ពិធីផ្តល់អំណោយសម្ភារៈជាគ្រឿងឧបភោគ បរិភោគរបស់សាលាអនុគណក្រុងកំពង់ចាម

កំពង់ចាម៖ នៅថ្ងៃទី០២ ខែវិច្ឆិកា ឆ្នាំ២០២០ នៅសាលាខេត្តកំពង់ចាម លោក អ៊ុន ចាន់ដា អភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្តកំពង់ចាម បានអញ្ជើញទទួលអំណោយជាគ្រឿងឧបភោគ បរិភោគ សម្ភារៈប្រើប្រាស់ និងថវិកា ពីសាលាអនុគណក្រុងកំពង់ចាម ដែលដឹកនាំដោយព្រះបដ្ឋនវង្សាចារ្យ សា វីរៈ ព្រះអនុគណក្រុងកំពង់ចាម និងជាព្រះចៅអធិការវត្តខេមវ័នបឹងស្នាយ ក្រុងកំពង់ចាម។ ក្នុ្ងងកម្មវិធីក៏មានការនិមន្តចូលរួមពីមន្ត្រីសង្ឃនៃសាលាអនុគណក្រុងកំពង់ចាម និងមានការអញ្ជើញចូលរួមពីលោក លោកស្រីអភិបាលរងខេត្ត និងអាចារ្យគណៈកម្មការវត្តទាំង៤ ក្នុងក្រុងកំពង់ចាមផងដែរ។

លោក អ៊ុន ចាន់ដា អភិបាលខេត្ត និងជាប្រធានគណៈកម្មាធិការគ្រប់គ្រងគ្រោះមហន្តរាយ ខេត្តកំពង់ចាម បានថ្លែងអំណរគុណ ចំពោះមន្ត្រីសង្ឃនៃសាលាអនុគណក្រុងកំពង់ចាម ក៏ដូចជាព្រះគ្រូចៅអធិការវត្តទាំង៤ រួមជាមួយមន្ត្រីសង្ឃគ្រប់ឋានាក្រម នៅក្នុងក្រុងកំពង់ចាម ដែលបានយកព្រះទ័យទុកដាក់ ជួយដល់ប្រជាពលរដ្ឋដែលជួបគ្រោះមហន្តរាយនានាក្នុងខេត្ត និងបាននាំយកនូវអំណោយជាគ្រឿងឧបភោគ បរិភោគ សម្ភារៈប្រើប្រាស់ និងថវិកា ផ្ដល់ជូនគណៈកម្មាធិការគ្រប់គ្រងគ្រោះមហន្តរាយខេត្ត នាឱកាសនេះ។ លោកអភិបាលខេត្ត បានចាត់ទុកកាយវិការនេះ គឺជាវប្បធម៌ នៃការចែករំលែក ដែលបុព្វបុរសខ្មែរយើង បានបន្សល់ទុក តាំងពីអតីតមកបច្ចុប្បន្ន ហើយត្រូវបានប្រមុខដឹកនាំរាជរដ្ឋាភិបាលកម្ពុជា ក៏ដូចជា មន្ត្រីក្រោមឱវាទ តែងតែងបានផ្សាភ្ជាប់វប្បធម៌នេះ ជារៀងមកផងដែរ ។  លោក អ៊ុន ចាន់ដា ក៏បានសន្យា នាំអំណោយទាំងអស់នេះ ទៅបន្តជួយដល់ប្រជាពលរដ្ឋដែលរងគ្រោះ និងងាយរងគ្រោះ នៅក្នុងមូលដ្ឋាននីមួយៗ នៃភូមិសាស្ត្រខេត្តកំពង់ចាម ជាបន្តទៀត ។

អំណោយសម្ភារៈ ជាគ្រឿងឧបភោគ បរិភោគ និងសម្ភារៈប្រើប្រាស់ រួមមាន ៖ អង្ករ ១.០៨០គីឡូក្រាម មី១០០កេស ទឹកត្រី ២២យួរ ទឹកស៊ីអ៊ីវ ២២យួរ ទឹកក្រូច ០៧កេស ថវិកា ១លានរៀល រួមនឹងសម្ភារៈប្រើប្រាស់មួយចំនួន ត្រូវបានព្រះមន្ត្រីសង្ឃនៃសាលាអនុគណក្រុងកំពង់ចាម ផ្ដល់ជូនគណៈកម្មាធិការគ្រប់គ្រងគ្រោះមហន្តរាយខេត្ត សម្រាប់ចែកជូនប្រជាពលរដ្ឋដែលរងគ្រោះដោយសារគ្រោះមហន្តរាយនានា ក្នុងខេត្តកំពង់ចាម៕