ប្រធានកាកបាទក្រហមកម្ពុជា លោកស្រី ប៊ុន រ៉ានី ហ៊ុនសែន ផ្តល់ថវិកា៣១,៩២០ដុល្លារ ដើម្បីខួងអណ្តូងចំនួន១៩ ជូនប្រជាពលរដ្ឋ នៅខេត្តកំពត

លោកស្រី ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចផ្តល់ថវិកាចំនួន ៣១,៩២០ដុល្លារ នៅថ្ងៃទី ៥ ខែមិថុនា ឆ្នាំ២០១៧ ជាជំហានទី១ ដើម្បីខួងអណ្តូងទឹកស្អាតចំនួន១៩ ជូនដល់ប្រជាពលរដ្ឋខ្វះខាតទឹកប្រើប្រាស់ចំនួន ៣២៣គ្រួសារ ស្មើនឹងមនុស្ស ១,៦១៥នាក់ រស់នៅតំបន់ថ្មបាយក្រៀម ស្ថិតក្នុងភូមិចំនួន៩ ឃុំចំនួន៥ ក្នុងស្រុកអង្គរជ័យ ស្រុកបន្ទាយមាស និងស្រុកដងទង់ នៃខេត្តកំពត។  សូមបញ្ជាក់ថា ក្នុងរយៈពេល៥ខែ ដើមឆ្នាំ២០១៧នេះ នៅទូទាំងប្រទេសកម្ពុជា កាកបាទក្រហមកម្ពុជា បានផ្តល់អណ្តូងចំនួន២៣៦ និងស្រះទឹកចំនួន៤ រួចមកហើយ។ ដោយឡែក សម្រាប់ខេត្តកំពត ពីឆ្នាំ២០១០ ដល់ឆ្នាំ២០១៣ ទទួលបានអណ្តូងចំនួន៦៦ និងឆ្នាំ២០១៦ កន្លងទៅនេះ ទទួលបានចំនួន១អណ្តូង រួចមកហើយ៕