ខេត្តបន្ទាយមានជ័យ សហការជាមួយមន្រ្តីគយ ចាប់បានទំនិញខូចគុណភាពជាង៦០០គីឡូក្រាម

បន្ទាយមានជ័យ៖ ក្រោមការបញ្ជាពីលោក ស៊ាន ស៊ីណាត ប្រធានសាខាកាំកុងត្រូលខេត្តបន្ទាយមានជ័យ និងមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត សាខាកាំកុងត្រូលខេត្ត សហការជាមួយកម្លាំងគយ និងរដ្ឋាករក្រុងប៉ោយប៉ែត បានចុះត្រួតពិនិត្យទំនិញក្នុងផ្សារ និងបានដកហូតទំនិញខូចគុណភាពជាង៦០០គីឡូក្រាម។

លោក ហុង លាង អនុប្រធានសាខាកាំកុងត្រូល ទទួលបន្ទុកប្រធានការិយាល័យប្រមូលចំណូល និងទីផ្សារ បានឲ្យដឹងថា ទំនិញដែលដកហូតបានមាន កន្ទួតត្រាំ១៤គីឡូក្រាម ទំពាំងបាយជូរត្រាំ ២៤គីឡូក្រាម ស្វាយត្រាំ ៧០គីឡូក្រាម ផ្លែម្ដេញត្រាំ ២៨គីឡូក្រាម ដំណាប់កន្ទួត ៦០៥គីឡូក្រាម។

ក្រៅពីត្រួតពិនិត្យគុណភាពទំនិញកម្លាំងមន្រ្តីពាក់ព័ន្ធ ក៏បានផ្សព្វផ្សាយណែនាំដល់ប្រជាពលរដ្ឋ និងអាជីវករឱ្យយល់ដឹងអំពីសុវត្ថិភាពចំណីអាហារ និងចូលរួមការពារសុខភាពរបស់ប្រជាពលរដ្ឋទាំងអស់គ្នា។ ក្រោយដកហូតទំនិញខូចគុណភាពបានហើយ កម្លាំងកាំកុងត្រូលខេត្តបាននាំទៅរក្សាទុក ដើម្បីត្រៀមកម្ទេចចោលនៅពេលក្រោយ៕