លោក កើត សុធា៖ បោះឆ្នោតជូនគណបក្សប្រជាជនកម្ពុជា គឺគាំទ្រសុខសន្តិភាព និងការអភិវឌ្ឍរីកចម្រើនលើគ្រប់វិស័យ

ខេត្តប៉ៃលិន៖ នៅថ្ងៃទី១៦ ខែឧសភា ឆ្នាំ២០១៧ នៅភូមិថ្នល់ទទឹង ឃុំអូរអណ្តូង ស្រុកសាលាក្រៅ ខេត្តប៉ៃលិន លោក កើត សុធា ប្រធានគណបក្សប្រជាជនកម្ពុជាខេត្ត និងលោកស្រី សោ មុន្នីរ័ត្ន អនុប្រធាន ក្រុមការចុះជួយឃុំអូរអណ្តូង ព្រមទាំងក្រុមការងារ បានអញ្ជើញសំណេះ​សំណាល ជាមួយសមាជិកសមាជិកាបក្ស ចំនួន ២៨២នាក់។

លោក  ហ៊ឹម ក្លឿ ប្រធានគណបក្សឃុំអូរអណ្តូង បានធ្វើរបាយការណ៍ថា នៅឆ្នាំ២០១៧នេះ ក្នុងឃុំអូរអណ្តូង មានសមាជិកបក្សដែលមានឈ្មោះក្នុងបញ្ជីបោះឆ្នោតចំនួន ១៧៤២នាក់ ស្រី ៨៩៦នាក់គ្រួសារ។

លោក កើត សុធា ប្រធានគណបក្សប្រជាជនកម្ពុជា ខេត្តប៉ៃលិន​ បានមានប្រសាសន៍លើកឡើងថា ការ​បោះឆ្នោតជ្រើសរើសក្រុមប្រឹក្សាឃុំសង្កាត់ នឹងប្រព្រឹត្តិទៅនៅថ្ងៃទី០៤ ខែមិថុនា ឆ្នាំ២០១៧ ខាងមុខនេះ ហើយការបោះឆ្នោតនេះគឺជាការបោះឆ្នោតជ្រើសរើសមេឃុំ និងចៅសង្កាត់ដែលដឹកនាំមូលដ្ឋាន នាំមកនូវការអភិវឌ្ឍរីកចំរើនជាបន្តបន្ទាប់ ជាមួយគ្នានេះដែរ ការបោះឆ្នោតអាចប្រព្រឹត្តទៅបាន ក៏ដោយសារប្រទេសយើងមានសុខសន្តិភាព និងការអភិវឌ្ឍន៍លើគ្រប់វិស័យ ក្រោមនយោបាយឈ្នះ ឈ្នះ របស់លោកនាយករដ្ឋមន្រ្តី ហ៊ុន សែន ដូច្នេះសន្លឹកឆ្នោតរបស់យើង ១សន្លឹក បោះជូនគណបក្សប្រជាជនកម្ពុជា គឺជាការគាំទ្រដល់ការកសាងអភិវឌ្ឍន៍ប្រទេសជាតិ ឱ្យរីកចម្រើនលើគ្រប់វិស័យ ទាំងវិស័យពុទ្ធចក្រ និងអាណាចក្រ ព្រមទាំងចូលរួមការពារសន្តិភាពនេះអោយស្ថិតស្ថេរយូអង្វែង។

លោក កើត សុធា ក៏បានជំរុញដល់អាជ្ញាធរ សមត្ថកិច្ចគ្រប់ជាន់ថ្នាក់ ត្រូវបន្តការពារសន្តិសុខសុវត្ថិភាពជូនប្រជាពលរដ្ឋអោបានល្អប្រសើរថែមទៀត ជាពិសេសត្រូវអនុវត្តគោលនយោ​បាយភូមិ-ឃុំមានសុវត្ថិភាពឱ្យបានល្អប្រសើរ ហើយត្រូវដោះស្រាយទុក្ខកង្វល់របស់ពលរដ្ឋទាំងសេវាសាធារណៈ និងសំណូមពរ និងសេវាតម្រូវការតាមការធ្វើវេទិកាសាធារណៈ ពោល​ធ្វើយ៉ាងណាកុំឱ្យប្រជាពលរដ្ឋមានការអាក់អន់ស្រពន់ចិត្ត ។

នៅក្នុងពិធីសំណេះសំណាលនាឱកាសនោះ គណៈអធិបតី និងក្រុមការងារ ក៏បានឧបត្ថម្ភដល់សមាជិក សមាជិកា ដែលបានមកចូលរួម ចំនួន ២៨២នាក់ ដោយក្នុងម្នាក់ៗ ទទួលបានថវិកា ចំនួន ១០០០០រៀលផងដែរ៕

​អត្ថបទ៖ ញ៉ឹប បូរី