លោក ម៉ែន វិបុល ដឹកនាំអង្គភាពពាក់ព័ន្ធទាំងអស់ឱ្យចូលរួមរៀបចំពូជស្រូវ ដើម្បីត្រៀមចែកជូនដល់ប្រជាកសិករ

 ស្វាយរៀង៖ នៅថ្ងៃទី១១ ខែវិច្ឆិកា ឆ្នាំ២០២០នេះ លោក ម៉ែន វិបុល អភិបាល នៃគណៈអភិបាលខេត្តស្វាយរៀង បានអញ្ជើញដឹកនាំកងកម្លាំងទាំង៣ មន្ត្រីរាជការ មន្ទីរ អង្គភាពពាក់ព័ន្ធ និងយុវជន សសយក ខេត្ត ចូលរួមរៀបចំពូជស្រូវដែលជាអំណោយរបស់លោកនាយករដ្ឋមន្រ្ដី ហ៊ុន សែន ដើម្បីត្រៀមចែកជូនដល់ប្រជាពលរដ្ឋខេត្តស្វាយរៀង ដែលរងគ្រោះដោយជំនន់ទឹកភ្លៀងនាពេលកន្លងមក នៅថ្ងៃទី១២ ខែវិច្ឆិកា ឆ្នាំ២០២០ស្អែកនេះ ក្រោមអធិបតីភាពលោកស្រីកិត្តិសង្គហបណ្ឌិត ម៉ែន សំអន តំណាងលោកនាយករដ្ឋមន្រ្ដី ហ៊ុន សែន ស្ថិតនៅទីតាំងមាត់ទន្លេវ៉ែគោ សង្កាត់ស្វាយរៀង ក្រុងស្វាយរៀង។

សូមជម្រាបជូនថា អំណោយជាពូជស្រូវសែនក្រអូបរបស់លោកនាយករដ្ឋមន្រ្ដី ដែលចែកជូនប្រជាពលរដ្ឋរងគ្រោះដោយទឹកជំនាន់ទឹកភ្លៀងមាន៖ ស្រុករមាសហែក ៣៩០គ្រួសារ, ស្រុកស្វាយជ្រំ ២០៥គ្រួសារ, ស្រុកកំពង់រោទិ័ ២៥៣គ្រួសារ, ស្រុកចន្រ្ទា ៨៦គ្រួសារ, ក្រុងស្វាយរៀង ៨០គ្រួសារ ក្នុងនោះ ១គ្រួសារ ទទួលបានពូជស្រូវ ១០០គីឡូក្រាម ៕