នៅព្រឹកថ្ងៃទី០៣ ខែមិថុនា ឆ្នាំ២០១៦នេះ ភ្នាក់ងារសមត្ថកិច្ចបានយកដីការបង្គាប់ឲ្យចូលខ្លួន
ករណីសំណុំរឿងលោក កឹម សុខា ទៅបិទដល់មុខគេហដ្ឋានរបស់លោក កឹម សុខា ដែលស្ថិតនៅក្នុងខណ្ឌទួលគោក
រាជធានីភ្នំពេញ។
យោងតាមដីកាបង្គាប់ឲ្យចូលខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ
លោក ថាន់ ឡេង ចុះថ្ងៃទី២ ខែមិថុនា ឆ្នាំ២០១៦ បានបង្គាប់ឲ្យលោក កឹម សុខា
ភេទប្រុសអាយុ៦៣ឆ្នាំ តំណាងរាស្ត្រមណ្ឌលខេត្តកំពង់ចាម កើតនៅថ្ងៃទី២៣
ខែមិថុនា ឆ្នាំ១៩៥៣ ទីកន្លែងកំណើត ឃុំឧត្តមសូរិយា ស្រុកត្រាំកក់ ខេត្តតាកែវ
ទីលំនៅបច្ចុប្បន្ន ផ្ទះលេខ៩៧ ផ្លូវលេខ៣១៣ សង្កាត់បឹងកក់២ ខណ្ឌទួលគោក រាជធានីភ្នំពេញ
ជានីតិជន ឲ្យចូលខ្លួនមកកាន់សាលាដំបូងរាជធានីភ្នំពេញ បន្ទប់ស៊ើបសួរអក្សរ « ក១» ជាន់ទី៥ នៅថ្ងៃទី១៤ ខែមិថុនា ឆ្នាំ២០១៦
វេលាម៉ោង៩និង០០នាទីព្រឹក ដើម្បីសាកសួរ ពីបទ ដំណើររឿង បដិសេធក្នុងការចូលខ្លួន
ប្រព្រឹត្តនៅរាជធានីភ្នំពេញ ថ្ងៃទី២៦ ខែឧសភា ឆ្នាំ២០១៦ តាមបញ្ញត្តិមាត្រា៥៣៨
នៃក្រមព្រហ្មទណ្ឌ។
បើយោងតាមការបញ្ជាក់របស់លោក យ៉ែម ប៉ុញ្ញរិទ្ធ អ្នកនាំពាក្យគណបក្សសង្គ្រោះជាតិនៅព្រឹកថ្ងៃទី៣
ខែមិថុនា ឆ្នាំ២០១៦នេះ នៅខាងមុខទីស្នាក់ការគណបក្សសង្គ្រោះជាតិស្ថិតនៅសង្កាត់ចាក់អង្រែលើ
ខណ្ឌមានជ័យ រាជធានីភ្នំពេញ បានប្រកាសជំហរថា ប្រធានស្តីទីគណបក្សខ្លួន គឺលោក
កឹម សុខា នឹងមិនចូលខ្លួនតាមដីកាបង្គាប់ឲ្យចូលខ្លួនរបស់តុលាការឡើយ ។
អ្នកនាំពាក្យរូបនេះ ក៏បានឲ្យលើកឡើងទៀតថា ការធ្វើកោសល្យវិច័យតាមមូលដ្ឋាន
គឺជាការគំរាមកំហែងដល់ប្រជាពលរដ្ឋក្នុងការសំដែងមតិ។
ទោះជាយ៉ាងណា សម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ
បានបញ្ជាក់ក្នុងលិខិតចុះថ្ងៃទី២ ខែមិថុនា ថា គណៈកម្មការដែលក្រសួងមហាផ្ទៃសម្រេចបង្កើត
នឹងធ្វើកោសល្យវិច័យស្នាមមេដៃនៅលើញត្តិរបស់គណបក្សង្គ្រោះជាតិ ចុះស្រាវជ្រាវផ្ទាល់ពីប្រជាពលរដ្ឋដែលបានផ្តិតមេដៃ
និងចាត់វិធានការជំនាញផ្សេងទៀតតាមនីតិវិធី ដើម្បីផ្ទៀងផ្ទាត់ភាពត្រឹមត្រូវ
នៃស្នាមមេដៃរបស់ប្រជាពលរដ្ឋ៕
No comments:
Post a Comment