ចៅចាក់ស្មុក ៖ ជំងឺតួឯករបស់ សម រង្ស៊ី

នៅថ្ងៃទី០១ ខែមេសា ឆ្នាំ២០១៧ ទំព័រហ្វេសប៊ុកចៅចាក់ស្មុកបានបង្ហោះនូវអត្ថបទមួយដែលមានចំណងជើងថា ជំងឺតួឯករបស់ សម រង្ស៊ី ដែលមានខ្លឹមសារទាំងស្រុងដូចខាងក្រោម៖
ពេលស្តាប់អ្នកនយោបាយអង្ករកំប៉ុង សម រង្ស៊ី អតីតមេបក្សព្រះអាទិត្យនិយាយពីការចុច like នៅក្នុងប្រព័ន្ធហ្វេសប៊ុក និងបន្តចោទប្រកាន់សម្តេចតេជោ ហ៊ុន សែន ថាបានទិញទឹកចិត្តឱ្យលុយរបស់ពលរដ្ឋនៅប្រទេសឥណ្ឌា ឥណ្ឌូនេស៊ី ប្រេស៊ីល ឱ្យចុច like គេហទំព័ររបស់សម្តេច។ ការចោទប្រកាន់ដែលត្រូវបានកាត់ទោស អតីតមេបក្សនេះឱ្យជាប់ពន្ធនាគារ និងត្រូវបានពិន័យជាប្រាក់រួចស្រេចទៅហើយ។

បរិហារកេរ្តិ៍មិនអស់ចិត្តលើការឱ្យលុយដើម្បីចុច like លើហ្វេសប៊ុក ទណ្ឌិត សម រង្ស៊ី ក៏បាននិយាយបែបស្ទើរភ្លើងមិនយល់ពីការប្រើប្រាស់ប្រព័ន្ធទំនាក់ទំនងសង្គម ឬនិយាយបែបល្ងិតល្ងង់ថា នៅពេលបោះឆ្នោតនៅកម្ពុជាខាងមុខ សូមហៅពលរដ្ឋឥណ្ឌា ឥណ្ឌូនេស៊ី ឬប្រេស៊ីលមកបោះឆ្នោតទៅ! និយាយបែបនេះ មានន័យថា សម រង្ស៊ី ហាក់ដូចជាចាត់ទុកពលរដ្ឋមិនយល់ពីប្រព័ន្ធទំនាក់ទំនងសង្គម ខណៈប្រព័ន្ធទំនាក់ទំនងសង្គមគឺជាទំនាក់ទំនងសកល ហើយការបង្កើតទំព័រហ្វេសប៊ុកមិនមែនសម្រាប់តែប្រជាជននៅក្នុងប្រទេសម្ចាស់ទំព័រហ្វេសប៊ុកនោះចុច like ឡើយ។ នេះគឺជាការយល់ច្រឡំដ៏ធំ ឬក៏អតីតមេបក្សប្រឆាំងនេះដឹង ប៉ុន្តែធ្វើមិនដឹង ខណៈហ្វេសប៊ុករបស់ខ្លួនក៏ទទួលបានការចុច like ពីជនបរទេសមកពីប្រទេសផ្សេងៗដូចគ្នាដែរ។ ដូចអ្វីដែលពលរដ្ឋកម្ពុជា ថៃ ឡាវ វៀតណាម បារាំង ឥណ្ឌា ឥណ្ឌូនេស៊ី ចុច Like ទំព័រហ្វេសប៊ុករបសអតីត់ប្រធានាធិបតីអាមេរិក បារ៉ាក់ អូបាម៉ា ប្រធានាធិបតី ដូណាល់ត្រាំ ពូទីន ហ៊ីឡារី គ្លីនតុន ជាដើម ដើម្បីទទួលបានព័ត៌មានពីមេដឹកនាំទាំងនោះ។ តេជោ សែន ក៏ដូចគ្នា ក្នុងនាមជាមេដឹកនាំដែលដឹកនាំប្រទេសយូរជាងគេ និងជាបុរសខ្លាំងរបស់ កម្ពុជា ក៏ត្រូវបានចាប់អារម្មណ៍ និងតាមដានព័ត៌មានពីប្រជាពលរដ្ឋផ្សេងទៀតនៅលើពិភពលោក។

អ្វីដែល សម រង្ស៊ី ចោទប្រកាន់នេះគឺគ្រាន់តែជាកលល្បិចនយោបាយប៉ុណ្ណោះ ក្នុងបំណងដើម្បីបង្កាច់បង្ខូចកេរ្តិ៍ឈ្មោះ សម្តេច ហ៊ុន សែន និងមានចរិតច្រណែនឈ្នានីសដែលដំបូងឡើយ សម រង្ស៊ី ខ្លួនឯងបានប្រកាសពីជោគជ័យនៅលើហ្វេសប៊ុក រហូតដល់ប្រកាសខ្លួនឯងថាជានាយករដ្ឋមន្ត្រីហ្វេសប៊ុកផងដែរ។ ប៉ុន្តែឥឡូវនេះ ហ្វេសប៊ុក សម រង្ស៊ី ចាញ់ហ្វេសប៊ុកសម្តេចតេជោ ហ៊ុន សែន ដល់ទៅ ៣ លានសំឡេងឯណោះ ហើយងាកមករករឿងគេឯងដូចជ្រូកពុលបាយ។ ពិតជាមិនចោលគំនិតមែន! មិនមែនចាញ់ការបោះឆ្នោត ឡាំប៉ា តវ៉ាដើម្បីឡើងតម្លៃខ្លួនទេ សូម្បីលេងហ្វេសប៊ុកចាញ់គេ ក៏ចាប់ផ្តើមចោទគេថាយកលុយទៅទិញទឹកចិត្តពលរដ្ឋឥណ្ឌា ឥណ្ឌូនេស៊ី ប្រេស៊ីល ដើម្បីចុច like ហ្វេសប៊ុក។ ប្រឆាំង ច្រឡំផ្លូវចុះ ប្រឆាំងទាំងឆន្ទៈអ្នកលេងហ្វេសប៊ុកទៅទៀត។

ក្នុងចិត្ត និងគំនិតរបស់អ្នកនយោបាយអង្ករកំប៉ុង សម រង្ស៊ី រួមនឹងសកម្មជនរបស់ខ្លួនមួយចំនួនយល់ថាមានតែខ្លួនប៉ុណ្ណោះដែលគិតត្រូវ ធ្វើត្រូវ យល់ត្រូវ ចំណែកអ្នកមិនមែនខ្លួន ឬក្រុមខ្លួនធ្វើអ្វីសុទ្ធតែខុស ហើយអ្នកចុច like ហ្វេសប៊ុកសុទ្ធតែចំណាយលុយទិញ។ ត្រូវ ឬមិនត្រូវ ដឹងហើយ សូម្បីតែលក្ខន្តិកៈខ្លួនឯងមើលមិនយល់ ដើរខុសផ្លូវច្បាប់ផង។ សម រង្ស៊ី មិនគួរធ្វើជាតួឯកក្នុងរឿងហ្វេសប៊ុកទេ!!

ដោយចៅចាក់ស្មុក