ឯកអគ្គរាជទូតចក្រភពអង់គ្លេសប្រចាំកម្ពុជា សន្យាឱ្យមានអ្នកវិនិយោគអង់គ្លេសមកបណ្តាក់ទុននៅក្នុងខេត្តត្បូងឃ្មុំ

លោក ប៉ែន កុសល្យ អភិបាលរងខេត្តត្បូងឃ្មុំ បានអញ្ជើញទទួលជួបស្វាគមន៍និងសំណេះសំណាលជាមួយ លោក បៀល ឡងហឺស៍ (Bil Longhurst) ឯកអគ្គរាជទូតចក្រភពអង់គ្លេស ប្រចាំនៅកម្ពុជានៅសាលាខេត្តត្បូងឃ្មុំ នៅថ្ងៃទី២៣ ខែសីហា ឆ្នាំ២០១៧។

ក្នុងឱកាសនោះ ក្រោមការទទួលស្វាគមន៍យ៉ាងស្និទ្ធស្នាលកក់ក្តៅ ពីសំណាក់ លោកអភិបាលរងខេត្ត លោក បានបង្ហាញពីភូមិសាស្ត្រ តំបន់រដ្ឋបាលប្រមូលផ្តុំ ហេដ្ឋារចនាសម្ព័ន្ធនានាក្នុងខេត្ត និងវិស័យដែលមានសក្តានុពលក្នុងខេត្ត ពិសេសវិស័យ កសិឧស្សាហកម្ម ដំនាំម្រេច និងកៅស៊ូ ឆ្លៀតក្នុងឱកាសនោះ លោកអភិបាលរងខេត្ត ក៏បានស្នើសុំ លោកឯកឯគ្គរាជទូតចក្រភពអង់គ្លេស សុំឱ្យអ្នកវិនិយោគអង់គ្លេស មកបណ្តាក់ទុនលើវិស័យនេះ ដើម្បីឱ្យខេត្តកូនពៅមួយនេះ កាន់តែមានសក្តានុពលមានការអភិវឌ្ឍខ្លាំងបន្ថែមទៀត។ លោកឯកអគ្គរាជទូតចក្រភពអង់គ្លេស ក៏បានទទួលយល់ព្រមយកសំណើនេះទៅពិចារណាផងដែរ ។

សូមបញ្ជាក់ថា លោក បៀល ឡងហឺស៍ (Bil Longhurst) ឯកអគ្គរាជទូតចក្រភពអង់គ្លេស ប្រចាំនៅកម្ពុជា អញ្ជើញមកទស្សនកិច្ចនាថ្ងៃនេះ ក្នុងគោលបំណងដើម្បីសិក្សាស្វែងយល់ពីខេត្តកូនពៅមួយនេះ ពិសេសពិភាក្សាលើការផ្តល់អាហារូបករណ៍ដល់សិស្សនិស្សិត ក្នុងខេត្តត្បូងឃ្មុំ ដែលមានបំណងចង់បន្តការសិក្សានៅចក្រភពអង់គ្លេស៕