(ភ្នំពេញ)៖ នៅខេត្តធំៗដូចជា៖ ខេត្តកំពង់ចាម ខេត្តកណ្ដាល និងខេត្តព្រៃវែង ដែលការបោះឆ្នោតឆ្នាំ២០១៣ គណបក្សប្រជាជនកម្ពុជា បានចាញ់សំឡេងគាំទ្រ គណបក្សសង្គ្រោះជាតិនោះ ស្រាប់តែការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៤ នៅឆ្នាំ២០១៧នេះ សំឡេងគាំទ្រគណបក្សប្រជាជន បានកើនឡើងគួរឲ្យភ្ញាក់ផ្អើល ខណៈដែលបក្សប្រឆាំងបានថយចុះយ៉ាងគំហុក។
មិនខុសពីតាមខេត្តធំៗទាំងនេះ សម្រាប់រាជធានីភ្នំពេញ ដែលជាមណ្ឌលពោពេញទៅដោយប្រជាជន នយោបាយ និងសេដ្ឋកិច្ច និងជាទីតាំងឈរជើង របស់លោកស្រី ម៉ែន សំអន ជាប្រធានក្រុមការងារអមដោយថ្នាក់ដឹកនាំជាន់ខ្ពស់ គណបក្សមួយចំនួនទៀតនោះ សម្រាប់ការបោះឆ្នោតលើកនេះគណបក្ស ប្រជាជនកម្ពុជា បានកើនឡើងសំឡេងគាំទ្រយ៉ាងខ្លាំង រហូតជាង៩.៤ម៉ឺនសំឡេង បើប្រៀបធៀបការបោះឆ្នោតកាលពីឆ្នាំ២០១៣ ហើយចំនួននេះ បានលើសសំឡេង គណបក្សសង្គ្រោះជាតិ រហូតជាង៦ម៉ឺនសំឡេងឯណោះ ដែលខុសគ្នាយ៉ាងឆ្ងាយ ដែលការពីបោះឆ្នោតឆ្នាំ២០១៣ គណបក្សប្រជាជន បានចាញ់គណបក្សសង្គ្រោះជាតិ រហូតជាង១២ម៉ឺនសំឡេងឯណោះ។
បើទោះបីលទ្ធផលបឋមក្រៅផ្លូវការបង្ហាញថា នៅរាជធានីភ្នំពេញ គណបក្សសង្គ្រោះជាតិ បានដំណែងជាចៅសង្កាត់ចំនួន៥៨សង្កាត់ រីឯគណបក្សប្រជាជនកម្ពុជា ទទួលបានដំណែងជាចៅសង្កាត់ចំនួន៤៧សង្កាត់នោះ ប៉ុន្ដែបើគិតជាសំឡេងឆ្នោតវិញ គណបក្សប្រជាជនកម្ពុជា គឺកើនឡើងលើសគណបក្សសង្គ្រោះជាតិ ជាង៦ម៉ឺនសំឡេងបើប្រៀបធៀបទៅនឹងការបោះឆ្នោត កាលពីឆ្នាំ២០១៣នោះ។
តាមលទ្ធផលបឋមក្រៅផ្លូវការ ដែលអង្គភាពព័ត៌មាន Fresh News ទទួលបាននៅថ្ងៃទី០៧ ខែមិថុនា ឆ្នាំ២០១៧នេះ បានបង្ហាញថា
* សម្រាប់រាជធានីភ្នំពេញ ការបោះឆ្នោតឆ្នាំ២០១៧នេះ គណបក្សប្រជាជនកម្ពុជាទទួលបានសំឡេងគាំទ្រ៣៥១,៣៩១សំឡេង ពោលមានការកើនឡើងរហូតទៅដល់៩៤,០៤០សំឡេង បើប្រៀបធៀបការបោះឆ្នោតកាលពីឆ្នាំ២០១៣ ដែលបង្ហាញដោយ គ.ជ.ប មានចំនួន២៥៧,៣៥១សំឡេង ដែលមានការកើនឡើងសំឡេងប្រមាណ១ភាគ៣ បើគិតជាសំឡេងកើននៅទាំងប្រទេស។
* សម្រាប់រាជធានីភ្នំពេញ ការបោះឆ្នោតឆ្នាំ២០១៧នេះ គណបក្សប្រជាជនកម្ពុជាទទួលបានសំឡេងគាំទ្រ៣៥១,៣៩១សំឡេង ពោលមានការកើនឡើងរហូតទៅដល់៩៤,០៤០សំឡេង បើប្រៀបធៀបការបោះឆ្នោតកាលពីឆ្នាំ២០១៣ ដែលបង្ហាញដោយ គ.ជ.ប មានចំនួន២៥៧,៣៥១សំឡេង ដែលមានការកើនឡើងសំឡេងប្រមាណ១ភាគ៣ បើគិតជាសំឡេងកើននៅទាំងប្រទេស។
* គណបក្សសង្គ្រោះជាតិវិញ សម្រាប់ការបោះឆ្នោតលើកនេះទទួលបាន ៤១៦,០៣២សំឡេង គឺកើនឡើងត្រឹមតែ៣៣,១៥២សំឡេងប៉ុណ្ណោះ បើប្រៀបធៀបការពីកាលបោះឆ្នោតឆ្នាំ២០១៣ ដែលបង្ហាញដោយ គ.ជ.ប មានចំនួន ៣៨២,៨៨០សំឡេង។
* លទ្ធផលដដែលនេះ បានបង្ហាញទៀតថា កាលពីបោះឆ្នោតឆ្នាំ២០១៣ គណបក្សសង្គ្រោះជាតិ លើសសំឡេងគាំទ្រគណបក្សប្រជាជនកម្ពុជា រហូតដល់ ១២៥,៥២៩សំឡេង ប៉ុន្ដែការបោះឆ្នោតលើកនេះ គណបក្សសង្គ្រោះជាតិ លើសគណបក្សប្រជាជនកម្ពុជាមកត្រឹមតែ ៦៤,៦៤១សំឡេង ដូច្នេះមានន័យថា សំឡេងគាំទ្ររបស់បក្សប្រឆាំងបានថយចុះជាងពាក់កណ្ដាល។
បើនិយាយពីចំនួនកើនឡើងវិញ សម្រាប់ការបោះឆ្នោតឆ្នាំ២០១៧ ប្រៀបធៀបនឹងឆ្នាំ២០១៣នោះ ឃើញថា គណបក្សប្រជាជនកម្ពុជា បានកើនឡើងរហូតដល់៩៤,០៤០សំឡេង ខណៈដែលគណបក្សសង្គ្រោះជាតិបានកើនឡើងត្រឹមតែ៣៣,១៥២សំឡេងប៉ុណ្ណោះ។
សូមជំរាបថា ការបោះឆ្នោតក្រុមប្រឹក្សាឃុំសង្កាត់ ដែលបានបញ្ចប់ទៅក្នុងស្ថានភាពបរិយាកាសល្អប្រសើរ មានការទទួលស្គាល់ពីប្រជាពលរដ្ឋ អ្នកសង្កេតការណ៍ ជាតិ និងអន្ដរជាតិនោះ ជាលទ្ធផលប្រជាពលរដ្ឋចំនួន ៧,០៤០,៥៩៤នាក់ ស្នើនឹង៨៩.៥២ភាគរយ ក្នុងចំណោមប្រជាជន ដែលបានចុះឈ្មោះបោះឆ្នោត ចំនួន៧,៥៦៥,០៣៣នាក់ បានអញ្ជើញ ទៅបោះឆ្នោត៕
No comments:
Post a Comment