នៅថ្ងៃទី០៣ ខែ មេសា ឆ្នាំ២០១៧ នេះ លោកនាយករដ្ឋមន្រ្តី ហ៊ុន សែន បានអំពាវនាវអាជ្ញាធរខេត្តរៀបចំកម្មវិធីសង្ក្រាន្តដើម្បីទាក់ទាញទេសចរក្នុងឱកាសបុណ្យចូលឆ្នាំ។ លោក បានថ្លែងដូចនេះ ក្នុងឱកាសអញ្ជើញជាអធីបតីសម្ពោធដាក់ឱ្យប្រើប្រាស់ជាផ្លូវការ «មហាវិថីសម្តេចតេជោ ហ៊ុន សែន» ហៅផ្លូវ៦០ម៉ែត្រ ដែលជាផ្លូវធំដំបូងគេក្នុងរាជធានីភ្នំពេញ។
ប្រមុខរាជរដ្ឋាភិបាលកម្ពុជា លោកនាយករដ្ឋមន្រ្តី ហ៊ុន សែន បានបញ្ជាក់ថា តំបន់ទេសចរណ៍ ធំៗដែលលាតសន្ធឹងកាន់តែធំទៅៗ មិនគ្រាន់តែសៀមរាបដែលមានអង្គរសង្រ្កាន្តនោះទេ ឆ្នាំនេះ ក៏មានសង្រ្កាន្តនៅតាមខេត្តមួយចំនួនទៀតដូចជាខេត្តព្រៃវែងជាដើម ដែលឆ្នាំទៅលោក ក៏បានអំពាវនាវថា សង្រ្កាន្តមិនចាំបាច់តែធ្វើនៅអង្គរនោះទេ សង្រ្កាន្តអាចរៀបចំនៅតាមខេត្ត នានាដើម្បីផ្តល់ឱកាសឱ្យប្រជាពលរដ្ឋរបស់យើងមានការជួបជុំ កំសាន្ត និងសប្បាយ។
លោកនាយករដ្ឋមន្រ្តី ហ៊ុន សែន ក៏បានបញ្ជាក់ថា តំបន់ទេសចរណ៍ពិតជាមានច្រើនឥឡូវនេះ ហើយជាតំបន់ដែលប្រជាពលរដ្ឋចូលចិត្តធ្វើដំណើរទៅកាន់តំបន់ទាំងនោះ សូមតំបន់ទាំងនោះទាក់ទាញទេសចរទៅដើម្បីបង្កើតឡើងនូវមុខរបរក្នុងវិស័យទេសចរណ៍។ ដើម្បីធានាបានលើបញ្ហានេះ អាជ្ញាធរដែនដីដែលគ្រប់គ្រងនៅតំបន់នោះ ត្រូវរៀបចំសន្តិសុខ និងសណ្តាប់ធ្នាប់ឱ្យបានល្អ អ្នកលក់ដូរទាំងឡាយនៅតំបន់នោះ ត្រូវខិតខំរក្សានូវតម្លៃ ចៀសវាង ការលក់ដំឡើងថ្លៃធ្វើឱ្យគេរាងចាល ហើយបាត់បង់នូវភាពប្រកួតប្រជែងទាក់ទាញទេសចរទៅ សារជាថ្មី។ អ្នកដែលឆ្លាតគឺអ្នកដែលយកចំណេញតិច ក៏ប៉ុន្តែលក់បានច្រើន ឯអ្នកល្ងង់លក់បានតិច តែបានថ្លៃខ្ពស់ ហើយលក់បានតែម្តង ពីរដង គេរាងចាល អាហ្នឹងគេហៅថា «រកស៊ីកោរគេ»។
លោកនាយករដ្ឋមន្រ្តី ហ៊ុន សែន ក៏បានលើកឡើងថា គ្រប់តំបន់ទេសចរណ៍ ត្រូវមានការឈ្លាសវៃដើម្បីធានាឱ្យអតិថិជនដែលទៅកាន់តំបន់ទេសចរណ៍ដែលទើបបង្កើតថ្មីទៅលេងឆ្នាំ នេះហើយ ពេលក្រោយទៅលេងបន្តបន្ទាប់ទៀត។ ដើម្បីធានាថា តំបន់ទេសចរណ៍កើតថ្មីនោះ គឺជាទេសចរណ៍ដែលមានការទាក់ទាញនៅពេលខាងមុខ។ ឆ្នាំ២០១៦កន្លងទៅ យើងទទួល បានទេសចរបរទេស ជាង៥លាននាក់ ប៉ុន្តែយើងមិនត្រូវភ្លេចថា ទេសចរផ្ទៃក្នុងជាទេសចរដែលមិនចេះរីងស្ងួត ហើយជាទេសចរដែលប្រជាជនទទួលបានប្រាក់ចំណូលនៅឯមូលដ្ឋាន។
លោកនាយករដ្ឋមន្រ្តី ហ៊ុន សែន ក៏បានថ្លែងថា នៅឆ្នាំនេះ ជាមួយនឹងប្រាក់ចំណូលកើនឡើង របស់ប្រជាពលរដ្ឋ ជាមួយនឹងប្រាក់ខែដែលទើបឡើងថ្មីរបស់មន្រ្តីរាជការ កងកម្លាំងប្រដាប់អាវុធ និងកម្មករ កម្មការិនីរបស់យើង ផលប្រយោជន៍នោះវានឹងរាយប៉ាយនៅក្នុងក្របខណ្ឌទូទាំងប្រទេសរបស់យើង៕
No comments:
Post a Comment