លោកស្រី ម៉ៅ មាល័យ កែ គឹមយ៉ាន ដឹកនាំការពិនិត្យ និងព្យាបាលជម្ងឺដោយឥតគិតថ្លៃនៅក្រុងប៉ោយប៉ែត

នៅថ្ងៃទី១៦ ខែឧសភា ឆ្នាំ២០១៧នេះ លោកស្រី ម៉ៅ មាល័យ កែ គឹមយ៉ាន តំណាង លោកឧបនាយករដ្ឋមន្ត្រី កែ គឹមយ៉ាន និងលោក ណាតផៈវុធ ប៊ូធិសារូ ឯកអគ្គរាជទូតថៃប្រចាំព្រះរាជាណាចក្រកម្ពុជា បានអញ្ជើញជាអធិបតីក្នុងកម្មវិធីពិនិត្យ និងព្យាបាលជម្ងឺដោយឥតគិតថ្លៃនៅក្រុងប៉ោយប៉ែតនៅវត្តប៉ាលេយ្យល័យ សង្កាត់ និងក្រុងប៉ោយប៉ែត ខេត្តបន្ទាយមានជ័យ។

លោក អ៊ុំ រាត្រី អភិបាលរងខេត្តបន្ទាយមានជ័យ បានបញ្ជាក់ថា ការពិនិត្យព្យាបាលជម្ងឺជូនបងប្អូនពុកម៉ែប្រជាពលរដ្ឋដោយឥតគិតថ្លៃ គឺគ្មានការប្រកាន់និន្នាកានយោបាយនោះទេ ធ្វើការពិនិត្យព្យាបាលដោយឥតគិតថ្លៃជូនប្រជាពលរដ្ឋទូទៅ ពិសេសប្រជាពលរដ្ឋក្រីក្រ មានជម្ងឺ ដើម្បីចូលរួមចំណែកលើកកម្ពស់សុខុមាលភាពសាធារណៈកាត់បន្ថយភាពក្រីក្ររបស់ប្រជាពលរដ្ឋ។

គួរបញ្ជាក់ថា កម្មវិធីពិនិត្យព្យា​បាល​ជម្ងឺទូទៅ មាត់ធ្មេញ និងកាយសម្បទាជូនប្រជាពលរដ្ឋទូទៅក្នុងក្រុងប៉ោប៉ែត ត្រូវបានធ្វើឡើងតាមរយៈក្រុមគ្រូពេទ្យស្ម័គ្រចិត្តថៃ និងគ្រូពេទ្យខេត្តបន្ទាយមានជ័យ ក្រោមកិច្ចសហការដឹកនាំដោយលោកឧបនាយករដ្ឋមន្ត្រី កែ គឹមយ៉ាន៕