អនុ​ប្រធាន​គណបក្ស​ប្រជាជន​ ខេត្តកំពង់ឆ្នាំង៖​ បើគ្មាន​ថ្ងៃ៧ មករា​ ឆ្នាំ១៩៧៩​ ក៏គ្មានអ្វីៗ​ដល់ថ្ងៃនេះដែរ

កំពង់ឆ្នាំង៖ លោក សោម សុផាត អនុប្រធានគណបក្សប្រជាជនកម្ពុជា ខេត្តកំពង់ឆ្នាំង បានថ្លែងថា បើគ្មានថ្ងៃ៧ មករា ឆ្នាំ១៩៧៩ ក៏គ្មានអ្វីៗដល់ថ្ងៃនេះដែរ។ លោក បានថ្លែងដូចនេះនៅល្ងាចថ្ងៃទី០៥ ខែកក្កដា ឆ្នាំ២០១៧ នៅស្នាក់ការគណបក្សប្រជាជនកម្ពុជា ក្នុងពិធីជួបសំ​ណេះសំណាល និងថ្លែងអំណរគុណដល់សមាជិកសមាជិកាបក្សដែលជាមន្រ្តីរាជការចំនួន៨០០នាក់​មកពីអង្គភាពជុំវិញខេត្ត។

លោក សោម សុផាត បានបញ្ជាក់ថា គណបក្សប្រជាជនកម្ពុជា គឺជាគណបក្សតែមួយគត់ដែលបានក្រោកឈរតស៊ូហើយបានប្រមូលផ្ដុំរាល់កម្លាំងស្នេហាជាតិ បង្កើតរណសិរ្សសាមគ្គីសង្គ្រោះជាតិកម្ពុជា ដើម្បីបំផុស និងដឹកនាំចលនាប្រជាជននៅទូទាំងប្រទេស វាយផ្តួលរំលំរបបប្រល័យពូជសា​សន៍ ផ្តល់ជីវិតទី២ ដល់ប្រជាជនកម្ពុជា ជាពិសេសចុងក្រោយនេះ ដោយ​សារនយោបាយ ឈ្នះ-ឈ្នះ របស់លោកនាយករដ្ឋមន្រ្តី ហ៊ុន សែន បានរំលាយអង្គការចាត់តាំងខ្មែរក្រហមទាំងស្រុង ហើយចាប់ផ្តើមកសាងប្រទេសរហូតដល់មានការរីកចម្រើនលើគ្រប់វិស័យដល់បច្ចុប្បន្ននេះ។

លោក ក៏បានជំរុញដល់សមាជិកបក្សទាំងអស់អោយខិតខំធ្វើអំពើល្អ បម្រើប្រជាពលរដ្ឋដោយស្មោះអស់ពីចិត្ត មានសាមគ្គីផ្ទៃក្នុងល្អសហការគ្នាដើម្បីផ្តល់សេវា និងដោះស្រាយបញ្ហាដែលជាតម្រូវ និងសំណូមពរជូនប្រជាពលរដ្ឋឱ្យបានទាន់ពេលវេលាជាពិសេសមិនបង្កបញ្ហាណាមួយឱ្យប្រជាពលរដ្ឋមានការថ្នាំងថ្នាក់និងគណបក្សប្រជាជនឡើយ៕