ដោយសារជីវភាពប្រជាពលរដ្ឋរីកចម្រើនធូរធារនិងប្រទេសមានសន្តិភាពទើបយើងមានឱកាសធ្វើបុណ្យរួមគ្នាបាន

បន្ទាយមានជ័យ៖ នៅព្រឹកថ្ងៃទី១៣ ខែកញ្ញា ឆ្នាំ២០១៧ លោកឧបនាយករដ្ឋមន្ត្រី កែ គឹមយ៉ាន សមាជិកអចិ ន្ត្រៃយ៍គណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុមការងារថ្នាក់ជាតិចុះខេត្តបន្ទាយមានជ័យបានថ្លែងថា ដោយសារជីវភាពប្រជាពលរដ្ឋមានការរីកចម្រើនធូរធារនិងប្រទេសមានសន្តិភាព សន្តិសុខទើបយើងអាចមកអង្គុយធ្វើបុណ្យជាមួយគ្នាបាន និងសូមអរគុណដល់ប្រជាលរដ្ឋទាំងអស់បានចូលរួមថែរក្សាសន្តិភាពជាមួយរាជរដ្ឋាភិបាលកម្ពុជាដឹកនាំដោយគណបក្សប្រជាជន ។ លោកបានថ្លែងដូចនេះ ក្នុងឱកាសចូលរួមពិធីរាប់បាត្រ ដារឆ្លងកាន់បិណ្ឌវេណទី៨នៅវត្តធម្មសាធរាម (វត្តភ្នំ៩៣ ) ឃុំអូរស្រឡៅ និងបានជួបសំណេះសំណាលជាមួយគណៈកម្មាធិការសាខាបក្សភូមិ ក្នុងឃុំអូរស្រឡៅ មានសមាជិក សមាជិការចូលរួមចំនួនជាង១២០០នាក់នៅក្នុងឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ។

ក្នុងឱកាសនោះ លោក កែ គឹមយ៉ាន បានរម្លឹកថា តំបន់ម៉ាឡៃ គឺជាសមរភូមិសង្រ្គាមវាយប្រយុទ្ធគ្នាយ៉ាងសាហាវរវាងខ្មែរនិងខ្មែរ ប្រជាពលរដ្ឋបានបោះបង់ចោលផ្ទះសម្បែង ភូមិករដើម្បីគេចពីគ្រោះថ្នាក់នៃគ្រាប់រំសេវ។ ទីនេះហើយជាទីតាំងបង្ហូរឈាមស្រស់ សាច់ស្រស់របស់យុវជនកូនប្រជាពលរដ្ឋយើងមានអ្នកខ្លះ បានបាត់បង់ជីវិត អ្នកខ្លះបានរងរបួសពិការដាច់ដៃជើងវេទនា ព្រាត់ប្រាស់ប្តីប្រពន្ធកូន កុមារ យុវជនមិនបានទៅសាលារៀនប្រជាពលរដ្ឋគ្មានពេលធ្វើស្រែចម្ការ នាំមកនូវភាពអវិជ្ជា ក្រីក្រលំបាក ពេលនោះមិនមានគណបក្សណាមកធ្វើការសន្យាឬជួយដោះស្រាយនូវសម្រែកហៅរកសេចក្តីសុខរបស់ប្រជាពលរដ្ឋឡើយ ក្នុងដំណាក់កាលនោះគណបក្សប្រជាជនដែលជាគណបក្សរបស់ប្រជាជន រួមសុខទុក្ខជាមួយប្រជាជន ដៃម្ខាងកសាងប្រទេស និងការពារប្រជាជនរក្សាសន្តិសុខភូមិករពីការលួចឆក់ប្លន់ដុតផ្ទះសម្បែងប្រជាពលរដ្ឋយើងពីសំណាក់ពួកទ័ពព្រៃប្រតិកិរិយា និងដៃម្ខាងស្វែងរកសន្តិភាពជូនប្រទេសតាមរយៈកិច្ចចរចាសន្តិភាពបង្រួបបង្រួមជាតិ។

