លោកស្រី ម៉ែន សំអន លើកឡើងថា គ្រប់សាសនានៅកម្ពុជាសុទ្ធតែបានផ្ដល់នូវសុខដុមនីយកម្មក្នុងការអភិវឌ្ឍសង្គមជាតិ

ឧបនាយករដ្ឋមន្ត្រី ម៉ែន សំអន រដ្ឋមន្ដ្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច តំណាងដ៏ខ្ពង់ខ្ពស់ លោកនាយករដ្ឋមន្រ្តី ហ៊ុន សែន បានអញ្ជើញជាអធិបតី បានថ្លែងថា លើកឡើងថា គ្រប់សាសនានៅកម្ពុជាសុទ្ធតែបានផ្ដល់នូវសុខដុមមនីយកម្មក្នុងការអភិវឌ្ឍសង្គមជាតិ។ លោកស្រី បានថ្លែងដូចនេះ ក្នុងឱកាសបិទពិធីសូត្រគម្ពីរអាល់គួរអានថ្នាក់ជាតិ លើកទី២៦ នៅម៉ាស្ជិទអាល់មូបារ៉ាក់ ស្ថិតក្នុងភូមិពោធិ៍ឥន្ធ ឃុំកោងកាង ស្រុកពញាក្រែក ខេត្តត្បូងឃ្មុំ នារសៀលថ្ងៃទី០២ ខែមេសា ឆ្នាំ២០១៧។

លោកស្រីបានបញ្ជាក់ថា ក្រោមការដឹកនាំដ៏ត្រឹមត្រូវប្រកបដោយគតិបណ្ឌិតរបស់លោកនាយករដ្ឋមន្រ្តី ហ៊ុន សែន បានដឹកនាំកម្ពុជាប្រែក្លាយពីប្រទេសដែលបាក់បែកដោយសង្គ្រាមរ៉ាំរ៉ៃ ខេ្ទចខ្ទាំ មកជាប្រទេសដែលមានការរីកចម្រើនលូតលាស់លើគ្រប់វិស័យ ហើយចំណែកឯប្រជាពលរដ្ឋខ្មែរគ្រប់រូប រួមទាំងបងប្អូនខ្មែរឥស្លាមផងដែរ ក៏បានរួមរស់ និងប្រាស្រ័យទាក់ទងគ្នាដោយសុខសាន្ត និងមានភាពស្និទ្ធិស្នាល មិនប្រកាន់ពូជសាសន៍ និងសាសនានោះទេ ដោយប្រកាន់យកនូវវប្បធម៌ សន្តិភាព អហិង្សា និងបង្រួបបង្រួមជាតិ ដែលជាបច្ច័យដ៏ល្អសម្រាប់អភិវឌ្ឍប្រទេសជាតិ។ លោកស្រីបានបន្ដទៀតថា ប្រធានបទដែលបានដាក់ចេញ នៅក្នុងពិធីសូត្រគម្ពីរ អាល់គួរអានលើកទី២៦ ស្តីពី ឥស្លាម និងនារី នៅឆ្នាំនេះគឺបានផ្សារភ្ជាប់ទ្រឹស្តីដែលមាននៅក្នុងគម្ពីរអាល់គួរអានទៅនឹងគោលនយោបាយរបស់រាជរដ្ឋាភិបាល ក្នុងការលើកកម្ពស់សមភាពយ៉ែនឌ័រ ដែលជាការរួមចំណែក ធ្វើឱ្យមានសុវត្ថិភាព សន្តិសុខ សុខដុមនីយកម្ម គុណធម៌ និងមោទនភាពជាតិ។

បេក្ខជន បេក្ខនារី ដែលបានចូលរួមសូត្រគម្ពីរឆ្នាំនេះមានចំនួន ៣៦រូប មកពីគ្រប់ខេត្ដ-ក្រុង នៃព្រះរាជាណាចក្រកម្ពុជា។ បេក្ខជនដែលទទួលបានជ័យលាភី លេខ ១ មកពីខេត្ដពោធិ៍សាត់ និងបេក្ខនារី ដែលទទួលបានជ័យលាភី លេខ១ មកពី រាជធានីភ្នំពេញ បេក្ខជនដែលទទួលបានជ័យលាភីលេខ ២ មកពីខេត្ដក្រចេះ និងបេក្ខនារី ដែលទទួលបានជ័យលាភី លេខ២ មកពីខេត្តកំពត បេក្ខជនដែលទទួលបានជ័យលាភី លេខ ៣ មកពីខេត្ដព្រៃវែង និងបេក្ខនារី ដែលទទួលបានជ័យលាភី លេខ៣ មកពីខេត្តកណ្តាល។

នៅក្នុងឱកាសនោះដែរ លោកស្រី ក៏បានពាំនាំនូវថវិកាដែលជាអំណោយដ៏ថ្លៃថ្លារបស់លោកនាយករដ្ឋមន្រ្តី ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងភរិយាចំនួន ១០លានរៀល ឧបត្ថម្ភជូនកម្មវិធីនោះផងដែរ៕