អង្គភាពប្រឆាំងអំពើពុករលួយ ចេញសេចក្តីជូនដំណឹង ស្តីពីការទទួលឯកសារប្រកាសទ្រព្យ និងបំណុលរបស់បុគ្គលជាប់កាតព្វកិច្ច

អង្គភាពប្រឆាំងអំពើពុករលួយ នៅថ្ងៃទី៨ ខែមករា ឆ្នាំ២០១៨ បានចេញសេក្តីជូនដំណឹង ស្តីពីការទទួលឯកសារប្រកាសទ្រព្យ និងបំណុលរបស់បុគ្គលជាប់កាតព្វកិច្ច ប្រកាសរៀងរាល់២ឆ្នាំម្តង និងតំណាងរាស្រ្ត សមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ និងឃុំ សង្កាត់បន្ទាប់ពីគណបក្សសង្រ្គោះជាតិត្រូវបានរំលាយ។

យោងតាមសេចក្តីជូនដំណឹងរបស់អង្គភាពប្រឆាំងអំពើពុករលួយ បានឱ្យដឹងថា នាយកដ្ឋានប្រកាសទ្រព្យសម្បត្តិ និងបំណុលនៃអង្គភាពប្រឆាំងអំពើពុករលួយ មានកិត្តិយស សូមជម្រាបជូនថា ការទទួលឯកសារប្រកាសទ្រព្យសម្បត្តិ និងបំណុល សម្រាប់ថ្ងៃច័ន្ទ ទី៨ ខែមករា ឆ្នាំ ២០១៨ គិតត្រឹមវេលាម៉ោង ១៧៖០០នាទី មានចំនួន៧២៥រូប
ការប្រកាសរៀងរាល់២ឆ្នាំ ចំនួនទទួលបាន២០០រូប
ការប្រកាសរបស់សមាសភាពគណបក្សត្រូវបានរំលាយ និងអ្នកចូលកាន់តំណែងថ្មី ចំនួនទទួលបានសរុប៥២៥ រូប ដែលក្នុងនោះរួមមាន៖
ក្រុមប្រឹក្សារាជធានី ខេត្ត ក្រុង ស្រុក ខណ្ឌ និងឃុំ សង្កាត់ចំនួន ៥២៥រូប
បញ្ឈប់ចំនួន៤២២រូប (អតីតសមាជិកគណបក្សសង្រ្គោះជាតិចំនួន ៤២២រូប)
តែងតាំងថ្មីចំនួន ១០៣ រូប (គណបក្សប្រជាជនកម្ពុជា ចំនួន៨៣រូប, គណបក្សហ៊្វុនស៊ិនប៉ិចចំនួន៨រូប និងខ្មែររួបរួមជាតិចំនួន១២រូប)។

គិតត្រឹមថ្ងៃទី៨ ខែមករា ឆ្នាំ២០១៨ ទទួលបានឯកសារប្រកាសទ្រព្យសម្បត្តិ និងបំណុល
រៀងរាល់២ឆ្នាំម្តង ចំនួនទទួលបានសរុប១៤៨៩រូប
ការប្រកាសរបស់សមាសភាពគណបក្សត្រូវបានរំលាយ និងការចូលកាន់តំណែងថ្មី ចំនួនទទួលបានសរុប២៤២៦ រូបរួមមាន៖
តំណាងរាស្រ្តចំនួន៦១រូប និងទីប្រឹក្សា ជំនួយការ៣១រូប សរុបចំនួន២៣២៨រូប

សេចក្តីជូនដំណឹងរបស់អង្គភាពប្រឆាំងអំពើពុករលួយបានឱ្យដឹងទៀតថា នាយកដ្ឋានប្រកាសទ្រព្យសម្បត្តិ និងបំណុល សូមធ្វើការលើកទឹកចិត្ត ដល់បងប្អូនដែលជាប់កាតព្វកិច្ចប្រកាសទាំងអស់ សូមរួសរាន់មកបំពេញកាតព្វកិច្ចរបស់ខ្លួន ក្នុងរយៈពេល៣០ថ្ងៃនេះ ដោយនាយកដ្ឋានធ្វើការទទួលឯកសារទាំងពេលថ្ងៃត្រង់ ថ្ងៃសៅរ៍ ថ្ងៃអាទិត្យ និងថ្ងៃបុណ្យ។ ប្រសិនបើបងប្អូនជួបបញ្ហា នាយកដ្ឋាននឹងជួបពិភាក្សាដោះស្រាយជូន៕