនៗ ទៅអនុប្រធានគណបក្ស
សង្គ្រោះ​​​​​ជា​តិពីរនាក់ដែលបង្ហាញជំហរបែបអត្តនោម័តមិនឆ្លងគណៈអចិន្ត្រៃយ៍ គណៈ កម្មាធិការ​កណ្តាល ឬសមាជបក្ស មុននឹងនិយាយក្នុងនាមបក្សទៅកាន់សាធារណជន និង​ប្រព័ន្ធ ផ្សព្វផ្សាយ។ នេះគឺជាកំហុសយុទ្ធសាស្ត្រព័ត៌មាន​ធំណាស់សម្រាប់​គណបក្ស​សង្គ្រោះ​ជាតិ ដែលមិនអាចគ្រប់គ្រងព័ត៌មានក្នុងបក្សរបស់ខ្លួនបាន។ ចំណែកកូនស្រី កឹម សុខា ទាំងពីរ ក៏មានផ្លូវមួយផ្នែកទៀតរបស់ខ្លួនដែរ។ ផ្ទៃក្នុងបក្សសង្គ្រោះជាតិនៅពេលនោះ មើល​ទៅពិតជាបាត់ម្ចាស់ការកាន់តែខ្លាំងហើយ គ្មាននរណាមេ នរណាកើយពិតប្រាកដទេ គឺ​ជើងខ្លាំងរៀង ៗខ្លួន។ ទាំងអស់គ្នាដែលបានបញ្ចេញមតិយោបល់និងគោល ជំហរនេះមិន​បាន​ធ្វើឱ្យស្ថាន ភាពល្អប្រសើរឡើយ ប៉ុន្តែបានធ្វើឱ្យ កឹម សុខា កាន់តែវណ្ឌកជាមួយនឹងច្បាប់ ហើយគណបក្សសង្គ្រោះជាតិ ក៏កាន់តែដើរដល់ជ្រោះមរណៈនៃការប្តឹងរំលាយបក្សចោល។

តាមប្រភពព័ត៌មានពីបន្ទាយចាក់អង្រែ អ្វីដែលកូនស្រី កឹម សុខា និយាយ និង​អនុប្រធាន​បក្សមូរ សុខហួរ និយាយកាលពីម្សិលមិញគឺពិតជាធ្វើឱ្យសមាជិកគណៈកម្មាធិការ
កណ្តាល​​​​​​បក្ស​ផ្សេងទៀតឈឺក្បាលវិលមុខមិនចេះស្ទើរជាពិសេស ប៉ុល ហំម ដែលបាន​និយាយ​​តាមកាសែត ភ្នំពេញ ប៉ុស្តិ៍ថា គាត់ហាក់ដូចជានឿយហត់នឹងនយោបាយ ហើយ ចង់ចូល​និវត្តន៍ និងទៅវត្តវ៉ាម្តង។ សូម្បី ប៉ុល ហំ និងអ្នកកឹម សុខានិយមផ្សេងទៀតដូចជា យ៉ែម ប៊ុញ្ញាឫទ្ធិ និងអ៊ូ ច័ន្ទរ័ត្នជាដើម ក៏នាំគ្នាគ្រវីក្បាលដូចគោស្រាំងទិច ហើយហួសចិត្ត នឹង​អ្វីដែល មូរ សុខហួរ និយាយក្នុងនាមបក្ស និងការតែរុញគណបក្សឈានទៅដល់គ្រោះថ្នាក់ កាន់តែខ្លាំង។ តាមប្រភពពីបន្ទាយចាក់អង្រែ ក្រោយពី មូរ សុខហួរ ថ្លែងសាររួចនៅមុខពន្ធ នាគារ​ត្រពាំងផ្លុង អ្នកតំណាងរាស្ត្រខ្លះរត់ជាន់ជើងគ្នាព្រាត ខ្លះស្វះស្វែងជួប មូរ សុខហួរ ដើម្បីស្នើសុំសម្រួលសារ ឬដកត្រឡប់មកវិញនូវសារខ្លះដែលធ្វើឱ្យប៉ះពាល់​គោលជំហរ​រួម​របស់​បក្ស។ ហេតុដូច្នេះហើយបានជាគណបក្សសម្រេចធ្វើសន្និសីទកាសែតដើម្បីទាត់ចោលការបង្ហាញពី គោលជំហរបុគ្គលធ្វើជាគោលជំហរបក្សចោលរបស់ មូរ សុខហួរ។

នេះជាមេរៀន​មួយសម្រាប់មូរ សុខហួរ និងអេង ឆៃអ៊ាង ធ្វើដល់អនុប្រធានបក្ស កុំពុល​ទឹកមាត់ និយាយត្រូវគិតមុខគិតក្រោយ គោលជំហរបុគ្គលឱ្យចំបុគ្គល គោលជំហរបក្ស ឱ្យ​ចំ​បក្ស​ព្រោះក្នុងបក្សសង្គ្រោះជាតិ មិនមែនមានតែក្រុម សម រង្ស៊ី ទេ មានក្រុមកឹម សុខា ដែល​បាន​និងកំពុងដណ្តើមឥទ្ធិពលគ្នា។ បើនិយាយមិនស្រួលប្រាកដជាត្រូវព្រនង់របស់ ប្រធាន​ក្រុម​តំណាងរាស្ត្រ សុន ឆ័យ ដូចព្រឹកនេះទៀតហើយ៕

ដោយ៖ ចៅ ចាក់ស្មុក