កាលពីថ្ងៃទី០៥
ខែមិថុនា ឆ្នាំ២០១៦ ក្រសួងបរិស្ថាន និងក្រសួងអប់រំ យុវជន និងកីឡា បានរួមគ្នារៀបចំទិវាបរិស្ថានជាតិ
និងបរិស្ថានពិភពលោក ៥មិថុនា ប្រារព្ធធ្វើឡើងក្រោមប្រធានបទ “ចូលរួមទាំងអស់គ្នា
ដើម្បីពិភពលោកស្រស់ស្អាត” នៅវិទ្យាល័យឥន្រ្ទទេវី ដោយមានការអញ្ជើញចូមរួមពីសំណាក់ឯកឧត្តម
សាយ សំអាល់ ឯកឧត្តមបណ្ឌិត ហង់ ជួន ណារ៉ុន រួមទាំងអាជ្ញាធរដែនដី មន្រ្តីរាជការ
លោកគ្រូ អ្នកគ្រូ និងសិស្សានុសិស្ស យ៉ាងច្រើនកុះករ។
ឯកឧត្តម
សាយ សំអាល់ រដ្ឋមន្ត្រីក្រសួងបរិស្ថាន បានលើកឡើងអំពីវឌ្ឍនភាពការងារ របស់ក្រសួង
បរិស្ថាន ក្នុងកិច្ចគាំពារបរិស្ថាន ការគ្រប់គ្រងធនធានធម្មជាតិ ការអភិរក្សជីវៈចម្រុះ
និងការរស់នៅ ប្រកបដោយចីរភាព។ ជាមួយគ្នានេះ ឯកឧត្តមរដ្ឋមន្ត្រីក៏បានលើកឡើងផងដែរ
អំពីការកែសម្រួលតួនាទី ភារកិច្ចរវាងក្រសួងបរិស្ថាន ដែលជាស្ថាប័នទទួលបន្ទុកលើការអភិរក្ស
និងក្រសួងកសិកម្មរុក្ខាប្រមាញ់ និងនេសាទ ដែលជាស្ថាប័នទទួលបន្ទុកលើការងារអភិវឌ្ឍន៍។
នៅក្នុងឱកាសនោះ
ឯកឧត្តម សាយ សំអាល់ ក៏បានលើកឡើងអំពីកិច្ចខិតខំប្រឹងប្រែងរបស់ រាជរដ្ឋាភិបាលកម្ពុជា
ក្នុងការគ្រប់គ្រងធនធានធម្មជាតិ ជាពិសេសព្រៃឈើ និងជាសម្បទានសេដ្ឋកិច្ច
សំដៅធានាដល់ការលើកកម្ពស់ជីវភាពរស់នៅរបស់ប្រជាជនកម្ពុជា។
ដោយឡែក
ឯកឧត្តម ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា បានមានប្រសាសន៍ថា
នេះជាលើកទីមួយហើយដែលក្រសួងទាំងពីរបានរៀបចំទិវាបរិស្ថានជាតិ និងបរិស្ថានពិភពលោក
៥មិថុនារួមគ្នា ក្នុងគោលបំណងដើម្បីបញ្ជ្រាបការយល់ដឹងអំពីបរិស្ថាន ទៅដល់មន្ត្រីរាជការ
បុគ្គលិកអប់រំ និស្សិត សិស្សានុសិស្ស និងសាធារណជន សំដៅលើកកម្ពស់គុណភាពបរិស្ថាន
ក៏ដូចជាផ្លាស់ប្តូរ ផ្នត់គំនិតការអភិរក្សជីវចម្រុះ និងការរស់នៅប្រកបដោយចីរភាព៕
No comments:
Post a Comment