កាកបាទក្រហមខេត្តព្រៃវែង បើកវគ្គបណ្តុះបណ្តាលស្តីពី អនាម័យទឹកស្អាតក្នុងគ្រាអាសន្ន

ខេត្តព្រៃវែង៖ នៅថ្ងៃទី២៣ ខែសីហា ឆ្នាំ២០១៧ សាខាកាកបាទក្រហមខេត្តព្រៃវែង បានសហការ ជាមួយកាកបាទក្រហមកម្ពុជា បើកវគ្គបណ្តុះបណ្តាលស្តីពី អនាម័យទឹកស្អាតក្នុងគ្រាអាសន្ន ក្រោមអធិបតីភាព លោក សុខ ផេង អនុប្រធានអចិន្ត្រៃយ៍គណៈកម្មាធិការសាខា តំណាងលោក ជា សុមេធី ប្រធានគណៈកម្មាធិការសាខា ដល់ជនបង្គោល និងអ្នកស្ម័គ្រចិត្តភូមិ មកពីស្រុក ចំនួន៣ គឺស្រុកពាមរក៍ ស្រុកពាមជរ និងស្រុកកំពង់ត្របែក ដែលមានរយះពេល ២ថ្ងៃ ចាប់ពីថ្ងៃទី ២៣ ដល់ ថ្ងៃទី ២៤ ខែសីហា ឆ្នាំ ២០១៧ មានសិក្ខាកាមចូលរួមសរុប ចំនួន ៣២នាក់ ។

សូមជម្រាបផងដែរថា វគ្គបណ្តុះបណ្តាលនេះ ដើម្បីរួមចំណែកលើកកម្ពស់សុខភាព ប្រជាជនក្នុងសហគមន៍ តាមរយៈការពង្រឹងសមត្ថភាពមន្ត្រី និងអ្នកស្ម័គ្រចិត្តកាកបាទក្រហមកម្ពុជា ដើម្បីឆ្លើយតបនៅពេលមានគ្រោះមហន្តរាយ និងត្រៀមបង្ការលក្ខណៈ ក្នុងការផ្តល់សេវាកម្មផ្នែកអនាម័យទឹកស្អាតក្នុងគ្រាអាសន្ន សហការដោយ សហព័ន្ធជាតិកាកបាទក្រហម អឌ្ឍចន្ទក្រហម(IFRC/JRCS)។
ក្នុងឱកាសនោះ លោក សុខ ផេង បានធ្វើការផ្តាំផ្ញើដល់សិក្ខាកាមទាំងអស់ ត្រូវខិតខំយកចិត្តទុកដាក់រៀនសូត្រ អោយបានល្អ ដើម្បីយកចំណេះដឹងដែលទទួលបាននាពេលនេះទៅអនុវត្តក្នុងសហគមន៍ និងតំបន់គោលដៅនៃគម្រោងអោយទទួលបានជោគជ័យ៕