ទស្សនវិភាគ៖ សន្លឹកឆ្នោតក្នុងតម្លៃរក្សាសន្តិភាពដើម្បីអភិវឌ្ឍន៍បន្តឬក៏ក្នុងតម្លៃសន្យាខ្យល់?

សន្លឹកឆ្នោតសម្រាប់បរិបទកម្ពុជា គឺមានជម្រើសពីរ៖ ១-គឺប្រជាពលរដ្ឋខ្មែរសម្តែងឆន្ទៈលើសន្លឹកឆ្នោតក្នុងសតិសម្បជញ្ញៈផ្តល់តម្លៃដល់ការថែរក្សាសន្តិភាព ដើម្បីសេចក្តីសុខក្សេមក្សាន្ត ជាមួយនឹងកិច្ចអភិវឌ្ឍន៍បន្ត និងធ្វើឱ្យកាន់តែប្រសើរឡើងតាមរយៈផ្លែផ្កានៃកំណែទម្រង់ស៊ីជម្រៅ និងគ្រប់ជ្រុងជ្រោយ។

ដើម្បីសម្រេចបាននូវវត្ថុបំណងនេះ គឺប្រជាពលរដ្ឋសម្រេចចិត្តគូសលើសន្លឹកឆ្នោតត្រង់រូបទេវតាបាចផ្កា ដែលប្រជាពលរដ្ឋហៅរត់មាត់ថា គណបក្សសម្តេច ហ៊ុន សែន ឈ្មោះផ្លូវការ «គណបក្សប្រជាជនកម្ពុជា»។ ពលរដ្ឋគ្រប់ៗរូបទទួលផលជាក់ស្តែងរៀងៗខ្លួន ពីសន្តិភាព និងការអភិវឌ្ឍន៍នៃទង្វើប្រកបដោយផ្លែផ្កាជាក់ស្តែង។

២-បើនរណាចង់ប្រថុយសាកល្បងរបស់ថ្មី ជាមួយនឹងការសន្យាខ្យល់នោះមានជម្រើសមួយទៀត គឺគណបក្សសង្គ្រោះជាតិ។ គណបក្សប្រឆាំងមួយនេះ មិនដែលទទួលស្គាល់សមិទ្ធផលជាតិដែលគណបក្សប្រជាជនកម្ពុជា បានដឹកនាំកសាងមកទល់ពេលនេះទេ។ ផ្ទុយទៅវិញ មេដឹកនាំគណបក្សសង្គ្រោះជាតិ សន្យាបើឈ្នះឆ្នោតកសាងអ្វីៗ គឺថ្មីស្រឡាង។ បើទោះបីលោក កឹម សុខា ធ្លាប់សន្យាកាលឆ្នាំ២០១២ ថាបើគណបក្សគាត់ឈ្នះបានមេឃុំ គឺចាស់ៗក្នុងឃុំនោះនឹងបានលុយបួនម៉ឺនរៀលក្នុងមួយខែ តែឥឡូវជិតផុតអាណត្តិមេឃុំចាស់របស់លោក កឹម សុខា ទៅហើយ ចាស់ៗអត់ឃើញលុយបួនម៉ឺនរៀលម្តងណាទាល់តែសោះ។

មិនតែប៉ុណ្ណោះចូលដល់បោះឆ្នោតអាណត្តិថ្មី លោក កឹម សុខា ស្ងាត់ឈឹងលែងនិយាយរឿងបួនម៉ឺនរៀល បែរជាមកសន្យារឿងលុយកន្លះលានដុល្លារមួយឆ្នាំសម្រាប់ឃុំនីមួយៗវិញម្តង។ ដូច្នេះសន្យាបួនម៉ឺនរៀលកាលប្រាំឆ្នាំមុន រួមទាំងសន្យាខ្យល់ផ្សេងៗទៀត វាពិតជា «សន្យាខ្យល់» មែន។ រីឯ អ្នកច្រឡំបោះឆ្នោតគាំទ្រគណបក្សលោក កឹម សុខា កាលឆ្នាំ២០១២ និង២០១៣ កំពុងខកចិត្ត និងខឹងសម្បារយ៉ាងខ្លាំង ស្រាប់តែ២០១៧ ត្រូវការសន្លឹកឆ្នោតទៀត លោក កឹម សុខា និងជួរដឹកនាំគណបក្សសង្គ្រោះជាតិ ចូលដល់វោហារស័ព្ទសន្យាថ្មី ភ្លេចសន្យាចាស់។ ដូច្នេះអ្នកណាដែលមិនទាន់អស់ចិត្ត ចេះតែសង្ឃឹមជឿទៀតទៅ តែសម្រាប់អ្នកដែលខកចិត្ត និងអស់ចិត្តពិតជាសម្រេចចិត្តផ្សេង លែងប្រថុយនឹងវោហាស័ព្ទសន្យាខ្យល់របស់លោក កឹម សុខា តទៅទៀតហើយ៕

ដោយ៖ សម្លេងយើង