ពិធីបិទវគ្គហ្វឹកហ្វឺនបំប៉នជំនាញអាវុធគាំទ្រថ្មើរជើងជូនដល់នាយទាហាន នាយទាហានរង និងពលទាហានចំណុះទីបញ្ជាការដ្ឋានយោធភូមិភាគទី៤

 ឧត្តរមានជ័យ៖ នៅព្រឹកថ្ងៃទី៣១ ខែតុលា ឆ្នាំ២០២០ លោក ឌី រ៉ាដូ អភិបាលរងខេត្ត តំណាងដ៏ខ្ពង់ខ្ពង់ លោក ប៉ែន កុសល្យ អភិបាល នៃគណៈអភិបាលខេត្តឧត្តរមានជ័យ បានអញ្ជើញចូលរួមជាគណៈអធិបតីក្នុងពិធីបិទវគ្គហ្វឹកហ្វឺន បំប៉នជំនាញអាវុធគាំទ្រថ្មើរជើង ជូនដល់នាយទាហាន នាយទាហានរង និងពលទាហាន ចំណុះទីបញ្ជាការដ្ឋានយោធភូមិភាគទី៤ ក្រោមអធិបតីភាព ឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាពទី៤ នៅទីបញ្ជាការកណ្តាល (អូរកូនតឹង) ស្ថិតក្នុងភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប។

ក្នុងនោះក៏មានការអញ្ជើញចូលរួមពី អគ្គនាយករង អគ្គនាយកដ្ឋានភស្តុភា និងហិរញ្ញវត្ថុ ក្រសួងការពារជាតិ ប្រចាំទិសទី៤ មេបញ្ជាការរង នាយសេនាធិការ នាយសេនាធិការរង យោធភូមិភាគទី៤ អភិបាលរងខេត្តសៀមរាប មេបញ្ជាការកងពលតូចថ្មើរជើងលេខ ៤១ និង៤២ តំបន់ប្រតិបត្តិការសឹករងសៀមរាប ឧត្តរមានជ័យ កំពង់ធំ និងព្រះវិហារ កងការពារព្រំដែកគោកលេខ ៤០២ និង៤០៣ អង្គភាព ស្ថាប័នជំនាញ និងការិយាល័យ ចំណុះយោធភូមិភាគទី៤ទាំងអស់។

ថ្លែងនៅក្នុងពិធីនេះ ឧត្តមសេនីយ៍ឯក ពៅ ហេង បានពាំនាំនូវប្រសាសន៍ផ្ដាំផ្ញើសួរសុខទុក្ខនឹករឭកពីសំណាក់ថ្នាក់ដឹកនាំក្រសួងការពារជាតិ អគ្គបញ្ជាការ បញ្ជាការដ្ឋានកងទ័ពជើងគោកដែលជានិច្ចកាលតែងតែយកចិត្តទុកដាក់ដល់នាយទាហាន នាយទាហានរង និងពលទាហាននៃកងយោធពលខេមរភូមិន្ទជាប្រភពបន្តវេនទៅថ្ងៃអនាគត ជាពិសេសចំពោះនាយទាហាន នាយទាហានរង និងពលទាហានគ្រប់បណ្ដាកងឯកភាព ដែលឈរជើងនៅតាមបណ្ដោយបន្ទាត់ព្រំដែនដើម្បីធានាការពារបូរណភាពទឹកដី ការពារប្រជាជនឱ្យរស់នៅបានសុខសាន្តនិងបានកោតសរសើរក្នុងការខិតខំប្រឹងប្រែងយកចិត្តទុកដាក់គ្រប់បណ្តាកងឯកភាពចំណុះយោធភូមិភាគទី៤ ដែលបានត្រៀមកម្លាំងអន្តរាគមន៍ដោះស្រាយនូវគ្រោះមហន្តរាយផ្សេងៗនៅក្នុងទិសទទួលខុសត្រូវនិងបានប្រមូលផ្តុំកម្លាំង១០០% សម្រាប់ជួយសង្គ្រោះប្រជាពលរដ្ឋ ដែលរងការវាយប្រហារពីបាតុភូតផ្សេងៗ។

វគ្គហ្វឹកហ្វឺនបំប៉នជំនាញអាវុធគាំទ្រថ្មើរជើង នេះ មានរយៈពេល៩១ថ្ងៃ ស្មើនឹង៦៣៧ម៉ោង ដោយគិតចាប់ពីថ្ងៃទី០១ ខែសីហា ដល់ថ្ងៃទី៣១ ខែតុលា ឆ្នាំ២០២០។ មានកម្មសិក្សាការីចំនួន៨០នាក់ មកពីបណ្តាកងឯកភាពចំណុះយោធភូមិភាគទី៤៕