សមាជិកគណបក្សសង្គ្រោះជាតិទូទាំងខេត្តបន្ទាយមានជ័យជាង២ពាន់នាក់ ចាកចេញពីបក្ស មករួមរស់ជាមួយគណបក្សប្រជាជនកម្ពុជាដោយសារបាក់ទឹកចិត្ត និងអស់ជំនឿ

គិត​ត្រឹមថ្ងៃទី៣១ ខែឧសភា ឆ្នាំ២០១៧នេះ នៅសល់តែ៤ថ្ងៃទៀតតែប៉ុណ្ណោះ ដល់ថ្ងៃបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ហើយ ប៉ុន្ដែអ្វីដែលគួរឱ្យកត់សម្គាល់នោះ ថ្នាក់ដឹកនាំ និងសកម្មជន​របស់គណបក្សសង្គ្រោះជាតិ ទូទាំងខេត្តបន្ទាយមានជ័យ ប្រមាណជាង២ពាន់នាក់ បានចាកចេញពីគណបក្សមួយនេះ ហើយសុំរួមរស់ជីវភាពនយោបាយជាមួយគណបក្សប្រជាជនកម្ពុជា ដែលជាបក្សមានភាពចាស់ទុំ និងមិនចេះសន្យាខ្យល់។

លោក អាត់ ខែម បានបញ្ជាក់ថា ក្រោមការណែនាំពីលោកនាយករដ្ឋមន្រ្តី ហ៊ុន សែន ប្រធានគណបក្សប្រជាជនកម្ពុជា និងក្រោមការដឹកនាំផ្ទាល់ពី លោកឧបនាយករដ្ឋមន្ដ្រី កែ គឹមយ៉ាន ប្រធានក្រុមការងារចុះជួយខេត្តបន្ទាយមានជ័យ បានធ្វើឱ្យថ្នាក់ដឹកនាំ និងសកម្មជនរបស់គណបក្សប្រឆាំង យល់ច្បាស់ពីគោលនយោបាយរបស់បក្សកាន់អំណាច ដែលមិនបោកប្រាស់ ភូតភរដូចបក្សប្រឆាំងឡើយ ពោលគណបក្សប្រឆាំង មិនដែលបានធ្វើអ្វីសម្រេចជូន​ពលរដ្ឋបានម្ដងនោះទេ មានតែយកសមិទ្ធផលរបស់បក្សកាន់អំណាចទៅអួតថារបស់ខ្លួនតែប៉ុណ្ណោះ កត្តាទាំងនេះហើយ ដែលធ្វើឱ្យសកម្មជនទាំងនោះ ភ្លឺភ្នែក និងងាកមករួមរស់ជាមួយគណបក្សប្រជាជនកម្ពុជាវិញ។

លោក បានបន្ថែមថា លោកឧបនាយករដ្ឋមន្ដ្រី កែ គឹមយ៉ាន បានទទួលស្វាគមន៍ថ្នាក់ដឹកនាំ និងសកម្មជនទាំងនោះ យ៉ាងរួសរាយរាក់ទាក់ ប្រកបដោយភាពកក់ក្ដី ដែលនេះសបញ្ជាក់ឱ្យឃើញថា គណបក្សប្រជាជនកម្ពុជា តែងតែបន្ទន់កាយចិត្ត ទទួលយកសមាជិកថ្មីជានិច្ច ដោយមិនប្រកាន់ពីនិន្នាការនយោបាយចាស់ឡើយ។

បើតាមលោក អាត់ ខែម ក្រៅពីសកម្មជនរបស់គណបក្សសង្គ្រោះជាតិ ក៏នៅមានគណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិដែរ ដែលបានចូលមករួមរស់ជាមួយគណបក្សប្រជាជនកម្ពុជា សរុបជិត៣ពាន់នាក់។ សកម្មជន សមាជិក បានថ្លែងស្រដៀងៗគ្នាថា ការចាកចេញនោះដែរ ទន្ទឹមដែលថ្នាក់ដឹកនាំកំពូលគណបក្សប្រឆាំងមួយនេះ កំពុងមានរឿងអាស្រូវស្រីញី បែកធ្លាយ ការកំណត់ឱ្យចៅសង្កាត់ និងមេឃុំជាប់ឆ្នោត ត្រូវរកប្រាក់បង់ចូលបក្សសង្រ្គោះជាតិ រឿងអាស្រូវពុករលួយ យកប្រាក់បានមកពីការរៃអង្គាសប្រាក់ ពីសប្បុរសជនក្នុង និងក្រៅប្រទេសបើកទូរទស្សន៍ព្រះអាទិត្យ យកមកចាយវាយអស់ រឿងអាស្រូវអំពើអយុត្តិធម៌ ពាក់ព័ន្ធអ្នកមានប្រាក់ឱ្យឈរឈ្មោះ បេក្ខជនឃុំសង្កាត់ លំដាប់លេខរៀងទី១ បើអ្នកអត់លុយត្រូវដាក់លេខរៀង នៅតាមក្រោយអ្នកដែលបានបង់ប្រាក់ តាមលំដាប់ជាបន្តបន្ទាប់ ។

ការចេញនោះដែរខណៈដែលគណបក្សសង្រ្គោះជាតិ ដាក់ចេញនូវគោលនយោបាយដូរមេឃុំបម្រើបក្ស ដាក់មេឃុំបំរើរាស្រ្ត ដែលជាគោលនយោបាយបំបែកបំបាក់ឱ្យខ្មែរ និងខ្មែរបែកបាក់គ្នា និងមានការរើសអើង គណបក្សសង្រ្គោះជាតិ ក៏កំពុងបាត់បង់អ្នកគាំទ្រនៅខាងក្រៅប្រទេសផងដែរ៕