នៅថ្ងៃទី១៦ ខែឧសភា ឆ្នាំ២០១៧នេះ នៅទីលានបាញ់គ្រាប់ពិតមរតកតេជោសែនភ្នំវាលចាប ស្ថិតនៅភូមិ កណ្តាលស្ទឹង ឃុំអណ្តើកហែប ស្រុករតនៈមណ្ឌល ខេត្តបាត់ដំបង មានរៀបចំ ពិធីបិទវគ្គហ្វឹកហ្វឺនលំហាត់បាញ់គ្រាប់ពិត ថ្នាក់កងអនុសេនាធំ សហការវាយលុក ជាមួយរថក្រោះ ស្ថិតក្រោមអធិបតីភាព នាយឧត្តមសេនីយ៍ ប៉ុល សារឿន អគ្គមេបញ្ជាការ នៃកងយោធពលខេមរភូមិន្ទ។
សិក្ខាកាមដែលបានចូលរួមហ្វឹកហ្វឺននៅក្នុងសិក្សារៀនសូត្រនេះសរុបចំនួន ២០៧នាក់ ហ្វឹកហ្វឺនរយៈពេល៦១ ថ្ងៃចាប់ពីថ្ងៃទី១៥ ខែមីនា ឆ្នាំ២០១៧ ដល់ថ្ងៃទី០៦ ខែឧសភា ឆ្នាំ២០១៧ ដោយហ្វឹកហ្វឺនលើខ្លឹម សារមេរៀន លំហាត់របៀប អប់រំចិត្តសាស្រ្ត យុទ្ធវិធីថ្មើរជើងកងអនុសេនាធំវាយលុក ហ្វឹកហ្វឺនបាញ់អាវុធអាកា បេ៤០ RPD PKM ហ្វឹកហ្វឺនបាញ់អាវុធត្បាល់ និង DK ហ្វឹកហ្វឺនបាញ់អាវុធ 12mm និង 23mm ។ ឆ្លងកាត់តាមតាមការហ្វឹកហ្វឺនរយៈពេល៦១ថ្ងៃកន្លងមកនេះ សិក្ខាកាមទទួលបានលទ្ធផលដូចខាងក្រោម និទ្ទេសល្អចំនួន៦២នាក់ និទ្ទេសល្អបង្គួរចំនួន៨៦នាក់ និទ្ទេសមធ្យម២២នាក់។
នាយឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក និងមេបញ្ជាការយោធភូមិភាគទីប្រាំ ក៏បានបញ្ជាក់ឱ្យដឹងថា ទីលានបាញ់គ្រាប់ពិតមរតកតេជោសែនភ្នំវាលចាបយោធភូមិភាគទីប្រាំ ទទួលបានការ ឧបត្ថម្ភពីលោកនាយករដ្ឋមន្រ្តី ហ៊ុន សែន ហើយការកសាងទីលាននេះ គឺជាគំនិតផ្តួចផ្តើមដំបូងបង្អស់ពីនាយឧត្តមសេនីយ៍ ប៉ុល សារឿន អគ្គមេបញ្ជាការ នៃកងយោធនពលខេមរភូមិន្ទ ចាប់តាំងពីឆ្នាំ២០០៥ មកម៉្លេះ ហើយការជ្រើសរើសភ្នំវាលចាបនេះ ត្រូវបានប្រមុខរាជរដ្ឋាភិបាលកម្ពុជា សម្រេចអនុញ្ញាត្តឱ្យដំណើរការចាប់តាំងពីថ្ងៃទី០៣ ខែធ្នូ ឆ្នាំ២០១៤រហូតមក។
