ស្ពានអាកាសស្ដុបផ្សារដីហុយ សម្រេចបានប្រមាណ៧០ភាគរយ

ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងថា រហូតមកដល់ពេលនេះ ការស្ថាបនាស្ពានអាកាសស្ដុបផ្សារដីហុយសម្រេចបានប្រមាណ៧០ភាគរយហើយ។

លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ បានប្រាប់អ្នកព័ត៌មាននៅពេលថ្មីៗនេះថា ការអនុវត្ដការងារនៅក្នុងការដ្ឋានទាំងមូល គឺអ្នកជំនាញកំពុងតែចាក់ភ្ជាប់តួស្ពានពីម្ខាងទៅម្ខាង ដើម្បីឲ្យស្ពាននេះ អាចបញ្ចប់នៅចុងឆ្នាំ២០១៧ខាងមុខនេះ។
លោកបន្តថា ស្ពានអាកាសស្តុបផ្សារដីហុយ ស្ថិតនៅចំណុចប្រសព្វរវាងមហាវិថីសហព័ន្ឋរុស្ស៊ី និងផ្លូវហាណូយ ឬផ្លូវលេខ១០១៩ ដែលមានការកកស្ទះខ្លាំងចំពោះការធ្វើដំណើរចូលក្រុង។ប្រជាពលរដ្ឋរស់នៅក្នុងរាជធានីភ្នំពេញ ដែលធ្វើដំណើរកាត់តាមការដ្ឋានសាងសង់ស្ពានផ្សារដីហុយ បានឱ្យដឹងថា នៅពេលដែលស្ពានបានសាងសង់រួចរាល់ អាចឱ្យប្រជាពលរដ្ឋធ្វើដំណើរបាន កាន់តែងាយស្រួល និងកាត់បន្ថយការកកស្ទះចរាចរដូចបច្ចុប្បន្ននេះទេ។
សូមរំលឹកផងដែរថា ស្ពានអាកាសស្តុបផ្សាដីហ៊ុយបានបើកការដ្ឋាន កាលពីចុងខែសីហាឆ្នាំ២០១៦កន្លងមក។ ស្ពានអាកាសស្តុបផ្សារដីហុយ នេះគឺជាគម្រោងហិរញ្ញប្បទានរបស់សាធារណរដ្ឋប្រជាមានិតចិន និងទទួលបានសិទ្ធិសាងសង់ដោយក្រុមហ៊ុនសៀងហៃ ហើយត្រួតពិនិត្យបច្ចេក ទេសដោយក្រសួងសាធារណការ និងដឹកជញ្ជូន៕