ពិធីបុណ្យអុំទូក បណ្តែតប្រទីប និងសំពះ ព្រះខែ អកអំបុក វត្តប៉ាឆា ក្រុងក្រចេះ

 ក្រចេះ៖ នៅថ្ងៃទី៣១ ខែតុលា ឆ្នាំ២០២០ ដែលជាយប់ថ្ងៃ១៥កើត ព្រះច័ន្ទពេញបូណ៌មី និងជាថ្ងៃបុណ្យប្រពៃណីជាតិខ្មែរដ៏ធំមួយផងដែរ គឺបុណ្យអុំទូក បណ្តែតប្រទីប និងសំពះព្រះខែ អកអំបុក វត្តរដ្ឋបាលារាម(វត្តប៉ាឆា) ក្រុងក្រចេះ មានប្រារព្វពិធី ដាល់អំបុក អកអំបុក និងបណ្តែតប្រទីប សំពះព្រះខែ ក្រោមវត្តមានអញ្ជើញចូលរួមពីលោក វ៉ា ថន អភិបាលខេត្ត និងភរិយា រួមនិងអភិបាលរងខេត្ត មន្រ្តីរាជការ និងប្រជាពលរដ្ឋ ពុទ្ធបរិស័ទជាច្រើនកុះករផងដែរ។

លោក វ៉ា ថន អភិបាលខេត្ត មានប្រសាសន៍បញ្ជាក់ថា ព្រះរាជពិធីបុណ្យបុណ្យអុំទូក បណ្តែតប្រទីប និងសំពះព្រះខែ អកអំបុក គឺជាបុណ្យប្រពៃណីរបស់ដូនតាខ្មែរយើង បាននាំគ្នាប្រារព្វធ្វើឡើងជារៀងរាល់ឆ្នាំតាមការកំណត់ ជាពិសេសគឺពិធីធំដែលតែងតែប្រារព្វនៅមុខព្រះបរមរាជវាំង នៅរាជធានីភ្នំពេញ។ ប៉ុន្តែក្នុងឆ្នាំនេះ ជាការខកខាន ដោយប្រទេសកម្ពុជា ក៏ដូចជាទូទាំងប្រទេស ជួបនូវគ្រោះមហន្តរាយ ដោយជម្ងឺរាលត្បាតផ្លូវដង្ហើម គឺកូវីដ-១៩ ហើយជាពិសេសទៀតនោះ គឺកម្ពុជាបានទទួលរងនូវគ្រោះធម្មជាតិ ជំនន់ទឹកភ្លៀង ដែលធ្វើឲ្យប៉ះពាល់ដល់សេដ្ឋកិច្ច និងហេដ្ឋារចនាសម្ព័ន្ធនៅតាមបណ្តាលខេត្តមួយចំនួន។

លោក ក៏បានថ្លែងអំណរអរគុណចំពោះព្រះចៅអធិការវត្តរដ្ឋបាលារាម ហៅវត្តប៉ាឆា ដែលតែងតែប្រារព្ធពិធីបុណ្យនេះជារៀងរាលឆ្នាំមក ហើយឆ្នាំនេះគឺជាឆ្នាំលើកទី១៤នៃការប្រារព្វពិធីបុណ្យអុំទូក បណ្តែតប្រទីប និងសំពះ ព្រះខែ អកអំបុក វត្តប៉ាឆា ក្រុងក្រចេះ។ ទន្ទឹមនឹងនោះ យើងទាំអស់គ្នា ក៏មិនត្រូវមានការធ្វេសប្រហែសចំពោះបញ្ហាគម្លាតសង្គម និងវិធានការការពារពីជម្ងឺផ្លូវដង្ហើមកូវីដ-១៩ផងដែរ បើទោះបីស្ថានភាពពេលនេះ មានការថយចុះក៏ដោយ តែយើងក៏មិនត្រូវភ្លេចវានោះទេ ត្រូវបន្តពង្រឹង និងអនុវត្តនូវវិធានការរបស់ក្រសួងសុខាភិបាលឲ្យបានខ្ជាប់ខ្ជួន ជាពិសេសត្រូវចូលរួមគោរពច្បាប់ចរាចរណ៍ឲ្យបានទាំងអស់គ្នា៕