នាយឧត្តមសេនីយ៍ ប៉ុល សារឿន បានសង្កត់ធ្ងន់ថា នៅក្នុងដំណាក់កាលប្រទេសជាតិ មានសុខសន្តិភាពពេញលេញ បរិបូរណ៍បានផ្តល់ជាឱកាសពេញលេញសម្រាប់កងយោធពលខេមរភូមិន្ទ ធ្វើការហ្វឹកហ្វឺន បំប៉ន ពង្រឹង ពង្រីកសមត្ថភាពជំនាញវិជ្ជាជីវៈ ឱ្យបានស្ទាត់ជំនាញ ដើម្បីបង្កើននូវសក្តានុពលកងទ័ព ដោយដើរទន្ទឹមជាមួយនឹងការជំរុញនូវលក្ខណៈសកម្ម ច្នៃប្រឌិត និងមានមនសិការខ្លួនទីពឹងខ្លួន ឆ្លើយតបយ៉ាងទាន់ពេលវេលា ក្នុងបុព្វហេតុកិច្ចការពារជាតិ។ ក្នុងន័យនេះ ការពង្រឹងហេដ្ឋារចនាសម្ព័ន្ធរូបវន្តក្នុងវិស័យហ្វឹកហ្វឺន ការអភិវឌ្ឍសមត្ថភាពអង្គភាព និងធនធានមនុស្ស សំដៅលើកស្ទួយកិត្តិយស និងអភិវឌ្ឍកងយោធពលខេមរភូមិន្ទ ឱ្យមានគ្រប់សមត្ថភាពជំនាញវិជ្ជាជីវៈ។ ដូច្នេះចាំបាច់ត្រូវបន្តលើកស្ទួយ និងអភិវឌ្ឍវិស័យហ្វឹកហ្វឺនគ្រប់ថ្នាក់ គ្រប់កម្រិត ឱ្យបានជាប់ជាប្រចាំ ដើម្បីបម្រើឱ្យយុទ្ធសាស្រ្តយោធា ក្នុងវិស័យការពារជាតិ។
នាយឧត្តមសេនីយ៍ ប៉ុល សារឿន ក៏បានអំពាវនាវត្រូវរួមគ្នាការពារឱ្យបានរឹងមាំនូវសុខសន្តិភាព និងប្រឆាំងដាច់ខាតបដិវត្តពណ៌ ឬសកម្មភាពណាមួយដែលបង្កឱ្យមានអរិភាពជាតិសាសន៍នៃសង្គមកម្ពុជា។ ក្រៅពីនេះ ត្រូវរួមសហការជាមួយបណ្តាស្ថាប័នពាក់ព័ន្ធ ក្នុងកិច្ចការពារសន្តិសុខ សណ្តាប់ធ្នាប់សាធារណៈ ក្នុងពេលបោះឆ្នោតឃុំ-សង្កាត់ ដែលនឹងប្រព្រឹត្តិទៅនៅថ្ងៃទី០៤ ខែមិថុនា ឆ្នាំ២០១៧ ពិសេសកងទ័ពការពារលទ្ធផលការបោះឆ្នោត និងជាជាច់ខាត យើងជាកងទ័ពមិនអនុញ្ញាតឱ្យមានសកម្មភាពណាមួយដែលបង្កឱ្យមានអស្ថិរភាពនៅក្នុងសង្គមជាតិនោះឡើយ។ ត្រូវពង្រឹងទំនាក់ទំនងល្អជាមួយប្រជាពលរដ្ឋ ជួយប្រជាពលរដ្ឋពីគ្រោះមហន្តរាយនានា មិនធ្វើអ្វីៗឱ្យប៉ះពាល់ដល់សតិអារម្មណ៍របស់ប្រជាពលរដ្ឋ សំដៅបង្កើនការជឿជាក់របស់ប្រពលរដ្ឋ មកលើកងទ័ព។
នាយឧត្តមសេនីយ៍ ប៉ុល សារឿន ក៏បានណែនាំបន្ថែមថា ត្រូវយកចិត្តទុកដាក់ខ្ពស់ ក្នុងកិច្ចសហការល្អជាមួយកងកម្លាំងប្រទេសជិតខាងដោះស្រាយ បញ្ហាផ្សេងៗ ដោយសន្តិវិធី សំដៅកសាងតំបន់ព្រំដែនមួយឱ្យក្លាយជាតំបន់សន្តិភាព មិត្តភាព សហប្រតិបត្តិការ និងការអភិវឌ្ឍន៍។ នៅក្នុងរដូវវស្សានេះ ត្រូវលើកកម្ពស់ស្មារតីគ្រប់គ្រង ថែរក្សាសម្ភារៈ បរិក្ខារ សព្វាវុធ និងគ្រឿងបំពាក់ផ្សេងៗឱ្យបានល្អ។ រួមចំណែកបង្កបង្កើនផល ខិតខំចិញ្ចឹមទ័ពនិងថែរក្សាសុខភាព ផ្តល់ជុំរុំជម្រកឱ្យសមរម្យ ជាពិសេស កងទ័ពនិងគ្រួសារកងទ័ព ត្រូវប្រុងប្រយ័ត្ននិងការពារកុំឱ្យមានគ្រោះថ្នាក់ ដែលបណ្តាលមកពីគ្រោះធម្មជាតិ ខ្យល់កន្ទ្រាក់ ភ្លៀងផ្គររន្ទះជាដើម។
នាយឧត្តមសេនីយ៍ ប៉ុល សារឿន ក៏បានបញ្ជាក់បន្ថែមថា ក្នុងអាជីពជាកងទ័ព ជាដាច់ខាតត្រូវជៀសឱ្យឆ្ងាយពីគ្រឿងញៀន ល្បែងអបាយមុខគ្រប់យ៉ាង និងត្រូវចូលរួមគោរពច្បាប់ចរាចរណ៍ ដើម្បីសុខសុវត្ថិភាពខ្លួនយើង។ ត្រូវបន្តខិតខំសិក្សារៀនសូត្រ ដើម្បីបង្កើនសមត្ថភាពជំនាញវិជ្ជាជីវៈ និងខិតខំ សិក្សារៀនសូត្រ ក្នុងការប្រើប្រាស់ប្រព័ន្ធ Internet បណ្តាញសង្គមFacebook ជាដើម ពីព្រោះថា វាបានផ្តល់អត្ថប្រយោជន៍ យ៉ាងច្រើន ក្នុងការសិក្សាស្រាវជ្រាវចំណេះដឹង សំដៅអភិវឌ្ឍ សមត្ថភាពរបស់យើងឱ្យកាន់តែមុតស្រួច។ ត្រូវយកចិត្តទុកដាក់សិក្សាឱ្យបានស៊ីជម្រៅ អំពីលក្ខណៈសម្បត្តិប្រាំយ៉ាងរបស់មេបញ្ជាការគឺ៖ ត្រូវមានសមត្ថភាព ប្រតិកម្មរហ័ស និងជាមជ្ឈមណ្ឌលសាមគ្គីឯកភាពផ្ទៃក្នុងទូទាំងកងទ័ព ពេលទទួលបានបទបញ្ជា ត្រូវសម្រេចល្អភារកិច្ច ទោះជាស្ថិតក្នុងស្ថានភាពណាក៏ដោយ ត្រូវចេះចិញ្ចឹមទ័ពឱ្យបានល្អ ទំនាក់ទំនងល្អជាមួយប្រជាពលរដ្ឋនិងអាជ្ញាធរដែនដី ទំនាក់ទំនងអន្តរជាតិល្អ។ យកចិត្តទុកដាក់រៀបចំបណ្ណាល័យ ក្នុងទីតាំងដ៏សមស្រប និងត្រូវសរសេរអំពីឆាកប្រយុទ្ធក្នុងសមរភូមិពិត ដែលខ្លួន បានជួបប្រទះនាពេលកន្លងមក ដើម្បីចងក្រងទុកជាឯកសារសម្រាប់ប្រភពទុនឱ្យនាយទាហានវ័យក្មេង ដកស្រង់បទពិសោធន៍ល្អៗ ក្នុងការសិក្សារៀនសូត្រ។
ក្នុងឱកាសនោះ នាយឧត្តមសេនីយ៍ ប៉ុល សារឿន បានឧបត្ថម្ភថវិការជូនអង្គពិធីចំនួន១០លានរៀល និងឧបត្ថម្ភក្នុងពិធី ប្រគល់ផ្ទះជូនអតីតយុទ្ធជន របស់តំបន់ប្រតិបត្តិការសឹករងខេត្តបាត់ដំបង ចំនួន៥លានរៀលផងដែរ៕
No comments:
Post a Comment