លោក កែ គឹមយ៉ាន ក៏បានបញ្ជាក់ថា ក្រោមយុទ្ធសាស្រ្តឈ្នះ ឈ្នះរបស់លោកនាយករដ្ឋមន្រ្តី ហ៊ុន សែន ប្រធានគណបក្សប្រជាជនកម្ពុជា ប្រទេសទាំងមូលមានសុខសន្តិភាព សណ្តាប់ធ្នាប់របៀបរៀបរយសង្គមពេញផ្ទៃប្រទេស សង្គ្រាមផ្ទៃក្នុងខ្មែរនិងខ្មែរត្រូវបានបញ្ចប់ធ្វើឱ្យគណបក្សប្រជាជនមានពេលវេលាដោយរួមគ្នាជាមួយប្រជាជនកសាងបានមកវិញនូវផ្លូវថ្នល់ ស្ពាន សាលារៀន មន្ទីរពេទ្យ វត្តអារាម និងហេដ្ឋារចនាសម្ព័ន្ធ សង្គមរីកចម្រើនទៅមុខលើគ្រប់វិស័យ ការអនុគ្រោះមិនយកពន្ធដីធ្លី គ្រឿងបរិក្ខារបម្រើដល់វិស័យកសិកម្ម ការប្រែក្លាយតំបន់ដែលធ្លាប់តែច្បាំងវាយប្រយុទ្ធគ្នាទៅជាតំបន់សន្តិភាព សេដ្ឋកិច្ច ពាណិជ្ជកម្ម គឺដើម្បីសម្រួលជីវភាពរស់នៅកាត់បន្ថយបាននូវភាពក្រីក្រជូនប្រជាពលរដ្ឋយើងឱ្យបានកាន់តែឆាប់រហ័ស ដែលយើងបានឃើញទាំងអស់គ្នា។

ក្នុងឱកាសនោះដែរ លោកឧបនាយករដ្ឋមន្រ្តី កែ គឹមយ៉ាន បានបន្តថា ដោយសារជីវភាពប្រជាពលរដ្ឋមានការរីកចម្រើនធូរធារនិងប្រទេសមានសន្តិភាព សន្តិសុខទើបយើងអាចមកអង្គុយធ្វើបុណ្យជាមួយគ្នាបាន និងសូមអរគុណដល់ប្រជាលរដ្ឋទាំងអស់បានចូលរួមថែរក្សាសន្តិភាពជាមួយរាជរដ្ឋាភិបាលកម្ពុជាដឹកនាំដោយគណបក្សប្រជាជន ។ ជាមួយគ្នានេះ លោក កែ គឹមយ៉ាន បានពាំនាំនូវការសួរសុខទុក្ខ និងការថ្លែងអំណរគុណពីសំណាក់ថ្នាក់ដឹកនាំនៃគណបក្សប្រជាជនទាំងអស់ ដល់មន្រ្តីរាជការ កងកំលាំងប្រដាប់អាវុធ លោកគ្រូ អ្នកគ្រូ សិស្ស និស្សិតប្រជាពលរដ្ឋទាំងអស់នៅខេត្តបន្ទាយមានជ័យដែលបានបោះឆ្នោតជូនគណបក្សប្រជាជនកាលពីថ្ងៃទី០៤ ខែមិថុនា ឆ្នាំ២០១៧ និងសំណូមពរឱ្យអ្នកបោះឆ្នោតទាំងអស់បន្តគាំទ្របោះឆ្នោតជូនគណបក្សប្រជាជននៅឆ្នាំ២០១៨ខាងមុខ។

ក្នុងឱកាសនោះ លោកឧបនាយករដ្ឋមន្រ្តី កែ គឹមយ៉ាន បាននាំយកនូវអំណោយរួមមាន៖ ប្រជាពលរដ្ឋចំនួនជាង១២០០នាក់ ក្នុងម្នាក់ទទួលបានសារ៉ុង ១ ថវិកាបច្ច័យបុណ្យប្រគេនវត្តធម្មសាធរាម (វត្តភ្នំ៩៣) ចំនួន៥.១៤០.០០០រៀល អង្ករ២០០គីឡូក្រាម ទឹកស៊ីអ៊ីវ១០យួរ ទឹកត្រី១០យួរ ទឹកសុទ្ធ១០កេស មី១០កេស ទឹកក្រូច៥កេស ទឹកផ្លែឈើ៥កេស ជូនថវិកាឧបត្ថម្ភសាខាបក្សភូមិទាំង៨ក្នុង១សាខា២០ម៉ឺនរៀល គណបក្សឃុំអូរស្រឡៅ១លានរៀល ថវិកាដល់គណបក្សឃុំទាំង៥ ឃុំតាគង់ ឃុំម៉ាឡៃ ឃុំបឹងបេង ឃុំអូរសំព័រ ឃុំទួលពង្រ ក្នុង១ឃុំទទួលបានថវិកា៥០ម៉ឺនរៀល សាលារៀន១ខ្នង៦បន្ទប់នៅឃុំអូរស្រឡៅ ផ្លូវបេតុង១ខ្សែ១៤០០ម៉ែត្រ ស្ពានបាឡេមួយខ្សែប្រវែង២៤ម៉ែត្រនៅភូមិអូរកាច់ឃុំបឹងបេង អណ្ដូងស្នប់ចំនួន៧អណ្ដូង និងលូទឹក៨កង់ផងដែរ៕