លោកស្រី ម៉ែន សំអន ដឹកនាំគណៈប្រតិភូសមាគមនារីកម្ពុជាដើម្បីសន្តិភាព និងអភិវឌ្ឍន៍អញ្ជើញគោរពវិញ្ញាណក្ខន្ធមហាឧបាសក គង់ ខាត់

នៅរសៀលថ្ងៃច័ន្ទទី៧រោច ខែបុស្ស ឆ្នាំរកា ព.ស. ២៥៦១ ត្រូវនឹងថ្ងៃទី៨ ខែមករា ឆ្នាំ២០១៨ លោកស្រីឧបនាយករដ្ឋមន្ត្រី ម៉ែន សំអន ប្រធានសមាគមនារីកម្ពុជាដើម្បីសន្តិភាព និង​អភិ​វឌ្ឍន៍ បានដឹកនាំគណៈប្រតិភូសមាគមនារី អញ្ជើញគោរពវិញ្ញាណក្ខន្ធមហាឧបាសក គង់ ខាត់ ដែលត្រូវជាឪពុកក្មេករបស់លោក សាយ ឈុំ ប្រធានព្រឹទ្ធសភានៃព្រះរាជណាចក្រកម្ពុជាដែ​ល​បានទទួលមរណភាពកាលពីថ្ងៃទី០៧ ខែមករា ឆ្នាំ២០១៨ វេលាម៉ោង ៥:៣៦នាទីទៀបភ្លឺ ក្នុងជន្មាយុ១០១ឆ្នាំ ដោយជរាពាធ។

ការទទួលមរណភាពរបស់មហាឧបាសក គង់ ខាត់ គឺជាការបាត់បង់នូវស្វាមី បិតា ជីតា ជីតាទួត ប្រកបដោយព្រហ្មវិហារធម៌មួយដែលបានចិញ្ចឹមបីបាច់ថែរក្សា និងអប់រំទូន្មានកូនចៅ ប្រ​កបដោយគន្លងធម៌ និងណែនាំឱ្យកូនចៅក្លាយជាកុលបុត្រ កុលធីតាដ៏ល្អរបស់ប្រទេសជាតិ ក៏ដូចជាការបាត់បង់នូវពុទ្ធសាសនូបត្ថម្ភមួយរូបដែលបានចូលរួមយ៉ាងច្រើននៅក្នុងការកសាង និងលើកស្ទួយនូវវិស័យព្រះពុទ្ធសាសនា។

លោកស្រី ម៉ែន សំអន ក៏បានបួងសួងសូមឱ្យវិញ្ញាណក្ខន្ធរបស់មហាឧបាសក គង់ ខាត់ បានទៅកាន់សុគតិភពកុំបីឃ្លៀងឃ្លាតឡើយ៕