លោក ងួន រតនៈ ថ្លែងអំណរគុណដល់កងកម្លាំងគ្រប់ប្រភេទក្នុងការជួយសង្គ្រោះប្រជាពលរដ្ឋរងគ្រោះទឹក ជំនន់ ក្នុងខេត្តបាត់ដំបង

 បាត់ដំបង៖ នៅថ្ងៃទី៣១ ខែវិច្ឆកា ឆ្នាំ២០២០ លោក ងួន រតនៈ អភិបាល នៃគណៈអភិបាលខេត្ត ចូលរួមពិធីសំ ណេះសំណាលសួរសុខទុក្ខ និងនាំយកអំណោយរបស់លោកនាយករដ្ឋមន្ត្រី ហ៊ុន សែន និងភរិយា តាមរយៈលោក ដួង ដារា អនុរដ្ឋលេខាធិការ ទីស្តីការគណៈរដ្ឋមន្ត្រី និងជាជំនួយការផ្ទាល់ជូនដល់គ្រួសាររងគ្រោះទឹកជំនន់ នៅស្រុកសំឡូត ខេត្តបាត់ដំបង ចំនួន ១០០០ គ្រួសារ ដែលមានការអញ្ជើញចូលរួមពីគណៈប្រតិភូមអមដំណើរ អស់លោក លោកស្រី អាជ្ញាធរមូលដ្ឋានជាច្រើនរូបផងដែរ។

ក្នុងឱកាសពិធីសំណេះសំណាលសួរសុខទុក្ខនេះដែរ លោក ងួន រតនៈ បានថ្លែងអំណរគុណយ៉ាងជ្រៅចំពោះកងកម្លាំងទាំងបីប្រភេទ ដែលខិតខំជួយសង្គ្រោះប្រជាពលរដ្ឋមកនៅទីទួលមានសុវត្ថិភាពបានទាន់ពេលវេលាក្រោមការយកចិត្តទុក្ខដាក់ពីសំណាក់ថ្នាក់ដឹកនាំគ្រប់លំដាប់ថ្នាក់ ដែលបានផ្តល់មធ្យាបាយ សម្ភារៈ និងស្បៀងអាហារសម្រាប់ដោះស្រាយជីវភាពមួយរយៈ ដើម្បីជួយសម្រាលទុក្ខលំបាករបស់ប្រជាពលរដ្ឋយើង ដែលជួបគ្រោះទឹកជំនន់ផងដែរ។

គួរបញ្ជាក់ផងដែរថា អំណោយបានចែកជូនប្រជាពលរដ្ឋរងគ្រោះដោយទឹកជំនន់នាពេលនោះជាអំណោយដ៏ថ្លៃថ្លារបស់លោកទាំងទ្វេ ហើយក្នុងមួយគ្រួសារទទួល អង្ករ មី ត្រីខ ទឹកសុទ្ធ និងថវិកា ៥ម៉ឺនរៀលផងដែរ៕