នៅថ្ងៃទី៣០ ខែឧសភា ឆ្នាំ២០១៧ លោក ម៉ៅ ភិរុណ អភិបាលនៃគណ:អភិបាលខេត្តកណ្តាល រួមជាមួយ លោកស្រី ជ្រឹង បទុមរង្សី អនុរដ្ឋលេខាធិការក្រសួងប្រៃសណីយ៍ និងទូរគមនាគមន៍ និងជាប្រធានក្រុមការងារថ្នាក់ជាតិចុះជួយឃុំកោះអន្លង់ចិន បានអញ្ជើញជាអធិបតីក្នុងពិធីបើកការដ្ឋានសាងសង់ផ្លូវបេតុងអាមេមួយខ្សែ ក្នុងឃុំកោះអន្លង់ចិន ស្រុកស្អាង ខេត្តកណ្តាល ជាមួយនឹងវត្តមានពីអ្នកពាក់ព័ន្ធ និងប្រជាពលរដ្ឋចំនួន ១០៤១ នាក់។ គួរបញ្ជាក់ថា ផ្លូវដែលបើកការដ្ឋាននាថ្ងៃនេះ មានប្រវែង១០០០ ម៉ែត្រ ទទឹង៤ ម៉ែត្រ កម្រាស់ ០,១៥ ម៉ែត្រ សាងសង់ឡើងដោយប្រើប្រាស់ថវិកាគុណប្រយោជន៍ឆ្នាំ២០១៧ រយៈពេលសាងសង់ ០៣ ខែ។
នៅក្នុងឱកាសនោះ លោក ម៉ៅ ភិរុណ បានបញ្ជាក់ថា សមិទ្ធផលដែលយើងនឹងបើកការដ្ឋាននៅថ្ងៃនេះ គឺដើម្បីឆ្លើយតបតម្រូវការរបស់ប្រជាពលរដ្ឋនៅទីនេះ។ ថ្លែងនូវការអបអរសាទរជាមួយបងប្អូនប្រជាពលរដ្ឋនៅក្នុងឃុំកោះអន្លង់ចិន ដែលនឹងទទួលបាននូវផ្លូវបេតុងថ្មីមួយខ្សែបន្ថែមលើសមិទ្ធផលជាច្រើនដែលកោះអន្លង់ចិនមាន ព្រមទាំងមានក្តីសង្ឃឹមជឿជាក់ថា ផ្លូវបេតុងថ្មីនេះ នឹងជួយលើកកម្ពស់កម្រិតជីវភាពរស់នៅរបស់ប្រជាពលរដ្ឋ ជាពិសេសជួយសម្រួលដល់ការធ្វើដំណើរ ទៅសិក្សា និងដឹកជញ្ជូនកសិផលទៅលក់នូវទីផ្សារ។
លោក ម៉ៅ ភិរុណ ក៏បានណែនាំដល់មន្ទីរសេដ្ឋកិច្ច និងហិរញ្ញវត្ថុ ត្រូវពិនិត្យ ណែនាំដល់ម្ចាស់កំពង់ចម្លង មិនត្រូវអោយយកលុយពីសិស្សានុសិស្ស ឆ្លងទៅរៀននោះទេ។ លោក ក៏បានប្រកាសផ្តល់ផ្លូវបេតុងប្រវែង១០០០ ម៉ែត្រ ដល់ឃុំកោះអន្លង់ចិន ប្រើប្រាស់ថវិកាគុណប្រយោជន៍ឆ្នាំ២០១៨ និងបានប្រគេនថវិកា ៤០០០ ដុល្លារសម្រាប់ទិញឥដ្ឋការ៉ូ រៀបចំលម្អនៅក្នុងវត្តជោតិរង្សី ស្ថិតនៅភូមិក្បាលកោះ ព្រមទាំងប្រកាសផ្តល់ដីចំនួន ១០០ ឡាន សម្រាប់ចាក់បំពេញទីធ្លាសាលាបឋមសិក្សា ហ៊ុន សែន កណ្តាលកោះ ស្ថិតក្នុងភូមិកណ្តាលកោះ។
ជាទីបញ្ចប់ លោកអភិបាលខេត្ត ក៏បានសំណូមពរដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោតសូមអញ្ជើញទៅបោះឆ្នោតអោយបានគ្រប់ៗគ្នា នាថ្ងៃទី៤ ខែមិថុនា ឆ្នាំ២០១៧ ហើយសូមបងប្អូនបោះឆ្នោតដើម្បីការពារសន្តិភាពយូរអង្វែង ការពង្រឹងប្រជាធិបតេយ្យ បន្តការអភិវឌ្ឍន៍ប្រទសជាតិយើងឱ្យរីកចម្រើន និងបន្តលើកកម្ពស់ជីវភាពរបស់ប្រជាពលរដ្ឋនៅមូលដ្ឋានយើងជាបន្តបន្ទាប់ទៀត៕
No comments:
Post a Comment