ពិធីបូជាប្រទីបព្រះខែក្នុងពិធីបុណ្យអកអំបុក បណ្តែតប្រទីប សំពះ ព្រះខែ ក្នុងវត្តវារីផាសុខារាម

 កំពង់ឆ្នាំង៖ នាយប់ថ្ងៃទី៣១ ខែតុលា ឆ្នាំ២០២០ លោក សុខ សន្ធីរ អភិបាលរងស្រុកទឹកផុស និងភរិយា បានអញ្ជើញចូលរួមពិធីបូជាប្រទីបព្រះខែ ក្នុងពិធីបុណ្យអកអំបុក បណ្តែតប្រទីប សំពះ ព្រះខែ ក្នុងវត្តវារីផាសុខារាម ហៅវត្តទឹកជុំ ឬអង្គជុំ ស្ថិតនៅក្នុងឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង ការបូជាប្រទីបនេះធ្វើឡើងដើម្បីដឹងពីទឹកភ្លៀង ដើមឆ្នាំ កណ្តាលឆ្នាំ និងចុងឆ្នាំ។

ពិធីបូជាប្រទីបព្រះខែ ក្នុងពិធីបុណ្យអកអំបុក បណ្តែតប្រទីប សំពះ ព្រះខែ រៀបចំដោយ ព្រះគ្រូវិចិត្រសីលញាណ ខុន ឆុន ជំនួយការសម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជ នៃព្រះរាជាណាចក្រកម្ពុជា និជាព្រះចៅអធិការវត្ត វារីផាសុខារាម ហៅវត្តទឹកជុំ ឬអង្គជុំ។

ព្រះគ្រូវិចិត្រសីលញាណ ខុន ឆុន មានសង្ឃដីការថា ដោយប្រទេសមានសុខសន្តិភាព ក្រោមការដឹកនាំរបស់ លោក ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ទើបវិស័យព្រះពុទ្ធចក្រ និងអាណាចក្រ មានការរីកចម្រើនជាលំដាប់។ ព្រះអង្គបានមានសង្ឃដីការ ថ្លែងអំណរអរគុណចំពោះ ថ្នាក់ដឹកនាំស្រុក ពុទ្ធបរិស័ទ ដែលបានអញ្ជើញចូលរួម ពិធីបុណ្យអកអំបុក បណ្តែតប្រទីប សំពះ ព្រះខែ ក្នុងពេលរាត្រីនេះយ៉ាងច្រើនកុះករ នឹងសូមសមប្រកបបាននូវសេចក្តីសុខ សេចក្តីចម្រើន ទទួលបានជោគជ័យគ្រប់ភារៈកិច្ច និងជួបប្រទះនូវពុទ្ធទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