លោក អូស្មាន ហាស្សាន់៖ លេខរៀងរបស់CPP ខុសគ្នានៅតាមឃុំ សង្កាត់នីមួយៗ​ តែស្លាក​សញ្ញាដែល​មានរូបទេវតា​បាចផ្កា ​នៅតែជា​សញ្ញារបស់​គណបក្ស​ប្រជាជនកម្ពុជា​

លោក អូស្មាន ហាស្សាន់ សមាជិកគណៈកម្មាធិការកណ្តាល និងជាប្រធានគណៈចលនាសាសនិកឥស្លាមCPP បានបញ្ជាក់ថា ​លេខរៀងរបស់CPP ខុសគ្នានៅឃុំ សង្កាត់នីមួយៗ ក្នុងការបោះឆ្នោតក្រុមប្រឹក្សា ឃុំ-សង្កាត់ តែស្លាកសញ្ញាដែលមានរូបទេវតាបាចផ្កា នៅតែជាសញ្ញារបស់គណបក្សប្រជាជនកម្ពុជា​។

លោកថ្លែងបែបនេះ  នៅសៀលថ្ងៃទី១៥ ខែឧសភា  ឆ្នាំ២០១៧  ក្នុងឱកាសដែលលោក ​សំណេះសំណាលប្រកាសទទួលស្គាល់ថ្នាក់ដឹកនាំ សមាជិក សមាជិកា គណៈចលនាសាសនិកឥស្លាម ខេត្តព្រះសីហនុ នៅទីតាំងវិហារឥស្លាមភូមិបន្ទាយព្រៃ ស្រុកព្រៃនប់ ខេត្តព្រះសីហនុ   ដែលមានការចូលរួមជាសហអធិបតី  ដោយលោក ជាម ហ៊ីម សមាជិកគណៈកម្មាធិការកណ្តាល និងជាប្រធានគណៈកម្មាធិការ CPP ខេត្តព្រះសីហនុ និងសមាជិក៣៣០នាក់។

លោក អូស្មាន ហាស្សាន់ បានសម្តែងសុទិដ្ឋិនិយម នៅចំពោះមុខសកម្មជន សមាជិក សមាជិការ គណៈចលនាសាសនិកឥស្លាម CPP ខេត្តព្រះសីហនុ ចំពោះលទ្ធផលបោះឆ្នោតសភាអាណត្តិទី៥ ដែលសាសនិកឥស្លាមទូទាំងប្រទេស សម្រេចបានសម្លេងគាំទ្រគណបក្សប្រជាជន យ៉ាងច្រើនលើសលប់ជាប់លំដាប់ថ្នាក់លេខ១ ទូទាំងប្រទេស ចំណែកសម្លេងឆ្នោត CPP ពីសាសនិកឥស្លាមទូទាំងខេត្តព្រះសីហនុ ក៏ទទួលបានសម្លេងយ៉ាងច្រើន គិតជាមធ្យមទូទាំងប្រទេស គឺជាប់៧៤ភាគរយ ដែលជាប់លំដាប់ថ្នាក់លេខ៨ បើប្រៀបនឹងខេត្តផ្សេងៗ ទូទាំងប្រទេសដែលមានសម្លេងខ្មែរឥស្លាម បោះឆ្នោតគាំទ្រគណបក្សប្រជាជនកម្ពុជា៕